عند الرجال :
على الساعه 6:00 المغرب وصل العريس ووقتها توهم يقبلون الناس عشان يشاركونه فرحته
سلمو عليه وباركو له وقعدو يضيفون الشياب
نطق سلمان وهو بين عبدالرحمن ونايف : يوه عساني اشوفكم زيه قولوا امين
لف عليه عبدالرحمن بصدمه : امين بس وراك صرت زي الشياب؟ طيب قهويتهم بس أمداك تاخذ طبايعهم؟
نايف : امين لعبدالرحمن انا اعرست وخلصت فكني شرك
سلمان بضحك : والله جدي إبراهيم قال ادعي لكم وهذاني وصلت الدعوه
سلطان وهو يعدل نسفه سلمان : هذي ثالث مره تخرب شماغك اهجد ياخي
سلمان بأبتسامه : انت مشتط على غير سنع
سلطان : بشتط لان لو شافوك كذا بيقولون وبيرمون عليك الحكي وحنا منب ناقصين الصراحه
سلمان : الله واكبر عاد
نايف : تبيهم يقولون سلمان حفيد إبراهيم رخمه ولا يعرف يعدل نسفته؟
سلمان : تعقب مايقولونها
عبدالرحمن : صك حلقك انت وياه رجّل عمتي بيقبل علينا
سلطان : عساه سامي؟
فهد : تتكلم على اساس في غيره
سامي بأبتسامه : سلام عليكم
عبدالرحمن وهو يسلم عليه : وعليكم السلام والرحمة، الحمدلله على السلامه
سامي : الله يسلمك
سلم عليهم سامي كلهم وكلهم تحمدو له بالسلامه
سامي : ماعرفتونا من ذا؟
فهد : سلمان حفيد الجد إبراهيم
سامي : والنعم
سلمان : والنعم بحالك
جلسو العيال ويسولفون شوي ليين يخلصون الشيبان ويبدون رقص
بالجهه الثانيه عند الحريم :
كانت جود ووتين واقفين عند مرايات الحمامات "الله يكرمكم" قاعدين يتعدلون وعلى طلعتهم دخلت ام وليد مع رهف وسلمو عليهم
ام وليد : ما شاء الله تبارك الله وش ذا الزين يابنات
جود : الله يسلمك خالتي
وتين : انتي بعد وش ذا الكشخه تهبليين
ام وليد بضحك : بعد عمري والله، وين جلست امكم؟
جود وهي تأشر عليهم : هناك يا خاله
راحت ام وليد وسلمت عليهم وجلست وقتها البنات استلمو رهف
جود : يقطع ابليسك ما شاء الله تبارك الله تهبليين يارهفف
وتين : عيب عليك موزيه هالزين كله ولا وريتينا منه الا الحين
رهف : هوب هوب هوب شوي شوي علي شفيكم
جود : أمشي أمشي نخلي امي حصه تحصنك عيون حريم الديره سكاكين
وتين : ولا تعتمدين تحصين امي حصه حصني نفسك انتي بعد
سحبوها البنات عند الجده حصه ولما راحت لهم الكل قعد يمدح فيها ويسمي عليها
" كانت لابسه فستان فضي وطوله لين نص الساق تقريبا أكمامه طويله ومنفوخه وكان ضيق من عند الخصر ومن تحت هابط "
حصنتها الجده حصه وهي بعد حصنت نفسها
ماهي الا دقايق وداخله إيمان وأمها وجو يسلمون
حرفيا الكل شاف ان فستان إيمان مايناسب ملكه ابد خصوص انه فخم بزياده عن حفله ملكه بس
ام عبدالرحمن : ما شاء الله يا إيمان وش ذا الكشخه والحلاوة
إيمان : تسلمين عمتي من ذوقك
ام فهد : والله ما شاء الله عليكم كل وحده تقول الزين عندي
جلسو شوي وتقهوا وبدأ شوط الرقص
كان رقص البنات تحفه بما تعنيه الكلمة
الأنظار كلها كانت على رهف كون بعض اهل الديره ماقد شافوها ابد
قربت جود يمّ طاوله أهلها وهي تسحب الجوهره
جود : قومي ارقصي معنا يلله
الجوهره : ماودي ارقص الحين
هيفاء : قومي بس معهم يله
الجوهره : تقومين معي طيب؟
هيفاء : ابد يفداك بقوم معك
قاموا وراحوا مع البنات ورقصو ووسعو صدورهم
كانت الجوهره حريصه محد يقرب منها كثير عشان مايطقون بطنها بالغلط ويصير بالجنين شيء خصوص انها ببدايات حملها يعني اي شيء كانت تتوقعه
عند الرجال :
كان نايف وسلطان منتبهين على عبدالرحمن لايسوي شيء بعد ما شاف زياد يدخل مع وليد للعرس وعشان مايصير بينهم شيء وينفضحون قدام الرجال
عبدالرحمن : سلمان زياد وش يصير لكم؟
سلمان : صديق وليد
نايف : يشتغل معه بالدوام؟
سلمان : اي بس ياخي نشبه ما احبه
سلطان بضحك : وراه؟
سلمان : غثيث ومليق غير كذا يحرض وليد علي
عبدالرحمن : ليه وش سوا؟
سلمان : رايح أذاكر مع الشباب عشان اختبار القبول حق الجامعه وقال لوليد اني طالع اغير جو بس عشان شافنا نذاكر في كوفي حول المنطقه الي ساكن فيها نايف
سلطان : ياشيخ طنشه وعش حياتك اهم شيء تذاكر وانت مروق
نايف : الله واكبر تذاكرون بكوفي كان تجمعتو ببيت واحد منكم وتذاكرون
سلمان : نروح للبيوت بس قلنا نغير الأماكن شوي
عبدالرحمن : والله وجهه مايجيب الخير
قبل العشاء بشوي صفو كلهم وبدو يعرضون بالسيوف
عبدالرحمن وابوه كانوا بالنص والانظار عليهم
بعدها انسحب ابوه ودخل فهد للساحه مع عبدالرحمن والكلام بدا يطلع بين الشياب
كلهم كانوا يلعبون فيه ببراعه وبشهاده الكل
بدا الوضع يصير مشوش خصوص ان الاغلب دخل معهم للساحه ويلعبون بالسيوف
بعد ما انهد حيلهم كلهم جاء العشاء وتجمعو عشان يتعشون
يتبع...
