من بكره بالديره تحديداً ببيت الجد إبراهيم :
رهف : سلمان ترتب معي المطبخ؟ قاعده اسوي كيك ومشغوله
سلمان : ابد ابشري
رهف : تبشر بالجنه يارب
كان سلمان بس يرتب كم غرض
شاف سلمان الدقيق الي كان بصحن قدام رهف وفكر بس انه ياخذ شوي ويكبه عليها
سلمان : رهف وريني وجهك شوي
لفت رهف وهي تشوفه : وش تب..
ما امداها تكمل الا والدقيق انتثر بوجهها
رهف بصراخ عالي : سلماااانن وترااابب!!
كان سلمان منهار من الضحك على شكلها ولا حس الا بالدقيق الي انكب عليه
رهف : تستاهل عشان مره ثانيه تكب علي شيء
تهاوشو برمي الدقيق وكلهم ميتين ضحك على بعض
سلمان بكل بساطه كان وده يغير جو رهف شوي كونها هالفتره مضغوطه تسوي كل شيء لحالها من طبخ وغسيل وترتيب ودايم ترفض ان امها تسوي شيء
وقفو لما استوعبو هم وش قاعدين يسوون ورتبو المطبخ بسرعه وكل واحد فيهم راح واخذ له شاور
الساعه 12:05 كان كل الرجال بالمسجد عشان يصلون الجمعة سلمو على بعض وبدو صلاة
على الساعه 12:25 طلعو من المسجد وراحو لبيتهم
ببيت ابو عبدالرحمن :
جود : يله نطلع؟
عبدالرحمن : خليني اجلس شوي طيب؟
وتين : دحوم ترى والله متأخرين بعد العصر بنمشي يعني مايمدي ابد
عبدالرحمن : هاك مفتاح السياره واركبو بحط شماغي وبجي
خذت جود منه المفتاح وركبو وهو حط شماغه وركب وداهم السوبرماركت
كان يدف لهم العربيه وهم يدورون الي يحتاجونه
جود : يلييل مو موجود
عبدالرحمن : وش تبين؟
جود : لبنة
عبدالرحمن : خلاص خليها بعدين نسأل عنها
نطقت وتين وهي تحط فاكهة بالعربيه : ولا في فراولة لازم نمر محل فواكة
عبدالرحمن : محل ابو محمد موجود عنده بنجيب وش غيره؟
جود : باقي زبدة وحليب ورز وبطاطسات وكذا
عبدالرحمن : خلاص روحو جيبو هالاشياء وانا بجيب الرز الي نجيبه دايم
جود : تمام
تفرقوا وعلى طريقه عبدالرحمن جاب اشياء لهم من حب ومكسرات وكم مشروب للجميع للعشاء
سأل عبدالرحمن عن اللبنة وعطوه ثم حاسبوا ومرو محل الخضار وفواكة ثم مشو للبيت
كانت البيوت مشتطه ماعدا بيت سلطان
كان يعاون امه بالمطبخ كونهم لحالهم بالبيت وابوه واخته رايحين للسوق
ام سلطان : سلطان عطني النايلون
مد لها سلطان وكانو مخلصين وباقي بس يحطون الاغراض بالسياره
سلطان : يمه انا بنام شوي اذا جت الساعه 2 كذا صحيني
ام سلطان : ان شاء الله
رقى سلطان لغرفته وانسدح على سريره وهو منهلك من التعب
على الساعه 4:10 تقريباً الكل كان موجود بالمزرعة
البنات كانو يرتبون مفارشهم في الغرفه الي بينامون فيها
رهف : يوه عاد اشتقت للنوم معكم
وتين : مانمتي عندنا الا مره وحده بس
جود : وكان يوم مخيس بعد
وتين : كملو سواليفكم بروح اشوف امي تو تناديني
راحت وتين وقعدو رهف وجود
رهف : هو فعلا كان يوم مخيس
جود : اسكتي بسس انا يوم شفت الدم قلت لايكون متهاوش مع سلطان ونايف جاني هبوط ولا قال لي شيء اصلا
كانو البنات طايرين من الوناسه كونهم من يوم العزيمه مو شايفين بعض وقاطعين كثير
بالنسبه للعيال كانو جالسين بدكه العريش كونها كانت بارده
الجد محمد : والله يا سلطان زين انك قررت نطلع بالجو ذا
فهد : اي والله صادق
سلطان : ابد عليكم بالعافيه وخذو راحتكم
عبدالرحمن بهمس لسلطان : نيّوف بيجي؟
سلطان : بكره بيجي ان شاء الله
عبدالرحمن : زين
على الساعه 6:10 كانو البنات بالمطبخ يرتبونه بعد الحوسه الي سووها فيه
رهف : عسى ام سلطان ماتضيق علينا والله مره احتاس
جود : معليك والله انها حبيبه مب مسويه شيء بس مب محوس مره يمدي يمدي
دخلت ام وليد ونطقت : ماخلصتو؟
جود : الا يا خاله بس بنرتب الي بعدنا تعرفين المكان مب لنا بعد
ام وليد : يله لاتتأخرون
طلعت وجلست عند الحريم وهم بعدها بدقايق لحقوها
جلسوا معهم وقعدو يسولفون
بالجهة الثانيه عند العيال :
ابو عبدالرحمن : يالله يا عيال أبدو بالعشاء
فهد : ابشر
قام سلطان ونطق : يالله قومٍ تعاونوا ما ذلو
سلمان : طيب وش بنسوي؟
فهد : بنطبخ
طلعو برا وشبو على الغاز وحطو اللحم بالقدر
سلطان : البهارات وين؟
عبدالرحمن : بسيارتي دوك فهد المفتاح وجبها وفي أغراض عند الحريم بالمطبخ بجيبها سلمان تعال معي
سلمان : ابشر
سلطان : اعجلو يله
راح كل منهم عشان يجيبون الأغراض
وليد بضحك : وراكم مشتطين كل واحد بجهه
سلطان : عِين وعاون يارجل
وليد : يله الي تحتاجون بساعدكم فيه
راح عبدالرحمن لباب المطبخ الخارجي وكان مرسل من قبل لجود عشان تحط الأغراض عند الباب
وبالمطبخ وتين ورهف قاعدين يغسلون الفناجيل والترامس
عبدالرحمن : ياوللدد
وتين : ادخل ادخل ماحولك احد
كانت وتين ناسيه ان رهف معها
شافها عبدالرحمن وهو داخل وصد عنها على طول ماكان متوقع ان هذي رهف الي الكل يتكلم عن زينها ورزتها كانت بباله شيء ولما شافها فاقت كل تخيلاته
عبدالرحمن : وتين قربي الأغراض عند الباب
وتين : ابشر
طلع عبدالرحمن من المطبخ وقربت وتين الأغراض عند الباب واخذ عبدالرحمن نصها وسلمان النص الثاني
يتبع...
