ناظر عبدالرحمن رهف الي نايمه بعمق ورأسها لحد الحين على صدره، حب رأسها وابعدها بخفه عنه وقام وراح للباب وفتحه وكانت جود واقفه قدامه والواضح انها معصبه
جود بعصبيه : خير استاذ عبدالرحمن؟ قلنا ترجعها بدري ماقلنا خلها تنام معك
عبدالرحمن : جود اذلفي عن وجهي
جود : طلعها بسرعه قبل يشوفها جدي عندك بالغرفه
فتح عبدالرحمن الباب اكثر بحيث يبين رهف الي لسه نايمه : نايمه ومستحيل اقومها
جود : يا سلام؟
عبدالرحمن : خليها هنا انا بروح الحين عندي شغل
دخلت جود للغرفه وراحت للسرير : اذا سألك جدي ليش حنا نايمين بغرفتك دور لك اي عذر
سحب عبدالرحمن ثوبه من الدولاب وطلع من الغرفه وسكر الباب وراه وتركهم ينامون بغرفته
بدل ملابسه بغرفه جود ونزل تحت وشاف جده وجدته تحت ومعهم امه، حب روسهم وسحب شماغه الي كان بجانب جدته
عبدالرحمن : توصون شيء ولا شيء؟
الجده حصه : على وين بذا الوقت؟
عبدالرحمن : عندي شغل ولازم اخلصه بدري
الجد محمد : غرفتك مقفوله اليوم وطقيت عليك محد رد، وين كنت؟
عبدالرحمن بأبتسامه : تخاف علي؟
الجد محمد : مب عادتك تقفل الباب وانا ابوك
عبدالرحمن : مانمت بغرفتي البنات نايمين فيها، وانا نمت بغرفه جود
ام عبدالرحمن : اجل انت الي نايم بغرفه جود؟ بعذرها مقفوله
الجده حصه : وش منومهم بغرفتك؟
عبدالرحمن : السرير يوسعهم مايحتاج تنام رهف على الأرض واصلا كانو يشتغلون على الابتوب
الجد محمد بأبتسامه خفيفه : ما نأخرك عن شغلك رح خلصه وارجع بدري
كان بيطلع عبدالرحمن لكنه رجع ونطق : يمه نسيت اقولك سلطان اليوم بيجي على المغرب يقول بياخذ جود معه
الجده حصه : نطلعها معه ماعليك انت بس رح لدوامك لا تتأخر
طلع عبدالرحمن بعد ما حب روسهم واستمر يطلع من كل باب لين سكر باب سيارته بعد ما ركبها، بكج الدخان كان قباله..ماتردد يسحب له وحده من بينهم ويحطها بفمه ويشغلها، رايح هالمره للقسم عشان يحل موضوعه مع احد أفراد زياد الي مسكه مهند متلبس بالأمس، سلطان جاي لهناك بعد، يتمنى ان اعصابهم ماتفور هناك ويفصل عليهم مهند زي ما فصل على سلطان امس...
كلها نص ساعه ووصل للمركز، راح لمكتب مهند ودخله بعد ما سمح له مهند بالدخول،
لف عبدالرحمن انظاره لسلطان الي كان جالس على احد الكراسي قبال مكتب مهند، تقدم وجلس بالكرسي الثاني وبدأ مهند يذكر لهم الي صار امس
مهند : الي صار انه كان موجود حول بيتكم يا عبدالرحمن، والي اكتشفته منه ان العين لا على جود ولا على الجوهره
سلطان : كيف يعني؟
مهند : مجرد تشتيت لكم عشان تتناسون رهف من ضمنهم وان الخطر مو موجهه عليها، لاحظت مصداقيته بالحكي من شفت الصور اللي تنرسل لكم، صور البنات دايم واضحه لكن هي دايم مغبشه فيها، التهديد كان واضح انها هدفه من البدايه...
عبدالرحمن : إلى الآن مايمديك تلقي القبض عليه؟
مهند : أقدر اصدر أمر على هالشيء، لكن اذا على هذا الموضوع بيكون سهل خروجه...لكن في حل واحد اذا صار عندي ومسكه معي حمد بيكون سهل يبقى عندنا والدلائل تطلع عليه، بس هالشيء مارح يتم الا بواسطه رهف..
عبدالرحمن : كيف يعني بواسطه رهف؟ وش بتسوي مهند؟
مهند : انت مو قلت لي انه كان يهددها؟ والرسائل موجوده؟ خلاص ترفع قضيه عليه بتهمه التحرش والتهديد..والي بنحتاجه افادتها بالقسم عند حمد لا أكثر ولا اقل
عبدالرحمن : هالشيء مو بيدي لكن بكلمها بالموضوع
سلطان : وين الي مسكته امس؟
ناظر مهند سلطان بنظرات حاده خلته يسكت
مهند : ماخلصت كلامي، أفراد عصابته للمخدرات عرفتهم كلهم..5 أفراد معهم أساسيين، راكان آل*** يصير ولد عم زياد وناصر آل*** ولد خالته، رائد آل***، واخرهم فيصل آل***
عبدالرحمن بصدمه : فيصل موظف عندي..
تنهد مهند : اعرف..يسرق من الارباح مبلغ وقدره ويتاجرون فيه، رائد موظف في شركه عمي سعود بالحسابات بعد وهو كذالك يسرق منها، اما ناصر وراكان موظفين بشركة ابو زياد لكنهم ماياخذون منها ريال واحد..لان ابو زياد هو رئيسهم الخمسه كلهم من زياد والي معه
سلطان : ابو زياد؟ ومنهو ذا؟
مهند : عبدالله بن زياد آل***، او عفوا عمار آل***، احد أفراد منظمات المخدرات المعروفين، لكن ماله أثر من زمان، طلع متخبي بهويه مزيفه، او اقدر اقول ان الكل بهويات مزيفه وأسماء مزيفه لكن..
ابتسم إبتسامه جانبيه وكمل : لكن طلعناها كلها
فتح الدرج وطلع منها جميع النسخ من هوياتهم السابقه قبل تغيير اسمائهم وحطها على المكتب
عبدالرحمن بأبتسامه عريضه : والله الي كفو يامهند
مهند بنفس الابتسامه : ماخذيت رتبه نقيب بعمر صغير عبث
سلطان بأبتسامه : والله ماهقيتها منك أبد ذكي بسم الله عليك
مهند : مهيب صعبه على ولد الفريق متعب بن سليمان
سحب عبدالرحمن الهويات الي طلعها مهند وقرأ اسمائهم الحقيقيه والي صعق منها
زياد إسمه الحقيقي ياسر، وراكان مشعل، ورائد راشد، وناصر زايد، وفيصل عبدالمجيد
