Chapter 5 (Wo ai ni)
Inayos namin ni lola lahat ng pinamili namin ni Harley bago ako umakyat sa kwarto ko. Tinawag pa ko ni Harley para mag-dinner pero parang ako yata ang nabusog sa ginawa niya kaya hindi na ko nakakain. Halos hindi ako nakatulog dahil sa sinabi ni Harley.
“Sinundan ka nga niya eh.”
Nagising ako kinabukasan na sobrang sakit ng ulo. Isang oras lang ang naging tulog ko. Masyado akong pinag-iisip ng bata yon. Hawak hawak ko ang sentido ko bago pumasok ng bathroom. Tumingin ako sa salamin, geez. Halatang halatang wala akong tulog dahil sa mata ko. Naghilamos ako at nag-toothbrush.
Bumaba ako para kumain, tinitigan ko ang kapatid ko na kasabay ko rin kumain. Busy-ng busy siya at parang walang pakialam sa paligid niya.
“Stop staring at me, ate.”
Inirapan ko siya bago binalik ang tingin ko sa pagkain ko. Gustung-gusto kong tanungin si Harley sa mga sinabi niya sa’kin kahapon. Pero hindi ko na tinuloy. Tutuksuhin lang ako nito.
“May number ako ni Kuya Royce, gusto mo?” Tumingin siya sa’kin habang sumusubo. Pakiramdam ko namula ako dahil sa tanong niya.
“A-ano namang gagawin ko sa number niya?”
“Baka susubukang kainin diba?”
Halos ibato ko sa kanya yung hawak hawak kong kutsara. Kung wala lang si lola at lolo sa tabi namin, tusok tusok na ‘tong kapatid ko.
“Royce?” Napatingin ako kay lolo na busy sa pagbabasa ng newspaper habang umiinom ng kape. “Yung binatang naghahatid sa’yo dati?”
“H-ha, lo?” Pinandilatan ko si Harley ng bigla siyang ngumisi. “Uhm, opo.”
“Boyfriend mo ba yon?”
“Hindi po!” Sagot ko agad. Kilala ni lolo at lola si Royce. Palagi niya kong hinahatid sa bahay noong nanliligaw pa siya. Siguro naman napapansin na nila si Royce dati pa pero hindi na sila nagtatanong. Alam naman nilang hindi ako gagawa ng kalokohan.
“Bakit nga ba wala ka pang boyfriend, Skyla?” Napangiwi ako sa tawag ni lolo. Mas sanay kasi ako sa Hailey. “Magna-nineteen ka na next month.”
“Ikaw talaga,” narinig ko si lola na nagsalita. “Hayaan mo na si Hailey sa buhay niya. Matanda na siya. Kaya na niyang magdesisyon para sa sarili niya.”
Napasimangot ako. Kasalanan to ng kapatid ko eh. Lihim ko siyang sinipa sa ilalim ng lamesa, gumanti agad siya. Sinipa ko ulit siya bago nilayo ang paa ko.
“Parang wala kang tulog, Hailey?” Sabi ni lola sa’kin. Dahil don, nakaramdam na naman ako ng antok. Ngumiti lang ako kay lola bago tinapos ang pagkain ko. Tumayo na rin si Harley. Ngayon ko lang napansin na naka-uniform na siya.
Kinuha niya yung bag niya sa kwarto bago nagbless kay na lola. Palabas na siya ng pinto ng bigla ulit siyang humarap sa’kin.
“Ayaw mo talaga?”
Inirapan ko ulit siya. Tumatawa siya nung palabas na. Kainamang bata yon. Grabe kung mapagtripan ako. Pero bakit may number siya ni Royce? Pinilig ko agad ang ulo ko bago tinulungan si lola sa paglilikom ng plato.
Bumalik ako sa kwarto ko para mag-ayos. Quarter to 8 nung umalis ako sa bahay. Dumiretso agad ako sa COM, nakita ko yung mga kaklase ko na nasa hallway malapit sa room namin. Humikab ulit ako. I need to rest.
