بعد ربع ساعة تقريبا من التوتر بالسيارتين، وصلو للمخيم ونزلو البنات والأغراض الي معهم بجهتهم ووقفو سياراتهم مع باقي السيارات ونزلو، سلمو على الموجودين وعقبها جلسو
اما عند الحريم كانو جالسين يسوون الغداء، البنات كل وحده فيهم مسكت شيء وساعدوهم
جود : بنت احس اني ندمت ندم عمري اني قلت لأمي تخلي الأغراض حنا نجيبها
رهف : انا الي صدق كنت بموت، اليوم في كثير اشياء مو حلوه صايره معه
جود : هين انتي خالصين منك من زمان بس انا شايله هم نفسي، يارب ابوي هالمره ياخذني معه ياارب
رهف : بخلي جدي ياخذني دام الوضع كذا والله بالسياره شوي واصيح من الخوف
الجوهره : لا عاد تصيحين مره وحده؟ عبدالرحمن مايعض ترى
رهف بتوتر : ادري انه مايعض بس جريئ!
الجوهره : اي هو جريئ بزياده من زمان تعودي عادي
ضربت جود كتف الجوهره وقالت : ام سعود اسكتي لو سمحتي لاتخوفين زوجه اخوي منه
رهف : يمه ماتوقعته كذا اببدد
جود : عيب علييك ترى والله حنين بس تجيه فصله احيانا
الجوهره : احيانا؟
رهف دخلت بعالم أفكارها من بدا نقاش بين جود والجوهره، هي قاعده تفكر..ليش طول الـ15 دقيقه الي كانو فيها بالسياره ماتكلم ابد، مو من عادته مايقول لها شيء، وتصرفه معها بغرفته ماكان بالشيء السهل، هي تتوتر منه لاقرب وتخاف احيانا اذا كلمها، يمر عليها شريط قديم، يمر عليها وقت كان يتضارب مع زياد، كان شكله يخوف صدق، الا ان تعامله معها غير عن الي كانت تشوفه قبل، الشك كان يروادها، هل هو فعلا تزوجها كحمايه؟ او في سبب ثاني لزواجه منها؟
خلصو البنات من الغداء وارسلو صحن الرجال لهم وهم تجمعو على صحنهم وبدو ياكلون والسواليف تدور بينهم
ام عبدالرحمن : الا يا رهف حددتو موعد زواجكم؟
رهف : ها؟..لا لسه مابعد
وتين : غريبه امس دحوم يقول انه بيكلمك فيه وتخططون
جود : اكيد انه نسى ولا مالقى فرصه يكلمها
الجده حصه : خلو حفيدي وزوجته على راحتهم، لحد يستعجلهم على شيء
ام عبدالرحمن : واذا عبدالرحمن بغى العجلّه؟ يعني بعد شهر شهرين كذا
الجده حصه : ياكل تراب..مايمدي البنت تجهز شيء وشوله العجلّه ها؟
شرقت رهف بلقمتها وقت كانت بتضحك وطبطبت جود على ظهرها وشربت مويه وخف، كانت تناظر الجده حصه بوجهه محمّر، كيف فجأه قالت ياكل تراب وبنبره غريبه، وقفت بصفها على حفيدها، الله شعور ولا احسن منه
ام سلطان : جود امي كلي وراك ماتاكلين؟
جود بأبتسامه خفيفه : شدعوه خالتي والله قاعده اكل
الجده حصه بحّده : اي اي تاكل بذا الصحين الي مايوكل قطو حتى
جود بصدمه : ججدده والله اني اكل والله، والصحن كبير ترى
الجده حصه بحّده : شوفي الجوهره ورهف بسم الله عليهم ياكلون زين عشان يشبعون، مب انتم يا بنات عبدالعزيز كانكم عصافير ماتاكلون زين
ام عبدالرحمن : اوف اوف خالتي إسقاطات على ابوهم
الجده حصه : حتى هو الله يهديه ماياكل زين
جود : جده يعني يوم انك تقارنين الجوهره فيني؟ جده هذي تاكل حق اثنين ما شاء الله حقها وحق الي ببطنها، اما رهف ما افطرت انا اكلت بالبيت
الجوهره : لا إله إلا الله، ياخي خليني اكل حق ثنين ولا ثلاثه انا وحده حامل والي ببطني يتشرط زي ابوه مايعجبه العجب
ام سلطان بضحك : خليه بسم الله على قلبه
مدت جود بوزها ونطقت : اخوي بيصير عم قبلي، رهف مايمدي تحملين وتولدين قبلها؟
الجوهره : وجع! خليها تاكل الضعيفه كملي اكلك يله
ام عبدالرحمن : والله ياعليكم سواليف قليله أدب، ماتجوزون عن هالسوالف
الجده حصه : الله يخلف عليكم بس الله يخلف
مسحت ام سلطان على ظهر جود وقالت : خلوها تسولف لاتسكتونها، والله ان سواليفها توسع الصدر
ضحكت لها جود ومن بعد ضحكها الكل ضحك على تعزيز ام سلطان لها بحكم انها زوجه ولدها الوحيد
وبقسم الرجال الي خلصو اكل، تفرقوا بالخيام بحيث انهم بينامون شوي، يرتاحون على ما يأذن المغرب، بالخيمه الكبيره كان فيها الجد إبراهيم والجد محمد وابو عبدالرحمن وتركي، وبالخيمه الصغيره كان فيها عبدالرحمن وسلطان ونايف ومعهم سلمان ووليد الي نام وقت حط راسه على المخده
عبدالرحمن : مافيني نوم مع اني تعبان مره
نايف : انا ماقدرت ارقد امس زين
عبدالرحمن : والله امس طلعت ستين مشوار على هالمخيم واحس اني طفشت من الحين عليه
سلمان : كنت بجيب البلاستيشن بس جدي قال مافي شاشة
سلطان : كيف يعني مافي شاشه؟ اذكر فيه بالخيمه الي عند الحريم كنا نلعب فيها انا وعبدالرحمن لما نجي هنا
نايف : وهذاك قلتها، عــنــد الــحــريــم، يعني مايمديه يجي ويلعب
عبدالرحمن : يقدر عادي، الخيمه معزوله بس عيب يدخل هناك والحريم ماياخذون راحتهم وهم طالعين ينبسطون سوا، البلاستيشن لاحق عليه بالبيت
سلمان : افهم من سواليفكم هذي انكم مارح تنامون؟
سلطان : ماضنتي ننام وانا اخوك
مر الوقت بينهم والسواليف تروح تجي لين بدو ينامون حبه حبه
مر الوقت بسرعه والبنات يحسون انه بطيء لانهم طفشانين ومافي شيء يسوونه والشمس صافقه والنت ضعييف مره، حتى سواليفهم خلصت كلها امس ومافي سالفه يقدرون يفتحونها ونوم مايقدرون ينامون
جود : تبون نركب دبابات؟
الجوهره : اوفف بخاطريي اركبب مرهه
رهف : ونيوفك بيوافق؟
الجوهره : نقول ان شاء الله
جود : معليك انتي هذي تتدلع عليه ويوافق يجيب لها بس حنا من بيجيب لنا؟
رهف : كلمي جدك خليه يوصي احد يجيب لنا
جود : بس لازم نروح لهم هناك
راحت الجوهره يم السجادات وطلعت لهم جلالين وذبته عليهم وقالت : تطلبون 3 منه يله
جود بأبتسامه : قومي رهف يله
قامو ثنتينهم ولفو الجلال عليهم وطلعو من الخيمه ومشو يم الخيمه الكبيره بدون مايشوفهم احد
قربو للباب ولمحو بس جزمتين قدام الباب "الله يكرمكم" طلت جود من الباب وشافت جدها وابوها بس، سحبت رهف معها ودخلو للخيمه
حبت جود راس جدها وابوها ورهف سوت زيها
الجد محمد بعصبيه : الحين يالي ماتستحن وش جايبكم هنا ها!
ابو عبدالرحمن : يبه خلهم مابه احد وجلالاتهن عليهم، واكيد مب جايين الا يبون شيء ولا يا بنات؟
رهف : عمي حنا داخل طفشانين مره ومافي شيء نسويه
جود : جدي تكفى نبي دبابات تكفىى
الجد محمد : اعنبوك لاتقولين لي تكفى
رهف : عمي لاتردنا بس نبي 3
ابو عبدالرحمن : بس 3؟ يبه 3 بس وتردهم؟
الجد محمد بأستسلام : خلاص خلاص ارجعو داخل انا بكلم واحد من العيال يجيب لكم العدد الي تبون، بس ان شفتكم مره ثانيه هنا ياويلكم ياسواد ليلكم فاهمين!
رهف وهي تحب رأسه بأبتسامه : مشكوره عمي ماتقصر
الجد محمد بأبتسامه خفيفه : عاد انتي مرت الغالي ولد الغالي، مايهون علينا نرفض لك طلب
جود : وانا جدي؟ مو بنت الغالي؟
ابو عبدالرحمن : الا بنت الغالي ومرت الغالي بعد، سلطان غالي عنده، وبسك غيره من مرت اخوك مايصلح
الجد محمد : يله ارجعو قسمكم قبل مايجي احد ويشوفكم يله
طلعو البنات من الخيمه وهم ميتين من الوناسه، ماتوقعو الجد يوافق لهم على طول، دخلو الخيمه الي طلعو منها والبسمه شاقه وجيهم
رهف بفرح : وافقق واافقق
الجوهره : أحلفي!
جود بأبتسامه واسعه : والله واافققق، اخخ بنلعبب دباببب اخييراا
مدت الجوهره بوزها وقالت : اخاف نايف يكسر فرحتي ومايخليني اركب
رهف بأبتسامه ماتبشر بخير : عادي اذا ما وافق قولي له يركب معك وخلاص
جود : صح صح يركب معك
الجوهره بأبتسامه شرانيه : اجل خلاص بقول له يقول لهم يركبون معكم عشان ما اصير لحالي راكبه معه
رهف : حييوااننه!
الجوهره بضحك : والله اشكالنا بتطلع تحفه
جود : الا بنطيح من عيونهم! وش ذا رجال مركبين حريمهم معهم ولااا يسوق فيني قدامهم مستحييل اواافق ولا هو بيوافق اصلا
رهف : يارب ان كانها نذله وقالت له وقال لـ عبدالرحمن يااربب لاتخلييه يوافقق ياارببب
جود وهي ترفع يدها : اميييييييين ياارببب اميييييييين
الجوهره : اعنبوكم كلاب حطوها في راسي ولا عجبهم يصيرون هم بدالي
رهف : في فرق حبيبتي انتي لك سنتين وشوي متزوجه حنا زين لنا اسبوع وشوي مملكين
جود : الجوهره والله يكفي ان عبدالرحمن راميني الصبح معه بالسياره اوففف بنات والله خاييفهه مررره الله يقطع بليسك
رهف بهمس لجود : هي صادقه بتقول له؟
جود بهمس لها : حبيبتي الجوهره الي براسها تسويه ماهمها احد
بدا التوتر ياكل الثنتين طول الوقت وهم يحاولون بالجوهره تسكت وماتقول له يقول هالكلام
عند العيال :
مسك ابو عبدالرحمن عبدالرحمن وسلطان
عبدالرحمن : سم يبه شبغيت؟
طلع ابو عبدالرحمن بطاقته من البوك ومده له : تروح تدور للبنات دبابات، يبون ثلاث يله
نزل عبدالرحمن يد ابوه وقال : شدعوه يبه، انا اجيب لهم عادي مافيها شيء
ابو عبدالرحمن : خذها طيب
خذاها منه : بس والله ما احاسب فيها ترى، بعدين صدق كيف طلبو منكم؟
ابو عبدالرحمن : جو عندنا للخيمه وطلبو وقال لهم جدك تم ورجعهم هناك
سلطان : من الي جاء؟
ابو عبدالرحمن : جود ورهف، يبون 3 يعني اكيد زوجه نايف تبي معهم، عجلو عليهم تراهم طفشانين
مشو الاثنين سوا وسحبو سلمان معهم، كان حولهم في خيمه لرجال يبيع دبابات راحو له وخذو من عنده 3 زي ما قال لهم ابو عبدالرحمن ورجعو فيه
وقت البنات سمعو اصوات الدبابات ناقزو من الفرحه وجتهم ام عبدالرحمن وهي تقول : ولا تبعدون واجد فاهمين
جود : ابشري
طلعو لهم هناك بس وقفهم صوت نقاش عبدالرحمن ونايف
نايف : عبدالرحمن اخلص كم دفعت عليه؟
عبدالرحمن : ماني قايل لك وخلهم يركبون الحين ويستانسون لو سمحت لاتنكد عليهم
نايف : مردك بتعلمني
راح نايف ولمح عبدالرحمن البنات واقفين ينتظرون، من شافت جود ان مافي احد راحت له وحضنته وهي تقول : مرره شكرا دحوميي
حب عبدالرحمن راسها : يله استانسو، ولا تبعدون واجد وترى ماحولكم احد، عندكم ساعه كامله الحين يله
ركبو البنات دباباتهم وانطلقو بأرجأ البر والوناسه تعمهم، كانو مره يتسابقون ومره يعيشون أجواء انهم يسوقون سياره ويفحطون فيها، كانو مانعين الجوهره تسوي زيهم عشان ماتطيح وتنقلب ويصير بالي ببطنها شيء
بهذي الساعه كانو كل الرجال جالسين بالخيمه الكبيره والي زاد عددهم بزياد الي جاء بعد ما مشو البنات بالدبابات، عبدالرحمن من وقتها وهو يحس ان جيته هنا اصلا ماتطمن، كان رافض انه يجي بالبدايه بس فجأه جاء بدون سبب؟ ماينكر انه حس بشك، لو تأذت شعره وحده من رهف يمكن يذبحه وهالشيء عادي عنده، مايضمن نفسه لكن يضمن ان في احد بيوقفه
رجعو البنات بعد ساعه ووقفو الدبابات بجهه ودخلو للخيمه مع باقي الحريم وقعدو يقولون لهم عن الي سووه هناك وجاهم عتب من ام سلطان والجده حصه، على انهم كيف سمحو ياخذون الجوهره بمكان زي هذا لحالها
يتبع...