عند البنات :
دخلو رهف وجود وسلموا عليهم وكانت
ام فهد "نوال" وإيمان موجودين وجلسو معهم
رهف : ماتوقعت انه بياخذ كل هالوقت
ام عبدالرحمن : يعني بصراحه هو ياخذ وقت بس انتي مو متعوده عليه
جود : اخ بس ياحظ الرجال تفصيل ثوب وشماغ وبس
رهف : عاد حنا فستان وعلى مانلقى قياس ولا شكل مرتب
وتين : هذا غير التسريحه وغير الاكسسوارات والكعب
جود : غثثى صدق
ام فهد : عساكم رحتو السوق؟
ام عبدالرحمن : اي راحو اليوم
ام فهد : ليش ما اخذتو إيمان معكم
جود : شفنا عبدالرحمن بيطلع للسوق ورحنا معه
إيمان بأستغراب : هو وداك انتي لحالك؟
جود : لا وداني انا ورهوف
سكتت إيمان والقهر واضح عليها
الجده حصه : حصل خير المره الجايه ان شاء الله
بجهة ثانيه عند نايف والجوهره :
توهم يركبون السياره عشان يروحون للديرة وقتها نايف بلغ عبدالرحمن انهم بيمشون الحين
نايف : تحسين انك بخير الحين ولا تقعدين بالبيت ونمشي بكره؟
الجوهره بتعب : لا خلاص مافيني شيء وصعبه نجي بكره
نايف : ليه صعبه؟ عادي مافيها شيء الحين اكلم عبدالرحمن واقول له ترى بنجي بكره وخلصنا
الجوهره بتعب : نايف الله يخليك كلها ساعه ونص تقريبا ونوصل لاتكبرها وهي صغيره
نايف : طيب
من يوم رجعو نايف والجوهره لبيتهم كان الحمل على الجوهره متعب عليها خصوص انها ببدايه الاسبوع الثاني بالحمل والغثيان مو فاك عنها ابد ماتشتهي تاكل ولا تسوي شيء
رغم ان نايف كان يجبرها على الخفيف عشان تاكل ولا تهمل صحتها وصحه الي ببطنها
طول الطريق كان نايف يحاول قد مايقدر انه ينسيها فكره انها تعبانه بأنه يسولف لها عن بدايتهم
قبل سنتين :
الساعه 3 العصر
بأحد قاعات الأفراح بقسم النساء
المصوره : حضره العريس ممكن تحط يدك على خصرها عشان الوضعيات
حط نايف يده على خصر الجوهره ونطق بصوت خفيف مايسمعه الا الجوهره : بالحلال
ابتسمت الجوهره على كلامه لان أيام ملكتهم لما يجي مع انها صارت زوجته بالحلال إلا انها كانت ترفض احيانا انها تطلع له او انها تطلع معه لأي مكان وكونه ساكن بمنطقه ثانيه غير منطقتها يجي لها بين فتره وفتره ونادر مايتقابلون او يتكلمون بالجوال
الجوهره بأبتسامه : يعني عاجبك الوضع كذا قدامهم
نايف : عاجبني وبس؟ إلا عاجبني ونص بعد
وقتها خلصوا تصوير مع بعض ودخلو أهلهم عشان يصورون معهم وفعلا صورو بس قبل يطلعون مسك اخو الجوهره نايف على جنب
أسامه : شف يا نايف اختي ان رجعت بيوم وهي تصيح بسبتك ولا اي شيء من هذا القبيل اعرف انك مارح تكون سليم ابد كل شيء ولا الجوهره سامعني؟
نايف : تامر على هالخشم
ابو الجوهره : أسامه يله يابوك لاتزعج الرجال بيوم عرسه
الجوهره : أسامه رح لابوي ونايف الحين بيطلع لكم بس بيغير شماغه
قرب منها أسامه وهو يحب راسها ويطلع مع ابوه
لحقهم نايف عقب ما حضن الجوهره لوقت طويل
في السياره :
نايف : مستحيل انسى هالحضن ابد
الجوهره : مع انك كسرتي وقتها الله يسامحك
نايف : عاد وش اسوي عارف اني منب شايفك لين اخر الليل توقعي كل شيء مني عادي
الجوهره : عادي تعودت عليك مايحتاج
نايف : شفتي كيف الطريق سهل؟ هذانا دخلنا الديرة
الجوهره : لذي الدرجة كنا نتكلم كثير بموضوع العرس؟؟
نايف : لهدرجة راح بالك كثيير بالموضوع؟
الجوهره : والله ماحسيت بنفسي
وقف نايف عند باب بيت ابو عبدالرحمن وكان الباب مفتوح ودخلت الجوهره من باب المطبخ لان سياره سلطان موجوده والمدخل الرئيسي فيه المجلس عشان كذا مطرين يدخلون البنات من ورا
دخل نايف عند الرجال عقب مازين شماغه
لما جاء بيسلم سكت عقب ما شاف النقاش الي قاعد يصير
سلطان : ياعم قل لا اله الا الله قلت لك انا انه ماله دخل بالسالفة اصلا
الجد محمد : اذا هذا وجهة وجه الثاني وش صار
عبدالرحمن : العذر والسموحه منك يا جدي بس لو اني اقدر كان ذبحته
ابو عبدالرحمن : عبدالرحمن تكلم بأدب مع جدك
الجد إبراهيم : يا رجال سمو بالله وادحرو الشيطان
سلطان : ياعم السالفه وما فيها انه رجال بيني وبينه خلاف كنا خلاص بنتهاوش تلفظ علي وقام عبدالرحمن من القهر وتهاوش معه وهذاه قدامك مافيه الا العافيه
نايف : السلام عليكم
عبدالرحمن بأبتسامه خفيفه : وعليكم السلام والرحمة
سلم عليهم نايف والكل يتحمد له بالسلامة كونه جاي من طريق سفر
طلع بعدها عبدالرحمن من المجلس وقال لهم انه بيجيب غرض من السياره وبيجي
يتبع...
