بالمزرعه :
رهف : محد يرد ابد
ام وليد : الله يهديهم ويصلحهم
الجده حصه : يارب لاتوريني فيهم مكروه
جود : اميين ياربب
وتين : يمه اخاف جاهم شيء
رهف : لا ان شاء الله مافيهم الا العافيه
جود : يارب لاتفجعني بأخوي ياربب
ام عبدالرحمن : خير ان شاء الله! وش ذا الكلام!
ام سلطان : أهدي يا ندى أهدي
رهف : يارب احد يرد علينا بسرعه
وتين : ياربب
بالمستشفى :
فهد بعصبيه : صاحيي!!وش قاعد تقول انت!!
نطق وليد وهو يسحب فهد : العذر والسموحه منك
فهد بعصبيه : ولييد سامع وش يقول ذا!!
وليد : يكفيي! الكل متوتر محد ناقص لصراخك وعصبيتك
رجعو عند الباقي وعلى جيتهم كان في دكتور واقف عندهم
ابو عبدالرحمن : طيب وكيف حالهم الحين؟
الدكتور : الحمدلله سلطان وسلمان سليمين ولا فيهم الا العافيه بس اطرينا ناخذ وقت على ما نشيل الزجاج الي دخل بسلطان
الجد محمد : الحمدلله
الدكتور : سلمان وسلطان بيقعدون اليوم تحت الملاحظة وبالنسبه ل عبدالرحمن يمكن يقعد يومين ثلاثه
وليد : الزياره مسموحه صح؟
الدكتور : اكيد طبعا بس يحتاج عبدالرحمن مرافق لليومين هذي
ابو عبدالرحمن : ابشر
الدكتور : بأمكانكم تختارون المرافق متى ماتبون وأرقام غرفهم تلقونها عند الاستقبال
الجد إبراهيم : الله يعطيك العافيه
الدكتور : هذا الواجب ياعم، ابو عبدالرحمن عن إذنك ممكن تجي معي للمكتب؟
ابو عبدالرحمن : ان شاء الله
استأذن الدكتور وراحوا وهم بدورهم ردو على الحريم وطمنوهم لكن طالبو انهم يجون للمستشفى وراحو فهد ووليد عشان يجيبونهم
بالمزرعه :
كانو الحريم كلهم طالعين من المجلس وبعبايتهم ينتظرون جية العيال
رهف : لايطولون بس
الجده حصه : بسوطهم ان طولو
جود : عليك فيهم يجده
بعد ربع ساعة تقريبا ووصلو وتقسمو بسيارتين
بسياره فهد " الجده حصه، ام عبدالرحمن، جود، وتين"
بسياره وليد " ام وليد، رهف، ام سلطان"
انطلقوا للمستشفى وبعد مده بسيطه وصلو
دخلو وكان الكل بغرف الانتظار الا الجد إبراهيم كان مع سلمان بالغرفه ولحقوه رهف وام وليد ووليد
فغرفه سلمان :
دخلو وسلمت رهف وام وليد على الجد إبراهيم وراحت ام وليد وهي تحضن سلمان
ام وليد : الحمدلله على السلامه يمه
سلمان : الله يسلمك
رهف : خطاك السوء يا اخوي
سلمان بأبتسامه خفيفه : خطاك اللاش
الجد إبراهيم : اجل نتركم على راحتكم يله وليد
وليد : ابشر
طلع الجد إبراهيم ولحقه وليد بعد ما حب راس سلمان
رهف : يمه يقول وليد انه بيقعد اليوم يحتاج ملابس نجيب له؟
ام وليد : بروح انا ووليد نجيب لا تشيلين هم
سلمان : عاد يمه لاتبطون ثيابي كلها دم تقل ذابح لي احد
ام وليد : معليك بروح بعد شوي بس علمني كيف صار الحادث
سكت سلمان شوي ثم نطق : ابد والله كنا نتفقد الأغراض وطلعت لنا شاحنه معاكسه الطريق وصدمنا فيها وإلى الآن ما ادري وش صار للعيال
رهف : ان شاء الله كلهم بخير
سلمان : ان شاء الله
ام وليد : يله انا استأذنك يمه بروح اجيب لك ثيابك واغراضك، رهف عينك على اخوك ولا تبعدين عنه ابد
رهف : ولا توصين حريص يمه
طلعت ام وليد من الغرفه ومن طلعت رهف بدت تبكي بصمت
سلمان : افاا بس تبكين يا اخت سلمان؟
رهف ببكاء : شلون ماتبيني ابكي وكل الي صار كذا
سلمان : ابد من حقك حتى انا بكيت لين طيبت خاطري
رهف ببكاء : خايفه على الكل، مدري خالتي كيف بتتحمل تشوف ولدها كذا، وجود بتتقطع على عبدالرحمن
سلمان : عبدالرحمن اكثرنا أصابه
رهف ببكاء : تكفى لا تقولها
سلمان : القلبه من جهته عشان كذا هو أكثر الإصابات
رهف ببكاء : الله يطلعكم بالسلامة ياربب
قربت رهف وحضنها سلمان وهي دايم تلقى كتف سلمان امان بالنسبه لها ومستعد يسمع منهاو سند لها بعد الله سبحانه وابوها رحمه الله عليه
سلمان رغم صغر سنه الا انه واعي على كل شيء وكل كبيره وصغيره تصير
بغرفه الانتظار :
ام سلطان : سلام عليكم ورحمة الله وبركاته،اخبارك ابو عبدالعزيز
الجد محمد : وعليكم السلام والرحمة، الحمدلله على ما تحبين
ام سلطان : قالو لكم وين غرفه سلطان؟
فهد : تعالي معي يا خاله بوديك لها
ام سلطان : تسلم يا فهد
راحت هي مع فهد لغرفه سلطان
دخلت غرفته لحالها وفهد جلس على الكراسي وهو شبه دايخ صدمه عمه من قال لهم كلام الدكتور عن حاله الجميع
قال لهم الدكتور ان حاله عبدالرحمن صعبه خصوص ان في بعض الزجاج الصغير دخل في راسه وكان صعب عليهم يطلعونه بكل سهوله ويمكن يكون في مضاعفات كبيره تأدي ل غيبوبة
بالنسبه لسلطان كانت يده مكسوره وظهره كله جروح طفيفه وماكان يقدر يحرك رقبته ابد
والي صدمهم أكثر كلامه لسلمان انه ممكن يكون حاليا بصدمه لان هو الوحيد الي كان واعي وشاف الحادث كله وكان كثير عليه يشوفهم غارقين بالدم والسيارة مقلوبه والي جاه مجرد خدوش بيده
ماكانوا يقدرون يخاطرون بخروج سلطان وسلمان المبكر بحيث لو صار اي شيء مابين لهم لذالك تركوهم تحت الملاحظة ليوم واحد وعبدالرحمن كان تنويم لمده يومين
يتبع...
