مر أسبوع على الي صار..ومر هالاسبوع بشكل عادي على الجميع، لكنه كان يميل للهدوء عند الكل..
رهف وجود الي كانو يروحون للجامعه ويرجعون يذاكرون لـ اختباراتهم الشهريه الي اوشكو على نهايتها ويجمعون دبش رهف ويزينونه، عبدالرحمن وسلطان الي انغمسو بأشغالهم اكثر من قبل وانشغالهم كان يخليهم يتأخرون بالرجعه وهالشيء ماكان عاجب احد من اهلهم، وبالنسبه لطيور الحب..نايف والجوهره كانت أمورهم تمشي زي العاده مع شويه تجهيزات لعرس عبدالرحمن الي كانو يساعدونهم فيه..
اما بالنسبه لـ ام عبدالرحمن وام وليد..الي كانو يتأكدون من كل شيء، من قاعه العرس الي مابقى عليه الا 25 يوم..ومن تجهيزات البيت والأهم من هذا كله، نفسيه العرسان الي بدأ التوتر يوضح عليهم، جود مو مقصره تعطيهم كم باقي بالضبط وتزيدهم توتر وهم مو ناقصين اصلا كافي الي عليهم من ضغط
بيوم الجمعه، وتحديدا بعد صلاه الجمعه :
دخل عبدالرحمن بيتهم مع جده وابوه وهو دايخ ويبي ينام، لكن وصلته رساله من ماجد يطلب منه انه يجي لان في أوراق مهمه طلبها مهند وماتطلع الا بوجوده وفي أوراق لازم يشوفها اليوم
ام عبدالرحمن : يمه دحوم ليه ماتنام؟
عبدالرحمن : عندي دوام اليوم لازم اروح
الجده حصه : تغدا معنا وروح
عبدالرحمن : مقدر اقولك لا الشكوى لله
الجده حصه بأبتسامه : ادري بك يمه، يله روح وبدل وتعال مسويه لك اكل يحبه قلبك
صعد عبدالرحمن لغرفته وهو بس يتمنى يخلص اليوم على خير، بدل ملابسه ونزل وكان الكل جالس على السفره ابتسم من شاف تجمعهم الي يحب يشوفه..كل أفراد اسرته جالسين..جده على رأس الطاوله وبيمينه جدته وبيسار جده ابوه وبجنبه امه، وتين وجود بجنب جدتهم وهو راح وجلس بجنب امه بمكانه المعتاد، اكل اكله بسرعه كونه فعلا متأخر واليوم الجمعه والاكييد ان الطريق زحمه وبيتأخر اكثر
طلع من البيت بعد مابدل ملابسه، ركب سيارته ومشى، كلها كانت مسافه طريق ووقف سيارته بمواقف الشركه، نزل من سيارته ودخل
على الساعه 4:33 العصر، خلص عبدالرحمن شغله وكان باقي بس يسلم بعض الأوراق لسكرتيره مدير احد الأقسام كونه مو موجود اليوم
بينما كان يمشي عشان يسلمها الأوراق رن جواله وابتسم من شاف أسمها
عبدالرحمن : هلا
رهف : اهلين، مشغول؟
عبدالرحمن : لا أمري شبغيتي؟
رهف : ارسلت لك بس مارديت علي فا اطريت ادق عليك، انا طالبه ديكور من محل وبيجيبونه اليوم ترسل لي الموقع؟
عبدالرحمن : مافتحت الرسايل كنت مشغول شوي، بيجي اليوم هو؟
رهف : اي توه مكلمني يبي الموقع ومو عندي
مد عبدالرحمن الورق للسكرتيره ونطق : اتركيها على مكتبه وهو يشوفها بعدين
السكرتيره بغنج : تمام، عبدالرحمن اقصد استاذ عبدالرحمن في كمبيوترات تحتاج صيانه تقدر تكلمهم يجون يصلحونها؟
عبدالرحمن : خلاص بكلمهم يجون بكره
مشى من عندها ونطق : اي قلتي لي بيجي اليوم؟
رهف بغيض : اذا فضيت استاذ عبدالرحمن نكلمك..
سكرت الخط وهو منصدم من انقلابها المفاجئ ويجهل سببه
