بعد صلاة المغرب بالمزرعه :
رهف : يابنت الحلال روحي
جود : مارح اروح رهف بأي وجهه اقابله؟
رهف : تقابلينه عادي يله جود تكفين روحي ولا تخلينه ينتظرك اكثر
شدت جود على يدها ونطقت : والله لو اني ما اعرفه كان مارحت بس اعرفه يسوي الي برأسه لو يبي دخل هنا وطلعني
رهف : تخافين منه؟
جود : ما اخاف، بس ما ابي اروح له
رهف : تكفيين يله ابي اركب رعّد هالمره وانتي تقنعين سلطان يله جود لو سمحتي روحي له
تنهدت جود ونطقت : خلاص خلاص بروح بس ترى إذا صار لي شيء ياويلك
رهف : مايسويها سلطان لاتخافين
جود : مايسوي بس العصبيه تخليه يسوي
رهف : والله انك ظالمه اخوي مسكين
جود : والله لاظلمته ولا شيء هو كذا طبعه
رهف : طيب روحي الحين وشوفي يمكن عنده حكي خااص بينكم؟
جود : يارببيي رهف اسكتيي
رهف بضحك : تراه عند الاسطبل روحي له ولا تخلينه ينتظر يله
طلعت جود من عند رهف وراحت جهه الاسطبل بالمزرعه ومن وضح لها الاسطبل لمحته واقف ومعطيها ظهره، قربت بشويش ومن سمع خطواتها تقرب لف عليها وهي وقفت من لف
سلطان : اقربي
قربت جود وهي خايفه منه ونطقت : شبغيت؟
سلطان : لازم يكون في سبب عشان اناديك؟
جود بتوتر : اتوقع اي؟..
لف سلطان اناظره عليها ونطق بهدوء : صراخي عليكم اليوم كان بسبب ضغط الشغل، صح اول مره تصير بس ما اضمن وش بيصير بعدين
جود بأبتسامه خفيفه : اصلا كان من حقك تعصب علينا..يعني الي سويناه مو شويه ابد وعادي ضغط العمل متعوده عليه دايم عبدالرحمن يرجع ينفس علينا بالبيت ويرجع عادي
قربها سلطان منه وقبل رأسها وكان بيتكلم لو ان رهف مانطقت : تراضيتو خلاص؟
جود بأبتسامه : اي خلاص
رهف : بس اشوف لسلطان رأي ثاني؟ ها سلطان راضي الحين؟
سلطان : لا لي رأي ثاني ولا هم يحزنون، الحمدلله راضين
رهف بأبتسامه : يله اجل نتسابق جود؟
جود : نتسابق على؟
عبدالرحمن : الخيول، رهف بوتك
راحت رهف له بسرعه واخذته منه ونطقت بأبتسامه : معليش نسيته
شهقت جود ونطقت : شريتيه ولا علمتيني!
رهف بضحك : لا عندي من قبل
جود : برضو خيانه عندك ولا تعلميني خير
عبدالرحمن : نجيب لك واحد بس بشرط اذا فزتي عليها اجيب لك
جود : شوف حسب خبرتي يعني ودامني على رعّد جهز فلوسك من الحين
عبدالرحمن : نشوف
طلع لهم سلطان الخيول الي كانت موجوده بالمزرعه والي كانو بس ثنين "رعّد و برق" جود خذت رعّد ورهف خذت برق وكانو يتمشون فيها شوي لحد مايتعودون الخيول عليهم
سلطان وعبدالرحمن كانو واقفين عند السياج ويشوفونهم وهم يتجهزون لجّل السباق، كان الحماس واضح عليهم من بدا السباق بينهم وكان عبدالرحمن يشجع رهف وسلطان جود، مع بعض التشجيع لخواتهم لكن كانت منافسه شرسه بينهم ومحد يقدر ينكرها، ماقدر عبدالرحمن يكمل السباق ويشوف لحظه الفوز بسبب رسالته وصلته من وليد انه يبيه الحين وضروري فا أطر يغادر المكان، بعد دقايق بسيطه من مشى عبدالرحمن جاء ابو عبدالرحمن وقعد يناظر البنات ويشجعهم..كان سلطان يشوف نظرات الحب بعيون ابو عبدالرحمن لعياله كلهم، والحب الي بدأ يبين لرهف بعد، اذا اليوم ماقدر حتى يعصب على الي سووه واكتفى بتهديتهم رغم ان الموضوع كبير، تمنى للحظه لو ان ابو عبدالرحمن كان ابوه، ابوه غيير عن ابو عبدالرحمن بكثيير، مستحيل يتقارنون ببعض
بينما بطرف ثاني :
مهند : بعد بكره المحكمه ان شاء الله، ابلغ عبدالرحمن والباقي عليك
حمد : القرار بنسبه كبيره يكون قصاص، مهند هو له أتباع كثار مارح يتركون احد بحالهم
مهند : وبس يموت يختفون كلهم، رح وتوكل على الله ولا تشيل هم شيء
حمد : مهند انت تعرف بأخر قضيه تهريب وش جاك من وراها، تكفى لاتعيدها واطلع منها انا ادبرها
مهند : حمد انت تعرف اني انتظر هاللحظه من عمر طوييل وماتبيني احظره؟
حمد : انا اعرف انك مريت بالصعب وتبي هاللحظه بس مع هذا كله ما ابيك تروح للمحكمه وتحضر هاللجلسه
مهند : من وشو خايف؟ حمد مايجيني شيء من هذول افهم
حمد : قالوها من قبلك، وينهم الحين؟ علمني وين؟
مهند : انا منب زيهم ولا ممكن اكون زيهم
حمد : مايمديني اتناقش معاك بالموضوع ذا اكثر من كذا رأسك يابس ولا بتسمع مني ولا من غيري وبكيفك سو الي تبي
من بعدها طلع حمد من عنده وهو بكومه غضب من تصرفات مهند الي صار يستغربها كثير وخصوص بالقضيه هذي بالذات مايدري ليش هو هامته القضيه هذي اكثر من غيرها وليش مصّر على حضورها، رغم انه يعرف مدى الخطر الي ممكن يواجهه لو حضرها، ماتوقع ان ممكن هذاك الشيء يكون هو السبب مع انه تأكد انه هو نفسه..حاول فيه كثير انه ينسى هالموضوع من قبل ويقفل عليه بس مهند رأسه يابس ومايقتنع بهالشيء والي أكد له أكثر انه قدر ينطحهم كللهم بـ3 اسابيع، مو قصور فيه بس هو من قبل يدور عليهم وينتظر يطلعون له من اي مكان ويبدأ شغله معهم، طاحو بيدينه وخلاص مارح يقدر مهند يتراجع عن الي بيسويه...
بجهه ثانيه وتحديدا بقلب الرياض :
الجوهره : يعني بما ان عرسهم مره قريب خلني اخذه
نايف : ما أردك بس الحين هذا يمكن خامس فستان يعجبك من بينهم؟
الجوهره : نايف والله محتاره وش البس
نايف بأبتسامه : لو بتلبسين خيشه بتطلعين حلوه
الجوهره بأبتسامه : واهه نيّووف
قربها نايف له وقبّل جبينها ونطق وعيونه مليانه حب : ياعيونه انتي لبيه
الجوهره بخجل : لبيت حاج، بس تكفى اختار معاي لاتخليني احتار كذا
نايف : شوفي دامك محتاره انا اشوف نرجع ناخذ الأسود هذاك، راق لي شوي
الجوهره : صح الاسود ومنها بعد مايبين بطني كثير يله تكفى خل نرجع ناخذه
نايف : مانردك يله مشينا ناخذه
طلعو من المحل الي كانو فيه وراحو للمحل الثاني واخذت الجوهره الفستان وطلعت وهي سعيده، جايه تنقي لرهف هدايا عرسها والي ماعجبها شيء من عندهم وقررت تروح للرياض وتدور ولقت اشياء كثيره وحلوه واخذت منها، مع انها كانت سعيده اكثر لان نايف كان بجنبها طوال الوقت، اي مكالمه شغل ماكان يرد عليها اي معاملات اي شيء بشكل عام يخص شغله ماكان يرد او ينفذه، كان يحاول يكون معها بكل لحظه ويعيش إجازته صح
وبطرف ثاني بالديره وتحديدا ببيت الجد إبراهيم، كان الجد إبراهيم ووليد وعبدالرحمن جالسين بالملحق
وليد : جدي سمع من رهف ياعبدالرحمن وحنا نبي نسمع منك الحين..
عبدالرحمن : مع اني ماكنت ابيكم تتكلمون معها وبذا الموضوع خصوصاً لكن بما انها تكلمت فيه اعطيكم الي عندي
الجد إبراهيم : تكلم يابوك تكلم نسمعك
بدأ عبدالرحمن يتكلم عن كل شيء صار من بدايته ليين النهايه وكل شيء ذكره بالتفصيل الممل، من مسك رهف عند باب بيتهم بأخر الليل ومن طلعته لهم بالسوق وغير الرسايل والتهديد الي يوصلها وتتبعه لرهف بكل مكان، وذكر لهم اجباره على الزواج منه وذكر تفاصيل القضيه والي كان من ضمنها الصور الي توصل لهم والي كان الهدف من وراها رهف والي حتى رهف ماعندها علم فيها، ذكر لهم كيف اقنعها تروح وترفع شكوى بعد ما قال له مهند عنه، حرفيا قال كل شيء ماعدا جزء واحد من الأحداث الي صارت ولا حب انه يتكلم فيه لانه يعرف نهايته لو تكلم فيه..
وليد : عبدالرحمن انت الي سويته مع رهف يعني لنا الكثير ماقصرت ياخوك
عبدالرحمن : وليد هالحكي مايصير رهف الحين زوجتي ومن واجبي اني أوقف معها
الجد إبراهيم : عبدالرحمن انت قلت كل شيء اكيد؟
عبدالرحمن : اي ياعم هذا الي عندي والي صار
الجد إبراهيم : يابوك في شيء بالقصه ناقص ماقلته
وليد : جدي الموضوع ماله داعي ورهف قالت لك انها راضيه وخلاص
عبدالرحمن : عسى ما شر عمي؟ وش العلم الي واصلك ولاقلته؟
الجد إبراهيم بجديه : اسمعني يا عبدالرحمن، رهف قالت لي عن موضوع زواجكم وكيف صار وانه زواج على اساس حمايتها منه، انت كفيت ووفيت مع رهف ولا قصرت عليها بشيء، حميتها وكفيتها من شر زياد، والحين البنت بالحفظ والصون عندنا وانت شف حياتك بعيد عن رهف
نطق عبدالرحمن بعدم فهم بعد ماشاف ملامح وليد الي تدل على اليأس : مافهمتك ياعم؟ كيف يعني بعيد عن رهف؟
الجد إبراهيم بجديه : طلق رهف ياعبدالرحمن..
يتبع...
الله يتقبل منا ومنكم صالح الأعمال والله يستجيب دعواتكم باليوم الفضيل ولاتنسونا من دعواتكم ولاتنسون اموات المسلمين من دعواتكم 💗💗