اليوم الموعود...
من الظهر كان الكل صاحي ببيت ابو عبدالرحمن، الي بالمطبخ تزين حلاها، والي تتروش، والي يجمع الثياب والشمغ يكويها، والي تكوي فستانها معه وتتهاوش، والي نايم بسريره، والي واقف قلبها على رجل من امس ومو قادره تركز بالي بيدها، البيت كان مليان وبيمتلي اكثر، الجوهره ونايف بيجون بعد العصر يكملون عندهم النواقص، وسلطان نفس الشيء امه بتجي معه على طلب ام عبدالرحمن
خطبه عبدالرحمن ماكانت بتجي بالساهل، كل من كان يدري بزياد كان يدري انها مستحيل تجي بالساهل.
جود الي لاهيه بنفسها وشايله هم فستانها الي سلمته ل أرلين عشان تكويه لها واليوم ماعندها جامعه مع رهف وكان الوقت المناسب لهم ، وهي ماتدري انها تتناجر مع عبدالرحمن على الكوايه، ووتين من الحماس أغراضها جاهزه من امس، وابو عبدالرحمن الي نايم ومافيه حيل يقوم الظهر، وام عبدالرحمن بالمطبخ وقلبها طايح ومو قادره تركز بالحلا الي بيدها، الجده حصه؟ الجده حصه ماتركت سجادتها من صلت الظهر تدعي لهم بالتوفيق وان الله مايكسر قلب الولد والجد محمد جالس وراها ويرد بعد كل دعاء تدعيه بـ آمين
بطرف ثاني عند نايف والجوهره :
نايف : شلون يعني اوديه للمغسله؟
الجوهره بهدوء : دبر نفسك، خل سواليفك امس وسهرك ينفعك
نايف : حلو اختصرتي علي اوديه ابرك بدال ماتزيدين علي بالزعل
الجوهره بهدوء : يكون أفضل ماترجع الحين بعد، لين اخلص مكياجي بنفسيه حلوه
نايف : أوامر ثانيه؟
الجوهره بأبتسامه : Noo
طلع نايف من الغرفه وهو مو بالع نفسه، مايقدر يجاريها بالكلام لأنها صايره حساسه وبتبكي على طول، بيسميها حاليا بجواله " ام دميعه" ويتمنى انها ماتشوف الإسم
اما بالنسبه لزعل الجوهره منه، امس لما راحو البنات وهم من الأساس ما طولو عندها، هو قعد لين الفجر مع عبدالرحمن وسلطان، وتركها بالشقه لحالها لين هالوقت، ومايرد على رسايلها والي كان يقهرها اكثر انه يشوف الرساله بس مايرد، هي ماكانت تبي تطرده لكن عشان تكمل مكياجها من غير صياح عنده وهي عارفه انها لو بكت بيدخلها بأحضانه وبيعتذر منها وهي ماتبي توصخ ثوبه، كملت مكياجها وبشكل سريع لان مع باقي وقت على أذان العصر وهي واعده وتين تسوي لها مكياجها عشان كذا لازم تخلص بسرعه، كانت طربانه بالأغاني وتتمايل عليها
قبل الاذان بدقايق معدوده دخل نايف الشقه عشان يبدل ملابسه ويروح المسجد، وبسبب صوت الأغاني الجوهره ماسمعت الباب، دخل نايف الغرفه بهدوء ولمحها جالسه على التسريحه تزين اخر خصلات شعرها وببجامتها الحرير الورديه
ابتسم بخفه ونطق : بيأذن بعد شوي، طفي الاغاني، وبرجع من المسجد ونمشي على طول
الجوهره : طيب نيّوف خذ كيس فستاني معاك للسياره عشان على طول انزل ونمشي
نايف : ابشري
بدل نايف ملابسه لثوب واخذ ثوبه الجديد الي بيلبسه هناك وشماغه مع كيس الفستان، قبل جبينها، ونزل للسياره وحطها فيه وراح للمسجد
