................
( ف الحلقات السابقه )
احمد : ( بيبص لأمه بخباثه كده وبيطلع التليفون وبيتكلم قدامهم بصوت زى ما يكون عاوز يسمعها ) الووو !
ايوه يا كراميلا ! جهزتى ولا لسا ؟
طيب يلا ! عشر دقايق هودى اخواتى مدارسهم وهعدى عليك نروح سوا ..
ام احمد : ( عامله مش واخده بالها وبتجهز ف سندويتشات البنات وكاتمه ضحكتها بالعاااااافيه )
احمد : فيه حاجه ؟
ام احمد : سلامتك يا ابا ! سلامتك يا حبيبى
.......................... ( الثانيه ) ❤
( بعد ما احمد بينزل هو واخواته )
ام احمد : ( بتتصل على سلمى )
سلمى : ( بتبص ع التليفون بتلاقى ام احمد اللى بترن بتقوم مفزوعه وبترد بسرعه ) الو !
ام احمد : يا صباح النور ع البنور !
سلمى : صباح الفل يا حبيبتى .. ايه ! فيه جديد
ام احمد : انتى رايحه الجامعه النهارده ؟
سلمى : اه ! هو فيه حاجه ؟ طمنينى والنبى
ام احمد : بصى ! صحصحى كده واغسلى وشك وكلمينى وانتى نازله ! عشان هقولك على كم حاجه كده
سلمى : تمام اشطا ! احمد نزل ولا لسا عندك
ام احمد : اه نزل يوصل اخواته مدارسهم وهيروح الجامعه ..... فوقى انتى بس ورنى عليا اما تخلصى !
سلمى : ماشي يا حبيبتى . انا مش عارفه اشكرك ازاى ع اللى بتعمليه معايا ده
ام احمد : تشكرى مين يا عبيطه انتى ! انتى زى بنتى يا سلمى ومافيش ف الدنيا حاجه تهمنى اد مصلحتكوا ... خلصى ورنى عليا
..................
( ع القهوه )
مصطفى : ايه يا شقيق ! بتعمل ايه
احمد : مستنى خلقتكوا انت وهو ! العيال اتأخروا ليه
مصطفى : جايين ورايا اهو !
احمد : العيال بتوع المنصوره مش ناويين ييجو لسا ؟
مصطفى : لا كلمتهم امبارح وقالولى كمان اسبوع او اسبوعين ! وراهم شغل هناك
احمد : ومالك ومجدى ؟
مصطفى : جايين الاسبوع الجاى بردو ! لسا الدنيا ماشتغلتش ومافيش حاجات مهمه يعنى بناخدها . احنا بنروح الجامعه نفك عن نفسنا شويه مش اكتر
احمد : على رايك !
مصطفى : المهم ناوى على ايه ؟ وشكلك كده مستنى حد غير العيال
احمد : اه فعلا
مصطفى : مين ؟
احمد : البت شهد !
مصطفى : يا مرسي يا ابو العباس ! شهد مين ؟ اوعى تقول اللى ف بالى
احمد : هى !
مصطفى : يا نهار ازرق ! وهتخش بيها الكليه كده عادى قدام البنات
احمد : ( بيرفعله حاجبه ) ليه ؟ فيه مشكله ؟
مصطفى : مش مشكله !
احمد : بص يا درش ! انا بتعامل مع اقوى جهاز مخابرات ف العالم . ومشغل جواسيس ف كل مكان ! دى مشغله أمى بجلالة قدرها جاسوسه عندها
مصطفى : هههههههههههههه هفطس ! امك شغاله جاسوسه لحساب سلمى ؟
احمد : اه ! حاسس انى يهودى يا أخى !
مصطفى : هههههههههه ! وبعدين ؟
احمد : ف انا بقي دلوقتى هلعب ع الجنبين ! على امى وعلى سلمى ! هخليهم ماشيين يكلموا نفسهم ! والأهم من كده انى هخبطهم ف بعض هههههههههههه يعنى انا مثلا دلوقتى اوهمت امى انى هروح الجامعه ومعايا كارمن ! ف طبعا امى هتكلم سلمى هتقولها خلى بالك وماتتنرفزيش وخليكى تقيله ولو لقيتى احمد بيكلم كارمن او غيرها خليكى بردو تقيله وهو عاوز يغيظك والكلام ده ! لما سلمى تلاقينى داخل الجامعه ومعايا واحده تانيه خالص وبالخصوص شهد ! دماغها هتعمل ايرور كده ومش هتبقي عارفه هى هتعمل ايه ! هضرب ع الحديد وهو سخن ... يابنى انا ناوى اطلع عليهم كل اللى حصل معايا الشهرين اللى فاتوا .. بس وحياة امك لو لقيتك يا اهطل انت قايل لحد او حد عرف اللى بقولهولك ده لنا مطلع ميتين اهلك
مصطفى : لا ياعم عيب عليك .. مش غبى انا بردو
احمد : اتنيل ! بس بردو هتعرف بعدين انا ليه قولتلك انت بالذات ؟
مصطفى : داهيه لاتكون بتستخدمنى ! وعاملنى طُعم زى مانت عامل أمك طُعم
احمد : هههههههههههههههه حبيبى يا ديشه ! احبك وانت عامل فيها بتفهم كده
مصطفى : يابن الجنيه !
احمد : منا قولتلك ! انا هاخد حقى . تالت ومتلت ... ومنكوا انتو كمان
مصطفى : منكوا انتو كمان اللى هما مين ؟
احمد : انت والعيال ! يابنى انا مابنساش حق كان ليا ف يوم .. وايامكوا اللى جايه هباب .. بس ع الهادى واحده واحده
مصطفى : ربنا يوجع بطنك ! قوم ياعم نمشي العيال جات
احمد : اسبقنى انت ! انا هجيب شهد وجاى !
مصطفى : ممكن سؤال ! اشمعنى شهد ؟
احمد : لأن سلمى عارفاها ! ومابتقبلهاش ! واكتر من مره كانو هيشبطوا ف بعض ! ف انا بقي هجيب النار جنب البنزين ! وهتفرج !
مصطفى : ( بيرفعله حاجبه ) ماشي يا هندسه !
...............
( ف عربية سلمى )
سلمى : استنى بقي يا ساره اما ارن على امه ... عشان معرفتش اكلمها فوق .. مامى وبابى كانو مركزين ممعايا اوى النهارده مش عارفه ليه .. الو !
ام احمد : الو !
سلمى : ايه يا ست الكل الاخبار .. ماتاخرتش عليكى اهو
ام احمد : تمام ! انتى فين ؟
سلمى : انا رايحه الجامعه اهو . ايه الدنيا ؟
ام احمد : بُصى يا سلمى !! أي حاجه يعملها احمد النهارده عديها .. خليكى تقيله .. هو هيتجاهلك .. وهيخليكى تغيرى وهيكلم مع دى ومع دى قدامك عشان يرفعلك ضغطك . وهييجي مع كارمن ويخليكى تغيرى وطبعا هيستنى منك انك تتعصبى ويضايقك ومعرفش ايه .. فاهمانى ؟
سلمى : ههههههههههه اه فاهماكى ! كملى يا طنط سامعاكى
ام احمد : احنا بقي ايه ؟ نتقل ومانعبروش ولا يفرق معانا اصلا اللى هو بيعمله .. لما هيلاقيكى مش سائله فيه ومش فارق معاكى انه يتكلم مع فلانه ولا علانه طبعا هيتضايق .. وهيحاول يفهم انتى مالك ومش بتضايقي ليه ؟ وهييجى يشوفك كده .. تقومى انتى بقي ايه ... تقولى اللى عندك بقي وانه كان من حقك اللى عملتيه ... واوعى تقوليله انك ندمانه ع اى كلمه قولتيها ساعتها .. بالعكس !! عاوزاك تقوليله لو الموقف اتكرر واتحطيت ف نفس الموقف هقول نفس اللى قولته ومش هسامحك !
سلمى : تصدقى وتؤمنى بالله ! انا بحبك يمكن اكتر ما بحب ابنك ده هههههههههههههههه ربنا يخليكى ليا ومايحرمنى منك يارب ! واغمض عينى وافتحها كده الاقي نفسي بقيت مرات ابنك ! لان مش هلاقى حما زيك يا حبيبتى
ام احمد : يا سلمى ربنا وحده اللى يعلم هو ليه حط معزتك وغلاوتك عندى ف قلبى زى معزة عيالى بالظبط ! ربنا يحلى ايامكوا يا قلبي وتعيشوا متهنيين ومبسوطين العمر كله .... يلا ورينى شطارتك بقي
سلمى : اشطا ! باى باي يا حبيبتى
..............
( ع القهوه )
كريم : عاوز منك خدمه يا ابو حميد
احمد : عيونى يا كيمو !
كريم : كنت مزنوق والله ف حوار كده عارف انك انت اللى هتخلصهولى بس لما تيجى م الجامعه بقي وعلى خير عشان شايفك مشغول
احمد : قول ياض ماتبقاش تلح ! فيه ايه ؟ ايه الحوار
كريم : شويه عيال ولاد حرام كل يوم يدبئوا البت سحر اختى وهى رايحه المدرسه بتاعتها ويفضلوا يرزلوا عليها .. وانت عارف سحر اختى دمعتها قريبه .. وبقالها يومين مابتروحش المدرسه من خوفها م العيال دول ! وانت عارف بقي دى تالته ثانوى ومالناش حد ! وزى مانت عارف انا بصرف ع البيت
احمد : رنلى عليها !
كريم : اما تيجى بقا من جامعتك يا كبير
احمد : جامعة ايه ! رنلى على سحر يا كريم واخلص
كريم : حاضر يا كبير . هجيب التليفون من جوه !
..
كريم : الو ! خدى يا سوسو حمو عاوز يكلمك
سحر : حمو ! خير !
احمد : الو !
سحر : ايوه يا حمو !
احمد : دقيقتين بالظبط الاقيكى جهزتى ولبستى . هعدى عليك انا واخوك هنوديك المدرسه ... ومش عاوز لت وعجن كتير واخلصى بدل ما اعلقلك اخوك ده ف القهوه
سحر : هههههههههههههه حاضر .. اقل من دقيقتين !
.......
كريم : ربنا يزيدك من نعيمه ويخلف عليك بصحته وعافيته ! يا غالي يا بن الغاليين
احمد : وتانى مره يا حمار اما تبقي عاوز حاجه ابقي اطلبها ! احنا مش عشرة يوم يا كريم ! شوف الواد طارق فين قعده مكانك لغاية ما نخلص مشوارنا
عشان هنعمل لاختك داخله ف المدرسه هناك هتخلى العيال دى ماتهوبش ناحيتها تانى ولا يمشوا م الشارع اللى هتمشي فيه !
...................
( ف الشارع اثناء ما احمد وكريم وسحر ماشيين على مدرسة سحر اللى ف اول الشارع من بره )
احمد : زعلان منك يا سحر على فكره !
سحر : لا والنبى ما تزعل ! انت عارف انك غالي علينا كلنا
احمد : لو غالي عليك ماكنتيش هتستنى او تخبى علينا حاجه زى دى ! احنا اهلك يابنتى ! وكريم بكره يبقي راجل ملو هدومه زى ماهو راجل دلوقتى وبيصرف عليكو وعلى نفسه ! بس كريم لسا صغير يبقي ايه بقا .. تيجى لاهلك واهل منطقتك ياخدولك حقك من كل كلب جبان عاوز يقرب منك ! الدنيا لسا فيها خير يا ست البنات .. وحقك علينا انك تمشي مرفوعة راسك مش منكسره وخايفه ... نروح نلبس احنا فساتين ونحط مكياج بقا لو فيه بنت من حتتنا خافت وهى وسطينا ! صح ؟
سحر : انا عارفه ! بس خوفت ! العيال مركزين معايا
احمد : مش معاكى انتى بس والله ! هما عاملين زى الكلاب الجعانه عاوزين ينهشوا اى حد ! بس احنا جنبك وحواليك ... تعاليلنا واحنا ناخدلك حقك .. ولا ايه يا كيمو
كريم : والله من امبارح بقولها هقول لاحمد هو اللى هيخلص الحكايه قالتلى لا .. خلى احمد ماتقولوش دى دماغه لسا مفتوحه
احمد : عادى ماهى دى الدنيا ! وبعدين احنا اخوات ! .. كنت انا ف تالته ثانوى وانتى لسا كنتى داخله اولى ! يعنى من سنتين اهو مش بعيد
سحر : احممممد ! شايف العيال اللى هناك دول ؟ اللى راكنين ع العربيه الربع نقل دول
احمد : اه ! هما دول بقا الكتاكيت ؟
سحر : ( بتخاف وبتترعش ) اه هما !
احمد : ( بيمسك ايديها وبيطمنها وبيبتسملها ) اتفرجى بقي عليا انا واخوك واحنا بنلبسهملك طُرح .. تعالى معانا وامشي يا بت ... يلا يا كيمو
..
احمد : مساء الفل يا شوية خواجات منك ليه
فاروق : ايه الدخله دى ياعم البعبع ! انت جاى منطقتى تهتنى ولا ايه ؟
احمد : لا انا مش جاى اهتك ! انا جاى أعلم عليك هنا وسط الناس بتوعك ! عشان اللى يقل مع واحده من سيدى بشر .. يبقي قَل مع سيدى بشر كلها ! انت يالا انت وشويه الزباله اللى معاك دول مالك ومالها ؟ ومالك ومال كل البنات اللى ف المدرسه ؟
فاروق : مالكش فيه ... وخد الكتكوت اللى معاك والسنيوره وامشوا بدل ما هعلم عليك قدامهم وهيبقي شكلك انت اللى وحش !
احمد : ياريت ترضى ... ياريت والله عشان انا بخاف ! ( بيمسكه من التيشرت ) بص يا روح الغاليه ! ودى ناهية الحوار عشان ماليش ف لَت النسوان .. هشوف ديل كلب منكوا هنا ف المنطقه تِما ههينه وهزعله ! وهزعل اللى هيتشددله ! والكلام ليك وليك وليك ... امين يابا ؟
فاروق : انت اد المسكه دى يا حيلتها .. ( بيشد ياقة التيشرت بتاعى احمد )
احمد : ( بيكومه على الارض وبينزل فيه ضرب برجله .وبيقلع حزام البنطلون وبيكمل فيه ضرب .. العيال بتيجى عشان تكمل خناقها معاه ... بيرفع خشبه من جنبه برجله وبيلوش عليهم .. ) ارجع ياحيلتها انت وهو ! وخد الامور بتاعك ده ويلا من هنا ! يمين بالله .. وده قسم قدام المنطقه .. اللى هيتعرض للبت دى . هى او اى بنت تانيه م المنطقه لهنساويها بالارض ! ... قوم يلا غور يالا !
امير : ( جار احمد ف المنطقه واللى بيشوفه بييجى يسنده ف الخناقه ) ايه ياحمو .. الكلام على ايه ؟ العيال دى عملت ايه
احمد : لا دا الحوار خلص يا امير ! بس كويس انك جيت عشان تبقي شاهد ع الكلام !
امير : وانا معاك يا صاحبي ..قوم ياض انت وهو ياض ! فاكرينها ميغه ياروح امك انت وهو ! يلا ياض قوم !
............
احمد : يلا يابت على مدرستك ! وارفعى راسك . ماتخافيش
سحر : والله العظيم انت تستاهل كل الحب وكل الخير اللى ف قلوبنا ناحيتك ياجدع يابن الجدع ههههههههههههه عن اذنكوا بقي عشان البنات زمايلى واقفين عاوزين ييجو يتفرجوا .. يلا باي باي ....
كريم : اشكرك ازاى طيب ؟
احمد : بس يالا انت كمان ! حسابك معايا بعدين يا بغل انت ! بقا تبقي عندك حكايه وماتقولش !
كريم : لا ما خلاص . لينا ضهر ههههههههههه
احمد : يلا انا ماشي بقي ! عن اذنك يا ميرو
امير : حبيبى يا عمنا ! ف حفظ الله !
.......................
( ف الجامعه )
فريده : ايه يا بنات ! هنفضل واقفين كده لوحدنا والشباب لوحدهم ؟
سلمى : نعمل ايه طيب ! ماحنا قولنالهم كل الكلام اللى يضايق المره اللى فاتت .... دا كويس انهم واقفين لسا مكانهم وماسابوناش ومشيوا لما احنا جينا
منه : بس انا مش حابه كده ! احنا من ساعة ما دخلنا الجامعه واحنا واحد تعالو نصالحهم طيب ...
ساره : زين ما قولتى يا منون . تعالوا .. تعالو الصلح خير
.....
مصطفى : ماتتكلموش بقا عشان البنات جايين !
حسن : واخد بالى !
سلمى : ازيك يا مصطفى ! ازيك يا حسن انت وعلى !
مصطفى : ( بيبصلهم هما الاربعه ) بخير الحمد لله ! متشكر
حسن : صباح الخير عليكو ! اخباركوا ؟
منه : احنا مش كويسين طول ماحنا حاسين اننا مزعلينكوا ! جايين نصالحكوا ونقولكوا حقكوا علينا
سلمى : كنا سخيفين فعلا المره اللى فاتت ! وانا بالذات كنت سخيفه معاك يا مصطفى ! حقك عليا معلش .. حقكوا عليا ... ولو لسا زعلانين ومش عاوزينا نقف معاكو احنا هنمشي
فريده : خلاص يا مصطفى بقا !
مصطفى : استنى يا سلمى ! استنوا ! احنا عمرنا ما زعلنا ولا نقدر نزعل منكوا . احنا كلنا واحد ! واكتر من اخوات واصحاب وربنا يعلم ! بس احنا مش مهم ! المهم هو البنى ادم اللى احنا اساسا زعلنا سوا بسببه ! اظن انه اتظلم بما فيه الكفايه ... مش كده ؟ والحمد لله .. وربنا وحده بس اللى طلعه ونصره من اللى كان فيه !
سلمى : ( قلبها بيحن ودمعتها بتنزل لمجرد انها حست انه قريب منها والكلام علي مُهلكها ) هو جاى يا مصطفى ؟
مصطفى : مش عارف ! بس ان شاء الله جاى ! .. هيوصل اخواته وهييجى !
سلمى : بجد ؟
مصطفى : بجد .. واى حاجه واى تصرف هيعمله .. هيكون حقه على فكره
منه : بس هو ييجى ويعمل اللى هو عاوزه
مصطفى : تمام !
سلمى : خلاص يعنى صافى يا لبن ؟
مصطفى : هههههه أما الفنان ييجى بقي نشوف هيعمل اييه ..؟
فريده : هما مش دول ايمان واسراء
سلمى : اه هما !
ساره : ( بتبص ل سلمى ) هى مش دى كارمن اللى جايه معاهم دى ؟
...
ايمان : صباح الفي ع الناس الفي
اسراء : صباح الفل يا قمرات ! يا اجمد بنات ف اسكندريه كلها
كارمن : صباح الفل عليكو
سلمى : صباح فل ايه ؟ انتوا جايين مع مين ؟
ايمان : مع مين ايه ؟
سلمى : انتوا ماشوفتوش احمد ؟
ايمان : لا ماشوفناهوش ! ليه
كارمن : واحشنا والله ! اومال هو فين صحيح يا مصطفى
مصطفى : هييجى ... وبعدين هو انتوا مستنيين احمد ييجى معاهم ولا ايه يا سلمى ؟
سلمى : ايه ! لا انا قولت انه ماجاش معاكو ف هو هييجى مع ايمان .. مش كده يا ساره ولا ايه
ساره : اه طبعا ! اومال ايه بس
( سلمى وساره بيتكلموا على جنب )
سلمى : يعنى ماجاش مع الست كارمن يعنى ! ولا تكون امه قصدها على حد تانى
ساره : معرفش اهو هيظهر دلوقتى
مصطفى : لا ماهو مش جاى مع ايمان واسراء وكارمن
سلمى : ليه ! هو جاى مع حد تانى ؟
مصطفى : ايه ! اه . قصدى يعنى هتلاقوه جاى كمان شويه
سلمى : انت مخبى حاجه عننا يا اهبل انت ! قول قول مش اول مره . جاى مع مين ؟
مصطفى : هو قالنا اسبقوا انتوا وانا جاى مع
سلمى : ها مع مين ؟
مصطفى : مع شهد
سلمى : وحياة امك ؟
مصطفى : ايه وحياة امك دى ! وبعدين انا مالى هو اللى قال كده
....
( بعد عشر دقايق )
شهد : صباح الفل عليكو
سلمى : ( بتبص ل ساره ومصطفى ) صباح الخير ! انتى كويسه ؟
شهد : اه كويسه يا لومه انتوا اخباركوا ايه ؟
سلمى : كويسين الحمد لله ! انتى جايه من امتى ؟
شهد : من شويه لسا داخله اهو ! شوفتكوا قولت اسلم عليكو .. ايه . اومال فين بقيت الشله بتاعتكوا .. وفين احمد ؟
سلمى : احمد ؟ ( بتبص ل مصطفى ) انتى ماشوفتيهوش ؟
شهد : اشوفه فين ؟ لا ماشوفتوش !
سلمى : طيب تمام ! دلوقتى هييجى
...
سلمى : وحياة امك لو ماقولت صاحبك فين ومع مين دلوقتى لنا مطلعه عينك ! فين انطق ؟
مصطفى : بقولك ايه . الجنونه هتطلع على امى ليه ؟ استنو هرن عليه اشوفه جاى ولا مش جاى
سلمى : رن ياخويا .. واياك تقول اننا بنسال عليه .. انت إسأل بس شوفه فين وجاى ولا مش جاى ؟
مصطفى : استنوا .. برن اهو ...
سلمى : شغل الاسبيكر
مصطفى : ماشي
الو !
احمد : الو !
مصطفى : ايه الدوشه اللى عندك دى انت فين ؟
احمد : انا ف المدرج !
مصطفى : مدرج ايه ؟
احمد : المدرج يابنى ماحنا ورانا محاضرة محاسبه دلوقتى .. لو هتيجى انجز بقي عشان خمس دقايق والدكتوره هتدخل
مصطفى : محاضره ؟ اه ! طيب احنا جايين اهو !
احمد : يلا سلام
...
سلمى : محاضرة ايه ؟
ساره : ( بتبص على جدول المحاضرات ) هو فعلا احنا ورانا محاضره محاسبة دلوقتى .. ف هتحضروها ولا ايه
منه : طبعا ! انا عن نفسي رايحه
سلمى : بلا عن نفسك بلا بطيخ .. كلنا هنروح .. يلا بينا ...
....................
( ف المدرج احمد قاعد وبيرسم ف ورقه معاه ومركز اوى ف الرسمه )
( بنوته جميله جداا جايه بتقعد جنبه .. وبالصدفه بتبص عليه وهو مش مركز وبيرسم )
حور : ماشاء الله عليك ! رسمتك جميله
احمد : ( من غير ما يبص ) متشكر
حور : لا عن جد كتير حلوه الرسمه
احمد : ( بيبصلها ) متشكر جدا ! انتى ايه مش مصريه ؟
حور : ههههههههه دايما بتفقسونى ! لا ياسيدى انا مصريه ابا عن جد بس مامتى اللى سوريه
احمد : ماشاء الله ! وانا اقول الجمال ده كله منين ؟
حور : انتوا اللى زى السكر وحلوين كتيييييييير .. بترسم ايه بقي ؟
احمد : اهو ! لقيت نفسي برسم حصان .
حور : الله الله ! كتير حلوه والله ! دى هوايه عندك من زمان ولا من قريب
احمد : لا من زمان ! وانتى بقي عندك هوايات
حور : انا كمان برسم ههههههههه وده اللى شدنى ليك لما لقيتك منسجم كده وفاصل عن الدنيا وبترسم .. مع انها غريبه يعنى هنا ماقابلت حد هيك هنا من قبل !
احمد : طيب كويس !
حور : بتعرف انى هنا ما عندى صحاب كتير وقليل كمان لما بخرج من البيت !
احمد : مش انتى عايشه هنا ف مصر
حور : انا لسا جايه مصر السنه اللى فاتت .. كنا عايشين ف سوريا . يدوب دى تانى سنه .. سنه اولى بردو كنت معاكو هنا بس قليل لما كنت بفوت ع المحاضرات
احمد : تفوتى على فين ؟
حور : ههههههههههه هنا هنا يعنى على المحاضرات ..
احمد : اه معلش . يا تتكلمى سورى يا مصرى منعا للخبطه معلش
حور : ههههههههههههه اه خلاص متاسفه يا باشا . كده كويس ؟
احمد : كده كويس ياسطا ! وبعدين احنا هنا كلنا زمايلك واصحابك .. ماتتكسفيش انك تيجى تكلمى حد او تتعرفى على حد .. والبنات هنا روحهم حلوه وهياخدوك وهتبقي صاحبتهم
حور : اه ان شاء الله ! عندك مانع شئ نبقي اصحاب
احمد : اصحاب ؟ هو انا اطول . محدش يقدر يبقي عنده مانع يا باشا ( بيبص يمين وشمال وعاوز سلمى تيجى بأى شكل عشان تشوفه )
حور : اوكى يا .... انت شو اسمك ؟
احمد : انا احمد !
حور : اوكى يا أحمد انا حور
احمد : اسمك جميل ! وجديد كده ماسمعتوش قبل كده كتير
حور : عن جد انا مبسوطه كتير انى اخيرا هيبقي ليا صاحب هنا
....
( سلمى والبنات بيدخلوا وبيبصوا يمين وشمال بيدوروا على احمد )
ساره : ( بتشوفه قاعد وبيتكلم مع بنت بتفطس وبتضحك بصوت عالى )
سلمى : بقا هى الحكايه كده ؟ سايبنا بنلف بره وانت حضرتك بتلاغى هنا ؟ تعالوا تعالوا نلحق الحفله دى تعالوا يا جماعه
( مصطفى وعلى وحسن بيشوفوا احمد قاعد مع بنت حلوه اوى بيضحكوا وكاتمين الضحكه عشان سلمى ابتدت تتعصب وتطلع دخان من وشها )
....
سلمى : صباح الخير
حور : أهلين .. صباح النور ..
سلمى : ايه يا كابتن مابتردش ليه ؟ ولا نكون جينا ف وقت مش مناسب
احمد : لا ابدا ! تحت أمركو . خير ؟
منه : انت هنا واحنا بندور عليك بره
احمد : وتدوروا عليا بره بتاع ايه ؟
فريده : بتاع ايه يعنى ايه ؟ انت لسا زعلان ؟
احمد : ازعل ؟ ( بيبص ل حور ومستغرب ) ازعل من ايه !
سلمى : الله انتى اسمك ايه يا قمر
حور : انا اسمى
احمد : ( بيقطع كلامها ) اسمها حور ! بصراحه كان لازم يسموك حوريه يا حور هههههههههههههه ماشاء الله عليك زى القمر
سلمى : ( بتطلع نار مش دخان من وشها )
احمد : من اب مصرى وام سوريه ! واتفضلوا اقعدوا بقي عشان الدكتوره دخلت ..
سلمى : (بتخبط احمد بالشنطه ف جنبه ) طب خش ! خش جوه
احمد : أخش جوه فين ؟ وبعدين انتى بتخبطى ايه ما بالراحه .. وبعدين البنشات كتيره قدامك حبكت اوى تقعدى هنا
سلمى : ( بتجز على سنانها وبتتكلم من تحت ضرسها ) قولتلك ادخل جوه شويه .. هقعد هنا جنبكوا
( سلمى بتقعد على يمين احمد على طرف البنش .. والناحيه التانيه جنبه جور )
( منه وفريده وساره بيقعدوا ف البنش اللى قدامهم )
( مصطفى وعلى وحسن بيقعدوا ف البنش اللى وراهم )
......
( أثناء المحاضره )
حور : احمد نسيت اخد رقمك
احمد : اه طبعا .. كويس انك فكرتينى ... هاتى اسجلهولك .. وارن عليا عشان اسجله انا كمان ....
حور : خد !
احمد : ( بيبص بطرف عينه كده على يمينه اللى بيلاقى سلمى قاعده هتولع فيه )
سلمى : ( بتدوس على جزمته بكعب جزمتها )
احمد : اااااااى !
حور : ايه فيك شئ
احمد : ( بيبص ل سلمى ) لا مافيش ! حاسبى يا انسه من فضلك
سلمى : ( بترفع حواجبها الاتنين ) انت حد جه جنبك ماتركز ف المحاضره
احمد : تمام .. حاسبى بس بعد اذنك المره الجايه
سلمى : ( بتوشوشه ف ودنه ) وحياتك المره الجايه هخرملك رجلك
( طبعا الشباب ورا شايفين اللى بيحصل وماسكين بطونهم م الضحك بالعافيه )
احمد : خلاص خدى تليفونك .. انا رنيت عليا .. انتى سجلينى انتى بقي . وانا هسجل اسمك ... ( بيعلى صوته باستفزاز ) حور ها .. اكتبك حور ولا بتحبى اسم مميز ليك
حور : ههههههههههه لا انت اكتب اللى بدك اياه
احمد : تمام ! انا هسجله زى ما هو ... حووووور
( بيحط التليفون ع البنش قدامه وبيبص ناحية حور بيكمل كلامه معاها )
( سلمى بتشد تليفونه من غير ما هو يحس .. بتدور ع الاسم وبتمسحه وبترجع التليفون مكانه )
(احمد حاسس باللى هى بتعمله وسايبها وبيبتسم من جواه )
حور : لك شو ! ليش بتبتسم ؟
احمد : ابدا ! اصل لهجتك حلوه اوى !
حور : والله انا اللى بعشق اللهجه الاسكندرانى بتاعتكوا !
سلمى : ( بتقوم تزعق وبتتكلم بصوت عالى ) لو سمحت ايه قلة الادب والسفاله دى ؟ انت ازاى يا استاذ انت تخبطنى ف رجلى وتحاول تمسك ايديا
( كل الطلاب اللى قاعدين ف المحاضره ميتين على روحهم م الضحك .. مصطفى وعلى وحسن ورا نزلوا تحت البنش من كتر الضحك والمنظر ... ساره ومنه وفريده بيضحكوا بصوت عالى جداااا )
احمد : فيه حاجه يا انسه ؟
سلمى : حاجة ايه وزفت ايه .. انت ازاى تحاول تمسك ايديا ؟
الدكتوره بتتدخل : فيه ايه .. ايه الصوت ده منك ليه ليها
سلمى : يا دكتوره بيخبطنى ف رجلى وعاوز يمسك ايديا .. انا مش عارفه ايه السفاله دى ..
( احمد بيحط ايده على راسه وبيخبط على دماغه بسبب الفضيحه )
......
الي اللقاء في الحلقه القادمه
كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels
لينك الكاتب
https://www.facebook.com/profile.php?id=100010381862587
لينك بيدج/ هو و هي
https://www.facebook.com/howa.weheyaa/
لينك بيدج/ stories and novels
https://www.facebook.com/StoriesAndNovels2020