ركب عبدالرحمن بعدهم وكانت جود جنبه ووراه رهف والجهه الثانيه وتين
بدا يمشي وهو يتأكد اذا كان ناقصهم شيء
عبدالرحمن : فلوسكم معكم ولا اعطيكم؟
جود : لا يعطيك العافيه ابوي معطينا كرته
عبدالرحمن : بتطولون؟
جود : ماندري على حسب
عبدالرحمن : اذا احتجتم شيء ولا شيء دقو علي بكون قريب عند سلطان
وتين : بالاستراحة؟
عبدالرحمن : لا ببيتهم
وتين : بيتهم قريب من السوق عادي بتلحق علينا لو صار شيء
عبدالرحمن بضحك : وش ممكن يصير يعني؟
وتين : ما ادري وشو بس احتياط لا سمح الله
جود : زين بكلمك لو احتجنا شيء
وقف بعدها بدقايق السياره عند بوابه السوق
ونزلو البنات ودخلو وهو تأكد من دخولهم ومشى
دخلو محل كانو يبونه من قبل وهم ضايعين بين الملابس
رهف : تعالي وتين، شوفي هذي البلوزه بتنفع لك مرهه مع بنطلونك البيج الجديد ذاك
وتين : مافكرت ألبس معه ابيض الصراحه بس مرره تجنن، بدور مقاسي وباخذها
جود : وهذي بعد بتناسب، خذيها كلها يمكن تحتاجينها بلبسه ثانيه
رهف : وانتي جود وش تبين عشان ندور لك؟
جود : انتي دوري لك مو يعني لقيتي لوتين بتلقين لي معها
رهف : ماتدرين يمكن ألقى لك هنا
جود : والله جايه باخذ كم قطعه يعني حق الجامعه معد باقي لها الا اسبوعين وعارفه دوام عبدالرحمن يصير دوام كامل مو شفتات زي الإجازة
وتين : يله عقبال ما يوديني معكم اخر سنه
رهف : ياعمري تفكر بالروحه من الحين وانتي باقي لك اختبارات القبول يقلبي
وتين : لاتذكريني تكفين والله يع
جود : رهف تعالي شوفي هذي البلوزه حلوه ولا؟
قعدو يتمشون بالأسواق ويشترون الي يحتاجونه بس، دخلو مطعم من المطاعم يبون يتغدون كونهم مابعد اكلو شيء وتعبو من المشي الطويل
طلبو لهم أكل وقعدو ياكلون وبعدها كملو تسوق
على الساعه 6:00 أذن المغرب واتجهو للمصلى بعد ما بدت المحلات تقفل عشان الصلاة
دخلو المصلى وتركو اغراضهم قدامهم وبدو يصلون ولما انتهو جلسو يستغفرون ويرتاحون شوي
رهف : ترى الرجعه معي
وتين : تجين عندنا البيت؟ فاضي مافي احد
رهف : لا هالمره انتم تعالو عندي دايم انا اجي عندكم
جود : خلاص اجل بكلم عبدالرحمن يجي يرجعنا
رهف : لا لا ولا تكلمينه ابد، بكلم سلمان يجي يرجعنا، ودانا هو كثر الله خيره الرجعه منب راجعه معه
جود : وليه ماترجعين معه؟
رهف : ما كلمت جدي على الرجعه معه، واصلا سلمان مرسل لي اذا جينا نبي نرجع نكلمه
وتين : الله يعافيه جدي إبراهيم شكله مهدده
رهف : والله هذا الحاصل، دقيت عليه ابيه يوديني ولا رد وشكله خلص مذاكره وجدي قال له يرجعنا
جود : خلاص اجل بكلم ابوي نشوف اذا نجي معكم ولا لا
رهف : قولي له ترى جدي ملزم ترجعون معي
جود : ان شاء الله
قامو كلهم واخذو اغراضهم وطلعو ووقتها جود دقت على ابوها والبنات قدامها وهي تمشي وراهم عشان تكلمه زين
ابو عبدالرحمن : هلا جود شبغيتي؟
جود : يبه نقدر نرجع مع رهف؟ جدها ملزم نرجع معها ترى
ابو عبدالرحمن : من بيرجعها؟
جود : تقول سلمان، وترى نبي نروح للبيت عندها عادي؟
ابو عبدالرحمن : روحو عندها ماعليه، الرجعه انا اكلم جدهم يرجعكم عبدالرحمن
جود : يبه عبدالرحمن عند سلطان اليوم، مب مخالف يرجعنا بس نخليه ماودنا نخرب عليه
ابو عبدالرحمن : اجيكم انا طيب؟
جود : يبه دامه ملزم عليها عيب نكسر كلمته، خل نروح معه هذاهي رهف ترجع معنا مايقولون شيء
ابو عبدالرحمن : صدقتي، خلاص الله يحفظكم يبه
جود : امين يارب ويحفظك لنا ويخليك
ابو عبدالرحمن : امين يابنتي، اذا بغيتو شيء دقو علي
جود : ابشر
سكرت جود الخط وناظرت الا رهف تمشي قدامها لحالها
جود : رهف وين وتين؟
رهف : دخلت محل بتجي الحين
جود : اي محل؟؟
رهف : ما اذكر والله
جود : يارب مايصير فيها شيء يارب
رهف : ليه وش فيها؟
جود : ما فيها شيء بس ماتحب تروح لحالها للأماكن الي فيها ناس كثير ترتبك
رهف : رهاب اجتماعي؟
جود : تقدرين تقولين كذا
رهف : يالله عونك، وين بنلقاها الحين؟
جود : أمشي نرجع يمكن تطلع من محل ولا شيء
رهف : بدق عليها يمكن ترد علي
جود : جوالها مفصول لو ذا كان دقيت عليها من اول ما قلتي لي انها راحت
رهف : لازم نلقاها بسرعه قبل يجي سلمان لانه بالطريق الحين
جود : ياربيي
رهف : المشكله شنطتي معها وش السواه الحين؟
جود : لا تكفين رهف مو كذا
بدو يدورون بالمحلات الي تعدوها وهم يمشون ووقتها كانت وتين اصلا تايهه وماتدري وينهم فيه، دخلت محل وطلعت من البوابه الثانيه له وناسيه وين كانو هم وكانت خايفه من نظرات الناس لها
والتوتر الي حاش جود ورهف وقتها على وتين ولا يدرون وينها حتى، وهذا الي زاد خوفهم عليها فيه انه وقت إقبال ناس للسوق وصار شبه مزدحم
مرت حول الربع ساعه ولا لقوها وهي مالقتهم ووقتها هي صارت معد تحس برجولها وتمشي بدون احساس منها
مابرد عظام وتين الا لما شافت سلمان يدخل من احد البوابات ويمشون نحوه حرمتين والي هي فهمت منهم انهم رهف وجود من شنطه جود والاكياس الي معهم وراحت لمهم بسرعه
وصلت لجود وحضنتها بقوه تحت انظار سلمان المصدوم من الي يشوفه
جود بخوف : انتي بخير؟ جاك شيء؟
وتين ببكاء : لا، مافيني شيء
رهف : خلاص وتين مافي شيء عادي حصل خير
وقتها ماردت عليها وتين واكتفت بالشد على اختها ووقتها طلع سلمان بعد ما قال لهم انه بينتظرهم بالسياره
بعد دقايق هدت وتين وطلعو ثلاثتهم وركبو السياره معه، رهف قدام ووتين وراها وجود وراء مرتبه سلمان
مرت دقايق معدوده ووصلو للبيت
سلمان : رهوف، المفتاح خذيه وادخلوا مايمكم احد وليد وزياد بالمجلس ان بغيتو ادخلو من باب المطبخ وجدي معزوم
نطقت رهف بعد ما خذت المفتاح منه : وانت وين بتروح؟
سلمان : بلبق السياره وبجي برقى غرفتي على طول
رهف : طيب، علمني اذا دخلت عشان نبعد عن دربك
سلمان : زين
نزلو البنات ودخلو للبيت وراحوا للباب الخلفي يم المطبخ ودخلو منه
يتبع...
