بعد ثلاث ايام من الي صار، يوم الإثنين وتحديدا بالمزرعه :
قامو البنات حدود الساعه 11:30 الظهر بكونهم امس كانو نايمين بالمزرعه وكان الكل فيها
ام وليد : اخيرا مابغيتو تقومون؟
جود : والله نومه الأرض شيينه يخاله ماعرفنا ننام زين
ام عبدالرحمن : اقول بس انتي وياها وحده منكم تكلم عبدالرحمن يجيب معه وهو راجع اللبن والقشطه
رهف : خلاص انا اكلمه يجيبها في شيء غير هذول خالتي؟
ام عبدالرحمن : لا ماتقصرين
ام سلطان : الله يصلحهم كلهم مداومين ولا حولنا احد يجيب الأغراض الأمل فيهم عساهم ماينسونا
جود : لا ان شاء الله ماينسون
طلعت رهف من عندهم ورجعت للغرفه الي كانو نايمين فيها وخذت جوالها واتصلت عليه ووصلها الرد منه متأخر
عبدالرحمن : هلا رهف
رهف : مشغول؟
عبدالرحمن : شويه شغل وش بغيتي؟
رهف : خالتي تبي اغراض من البقاله تقول وانت راجع جبها مع...
كانت بتكمل كلامها لو انها ماسمعت احد عنده يناديه بأستعجال وهو نطق يقاطعها : رهوف اكلمك بس اخلص شغل زين؟ الحين مره مشغول
رهف : طيب
سكرت الخط ورجعت للمطبخ معهم تساعد بشوي اشياء
من صارت الساعه 12:35 ولحد الان عبدالرحمن ما اتصل عليها ولا صار يرد على رسايلها ولا حتى فتحها عشان تضمن انه بيجيب الأغراض
رهف : جود عبدالرحمن معد يرد، واخاف خالتي تعصب لما تدري انه ماسمعني حتى
جود : وتقولين الرسايل مافتحها صح؟
رهف : وهذا الي بيجنني
جود : شوفي ببالي فكره بس مدري انتي بتجين معي ولا لا
رهف : الي هي؟
جود : الصدق انا شفت سلطان رايح مع عبدالرحمن بالسياره، يعني الأكيد ان مفتاح سيارته موجوده بالمزرعه وسيارته من امس واقفه مكانها وبما انك تعرفين تسوقين والبقاله قريبه يعني
رهف : ناخذ سياره سلطان ونمشي نجيب الأغراض ونرجع؟
جود : بالضبطط عليك نور
رهف : وين تقولين المفتاح فيه؟
جود : اكيد انه بالملحق الي دايم يجلسون فيه
رهف : الغرفه الي فيها العود؟
جود : ايه، اسمعي جيبي العبايات وانا بجيب المفتاح وبجي ونروح على طول ولا من شاف ولا من درا
رهف : تمام
جود : بس لحظه انا ما اعرف اسوق من بيسوق؟
رهف : انا اعرف كنت اسوق بالرياض قبل يعني اعرف شيء بسيط مو مره يمشي وضعنا الحين
جود : خلاص حلوين اجل يله جيبيها وبجيب المفتاح ونتقابل عند الباب الي ورا
رهف : تم
كل وحده فيهم راحت من جهه ولحسن حظهم ان المفتاح كان موجود فعلاً بالغرفه وماكان صعب عليهم انهم يطلعون من المرزعه لان من كبرها محد ممكن يلاحظ انهم طلعو من حدودها، وبكونهم يحبون يتمشون فيها مارح يشك احد ولا %1 انهم طالعين برا
من سكرو بيبان السياره وهم قلوبهم تتراعد من الي قاعدين يسوونه
رهف : شوفي الوضع مايريح
جود : هو مايريح بس لازم نجيبها، بسرعه قبل يشوفنا احد
رهف : وين أمشي له؟
جود : أمشي قدام، الطريق كله سالك
رهف : بسم الله الرحمن الرحيم
مشت السياره وتعدو المزرعه وكانو يمشون على موقع البقاله من جوال جود والي كانت تبعد عن المزرعه حدود الـ15 دقيقه
