قامت نوال بعصبيه وهي تتقدم لـ الجوهره ناويه عليها، وقفت الجده حصه بطريق نوال ونطقت وعينها على الجوهره : وش السالفه؟
مسكت وتين يد جود ونطقت بخوف : جده، خاله نوال وإيمان مكلمين رهف بالمطبخ، وشفت إيمان تمد يدها على رهف
وقفت ام وليد وهي تطالع إيمان : مديتي يدك عليها؟
قربت الجوهره اكثر وسحبت شعرها وهمست بأذن إيمان : ومنتي كفو تتزوجين عبدالرحمن، وان كان في راسك شيء ولا شيء اعرفي ان محد بيوقف معك، حتى امك..عمه حصه توقف قدامها ولا لها كلمه، لا علي ولا على البنات
قربت رهف من الجوهره وحاولت تفكها عنها بس بدون جدوى، كان صراخ إيمان عالي وهي تطلب منهم يفكون الجوهره عنها، لكن الجوهره كل مالها وتشد عليها اكثر وتهمس بكلمات مجهوله
كانو كلهم متجاهلين اصوات الرجال الي كانت تسأل وش الي صاير، الجد إبراهيم مايدري وش الي صار ووش اسباب هالصراخ وليه متجاهلينهم؟ والجد محمد كان معصب سامع اصوات صراخ نوال ولا وده يكرهها اكثر من الكرهه الي فيه لها، نايف شايل هم أكثر منهم يسمع صوت الجوهره وينادون بأسمها كثير ومايدري وش الحاصل، أما سلطان وعبدالرحمن واقفين وراهم ويحاول عبدالرحمن يتصل عليهم بس مافي رد منهم، وابو عبدالرحمن قلبه وصل بطنه من سمع اصوات بناته وهم يصارخون، وابو فهد؟ واقف مكانه بعييد عنهم كلهم يدري ان زوجته سوت شيء كايد داخل.
حاولو فيها تفكهم لين تمردت نوال وسحبت شعر الجوهره من ورا عشان تفك بنتها بس ماحسبت حساب جود الي ردتها وهي ماقدرت تتوازن بالكعب وطاحت
سحبت ام عبدالرحمن جود بجنبها وقت قامت نوال ونطقت : انتي جود تمدين يدك عليي!
الجده حصه بحّده : نوال اكسري الشر
نوال : ترضينها علي يا خاله!! بزر تمد يدها على الي اكبر منها!
جود بصراخ عالي : لاترفعيين صوتك على جدتي لا اقطع لك لسانك فاهمه!!
إيمان بعصبيه : وانتي بعد لاتنافخين على امي!
جود : لا والله؟ لك وجهه تتكلمين هاا! والله مو انتم الي توقفون بوجهه اخوي وتخربون عليه فرحته، مابقى الا انتي ياخذك زوجه، قطع
ام عبدالرحمن : وش قصدك جود؟
نطقت جود وهي تطالع نوال : الأخت تقول لرهف انها مارح تتهنى مع عبدالرحمن لانه بياخذ إيمان على قولها
ام عبدالرحمن بعصبيه : صحيح هالكلام يانوال؟
نوال : تبلو علي هذا الناقص!
رهف : لا والله ماتبلو عليك، هذا الي قلتيه لي بالمطبخ قبل ادخل أملك..ولعلمك بنتك مالها نصيب لعبدالرحمن
وقفت نوال وسحبت شنطتها ويد إيمان وطلعت وهي تدق على ابو فهد عشان يرجعهم للبيت، اما الباقي قعدو واقفين ومتصنمين، محد قدر يستوعب الي صار وساكنين مكانهم بدون حراك، وقفت عقولهم من طاحت الجوهره على الأرض وهي ماسكه بطنها وتصارخ
هرعو كلهم لها وهم يهتفون بأسمها، وهالشيء خلا نايف يزيد بجنونه وهو ميت من الخوف
نطقت الجوهره بألم وتشد على بطنها : خاله ولدي، طقتني ببطني يا خااله اخخ
ام عبدالرحمن بخوف : سمي بالرحمن سمي بالرحمن، مافيك الا العافيه ان شاء الله مافيك شيء وولدك محفوظ
رهف بخوف : وش نسوييي
الجوهره بألم ممزوج بدموعها الي نزلت : نايف نادو نايف تكفون
وكملت ببكاء وصراخ : نااييففف بطنييي ياا ناييفف الحقنيي
وقتها رهف قامت بسرعه وسحبت طرح عشوائيه من العبايات المعلقه وعطتها البنات من سمعت صوت نايف وهو يقول بدخل، وما أمداهم يغطون شعورهم الا ونايف داخل من الباب الي يفصل بينهم وبين الصاله، دخل وهو صادد عن الحريم وهم بعدو عن الجوهره
غطاها نايف بشماغه ونطق بسرعه : عبايتها، جيبو عبايتهاا!
قامت جود بعد ماسترت نفسها وسحبت عبايه الجوهره من المعلاق ورمتها عليه من بعيد، سحب نايف العبايه ولفها عليها بس ونطق بصوت عالي بعد ما شال الجوهره بين يدينه : سلطاان السييااره!
جود بصوت جهوري : استنوني بجي معكم
ام عبدالرحمن : روحي يمه روحي لاتخلينها
سحبت جود عبايتها ولبستها بسرعه وتغطت خذت شنطتها وشنطه الجوهره وطلعت ركض ورا نايف الي طلع للسياره مسرع، ركبت السياره مع الجوهره ورا وسلطان ونايف قدام، جود كانت متناسيه من الي معها بالسياره ومو منتبه اذا عادي تركب معهم ولا لا، كل الي براسها حاليا الجوهره..اذا هي بخير فهذا يكفيها، ومن سابع المستحيلات تجلس هناك وتنتظر وتتركها لحالها
اما عند الحريم كلهم جلسو وهم يحاولون يتداركون الموضوع وام عبدالرحمن برا تكلم ولدها عن الي صار
عبدالرحمن : يعني هم في روسهم اني بتزوج إيمان؟
ام عبدالرحمن : اي ومكلمين رهف على هالاساس
عبدالرحمن : حصل خير ان شاء الله..يمه على دربك تنادين لي رهف هنا؟
ام عبدالرحمن بأبتسامه خفيفه : ان شاء الله
دخلت ام عبدالرحمن ونطقت اول ماجت عينها بعين رهف : رهوف حبيبتي، عبدالرحمن يبي يكلمك برا
ناظرت رهف امها لثواني وقامت لتطلع له
نزلت الدرج الي عند الباب الخلفي وكان يعطيها ظهره وعلى جواله ما انتبه لها، تقدمت بخطواتها له، دوى صوت كعبها بمسامعه ولف بخفه ولمحها، سكر جواله وحطه بجيبه ولف لها
ناظرته رهف وقت لف وجت عينها بعينه ونزلتها بسرعه ونطقت بخفه : شبغيت؟
عبدالرحمن بأبتسامه خفيفه : مانتطمن عليك يعني؟
حست رهف بجسمها كله يبرد ونطقت : إلا عادي..
عبدالرحمن : شخبارك الحين؟
رهف : الحمدلله احسن
عبدالرحمن : يعني صحيح الي انا سمعته من امي؟
رهف بأندفاع : انا ماتعرضت لأحد هم تعرضو لي على فكره
ضحك عبدالرحمن ونطق : اعرف اعرف انهم تعرضو لك، امي قالت لي وحبيت اتأكد منك
نطقت رهف بعد سكوت : طيب عندي سؤال
عبدالرحمن : اسألي
نزلت راسها وقالت : ليش ملكت اليوم، مو المفروض إنها خطبه وبس لين يكنسل زياد الوضع؟
عبدالرحمن : لا تشيلين هم كل شيء ماشي تمام، وإذا على الملكه لاتخافين، ملكت عشان تتسكر كل الأبواب بوجهه ومايقدر يتعرض لأحد
تنهدت براحه وقالت : الحمدلله انه خلاص مايقدر يسوي شيء
عبدالرحمن ابتسم بخفه ونطق : انا سمعت منك كلمه وقت الهواش وللحظه حسيت إنها عاجبتني، طالعه من قلبك؟
حطت رهف عينها بعينه وقالت بعدم فهم : اي كلمه؟
عبدالرحمن : ولعلمك بنتك مالها نصيب بـ عبدالرحمن، عاجبتني هالكلمه كثير رغم إنها عاديه
حست رهف بخدودها تحترق وقت تذكرت الي قالته وتذكرت لوهله ان الرجال برضوا سمعوها نطقت بخوف وبسرعه متناسيه خجلها منه وقربت منه : كلكم سمعتوني؟؟
عبدالرحمن : نقول إيه اصواتكم عاليه شوي
رهف : عبدالرحمن أمانه لاتكذب علي كلكم سمعتو؟
عبدالرحمن : لا لا محد سمع الا نايف وابصم لك بالعشر ان عقله ماكان معه
تنهدت رهف براحه ونطقت : الله يبشرك بالخير
وقتها سمع عبدالرحمن صوت زياد وهو يكلم بجواله وصوته يقرب منهم، ماتردد لحظه وحده انه يسحب رهف لحضنه، هي مو مستوعبه الي صار، فجأة صارت بأحضانه، نطق هو بصوت خفيف : زياد ورانا، ما ابيه يشوفك عشان كذا خليك ولا تتحركين..
ابتسمت رهف بخفه لكن ما امداها تكمل ابتسامه لما سمعت صوت زياد وهو ينادي عبدالرحمن، حطت يدها على يده الي تحاوط كتفها وشدت على كم ثوبه، حس عبدالرحمن بخوفها من نبره زياد الي يحس انها تسبب لها أزمه
عبدالرحمن : انا جاي الحين، اسبقني وبجي
من حس ان زياد دخل ناظرها وهي تحاول تخبي نفسها بحضنه اكثر خوف انه يشوفها
نطق عبدالرحمن بنبره هاديه : ارجعي داخل الحين، ان شاء الله مافي الا كل خير
ناظرته رهف لثواني وراحت ركض للباب ودخلت
بالطرف الثاني من الديره، بالمستشفى تحديدا عند بقيه الأبطال، ثلاثتهم واقفين عند الباب ينتظرون الدكتوره تطلع، نايف مو حاس بنفسه ابد ولا يحس بسلطان الواقف بجنبه، سلطان كان كل 5 دقايق يلف يتطمن اذا جود واقفه وراهم ولا لا، وكان كل ما لف عليها شافها شاده على شنطه الجوهره الي بيدها، مايقدر يشوف عيونها من الغطوه الي عليها، ما امداها تسحب نقابها معها من العجله، كان يحس بيدها ترجف لكن كل ما لف عليها يحسها تتجنبه، تنزل رأسها اذا لف، تنهد وقت سمع صوت الباب ينفتح
هرع لها نايف وهو يسأل عن الجوهره وهو لا ارض تشيله ولا سماء، قربت جود منهم عشان تسمع الي بتقوله الدكتوره لهم
الدكتوره : هي حاليا.....
يتبع...
هذا البارت اخر شيء حينزل اليوم، وباخذ لي فتره راحه اجمع لكم فيها بارتات مع ان في بارتات كثير جاهزه بس لسه مابعد نزلتها ولا افكر انزلها هالفتره، نزلت هذا عن خاطركم وماحبيت اردكم وتستاهلون 🤍🤍