في العشق والهوي

أقتباس متقدم 🌼

صباح الخير اصدقائي الغاليين 😘
وحشتوني جدا أن شاء الله تكونوا جميعا بخير يارب العالمين 🤲
اولا مشكورين على واجب العزاء في والدي شكر الله سعيكم جميعا ولا احزنكم على غالي وحبيب يارب
جزاكم الله خير الجزاء يارب العالمين 🤲

*****************
تململت سمية فوق الأريكة تحتسي قهوتها المُرة في صمت محاولةً رسم إبتسامة مغتصبة فوق شفتيها المضمومتين، لكنها لم تستطع الصمود أمام نظرات نيرة المستكشفة لها قائلة بنبرة يملأها الامتعاض:
- اتحدت ويا محمود لاجيته في الطريج مندلي يچيب الست الضاكتورة من المستشفي كان لازمته إيه إنها تشتغل كأن ولدي منجصها أيتها حاچة.
ناظرتها نيرة مطولًا قبل أن ترد بهدوء:
- الموضوع مش إنه ناقصها حاجة أو لا الموضوع انها زهقت من قعدة البيت وحدها، أهو تشغل وقتها لحد ما ربنا يعوض عليهم.
مررت سمية إصبعها فوق جبهتها مع وجوم كسى ملامحها تتساءل بغيظ:
- يعوض عليها ميتى وهي من الصبح للمسي بره دارها؟! كانت چوازة الخيبة التجيلة.. كان وينه عجلي أما جولت لولدي يتچوزها.
هزت نيرة رأسها ببطء معترضة وزجرتها:
- ياستر عليكي ياشيخة اللي فيكي فيكي، مالها بس فاطيما؟ البنت قايدة صوابعها العشرة ليكي وإنتِ حطاها فوق رأسك كأنها بتأكل وتمسح فيها.
زفرت سمية بنزق هامسة بصوت خفيض معترض:
- ومين غيرك راح يدافع عنيها وه كأنك محاميتها، وياريت إنتِ وبس ده سلمان معيطجش اتحدت حرف عنيها.. سحرالكم ولا إيه؟
ابتسمت نيرة وهي تضع فنجان قهوتها فوق الطاولة ولوحت بكفها بوجه سمية:
- ياولية يا ناقصة عقل كفاية غيرة على ابنك البكري، ولا فاكرني مش واخده بالي منك، بصراحة مشوفتش واحدة بتغير على ابنها من مراته.
ناطحتها سمية معترفة:
- أيوه بغير على ولدي ده بجا يعدي عليا الصبح و بالليل بس بعد ما كان معيفارجش حضني واصل.
أراحت نيرة وجنتها فوق خدها وعقبت قائله:
- طيب ما الحال من بعضه عمر من ساعة ما اتجوز وأنا بشوفه الصبح وبالليل، وساعات مرة واحدة بس في اليوم، و ساعات مش بشوفه غير كل يومين.. كل واحد فيهم بقا عنده حياته وبيته.
همهمت سمية مستنكرة:
- وي وي شوفي واكل ناسه بجى لأهل مرته، بس ع الأجل حسن اهنيه واياكي و كماني مرت أيوب أديها من وجت اهنيه، الدور و الباجي عليا بجيت كيف الجرد أبو سلسلة لوحدي في الدار، سلمان يعاود يِسَّبح و ياكل لجمته و يحط رأسه فوج المخدة شخيره يسمع وجه جبلي كلاته.
ضحكت نيرة ضحكة عالية جميلة مقهقة حتى توردت وجنتيها هامسة:
- ابن خالك بقى يسمع وجه قبلي بحاله لا و بحري كمان تقوليش شغال في الفاعل، بس نَفَسهم معانا بالدنيا وبعدين هنعمل إيه دوام الحال من المحال، عندك اسم الله عليه زين معاكي.
هتفت سمية تلطم خديها:
- ياختي بلا نيلة الساجط الواعر، نيله عليه هو فالح غير بندلي ع الهباب الجيم و يعاود يجفل عليه في أوضته جال إيه عيذاكر وهو متهبب معيفتحش كتاب، سنتين يسجط في الثانوية العامة كته داج الكلب.
- مساء الخير....
قطع حديثهما دخول إيسال التي استيقظت للتو من نوم عميق وهي تحمل طبق ممتلئ بشطائر برجر مع البطاطس المقلية و المخلل، دلفت جالسة بجانب سمية التي تطلعت في وجهها المنتفخ المتورد محركة شفتيها بينما ردت نيرة مبتسمة:
- مساء النور ياحبيبتي، نوم العوافي.
ابتسمت إيسال هامسة بخجل وهي تنظر إلى الطبق في يدها قائله بصوت ناعم رقيق يحمل بين طياته الخجل:
- قومت جعانة جدًا.
- ألف هنا وشفا يارب.
رددت نيرة.. بينما هتفت سمية ساخطة:
- وإنتِ كماني يا واكلة ناسك ميتى راح تجولي لچوزك انك شايله؟ وانتِ رايحة تولدي عاد؟!
فتحت إيسال عينيها على مصرعيها حتى كادت أن تنفذ من بوبؤتيها بينما توقف اصبع البطاطس بينما شفتيها محشورًا.. في حين حركت نيرة رأسها نحو تلك الجهة الراقدة بها الخالة غوايش نائمة تشخر من أنفها
قائله وهي تُشير:
- CNN تبع السرايا ذاعت الخبر لعمتك سمية.
لكمتها سمية في ذراعها وهي مستاءة غاضبة منها:
- كنتي رايدة تخبي عليا آني كمان، ليه فاكراني كيف الولية المدعوجة ديه هي راح أذيع الخبر، ميتى راح يعرف چوزك؟
مضغطت إيسال اصبع البطاطس المحشور بين شفتيها يلحق به آخر ثم قطعة من المخلل الحار وهي تحرك رأسها نافية هامسة بحزن:
- مش عارفة ياعمتو هقوله امتى؟
وحدقت في سمية و عيناها تغمرها الدموع الحبيسة تهمس:
- خايفة يزعل.
ضربت سمية فوق صدرها تردد:
- يزعل، يزعل من إيه؟ في راجل يزعل أنه راح يبجى أب؟؟ وه إيه الحديت الماسخ دهوت! جولي حاجة للعفشة ديه يانيرة.
زفرت نيرة ثم قالت بارتياح:
- قولتلها أيوب مش هيزعل والكلام اللي قاله كان مجرد كلام اتقال في الأول بس.
هزت سمية رأسها مستفسرة بقلة فهم:
- كلام إيه اللي جاله أيوب؟ وه ما تجولوا.
فتدخلت الخالة غوايش في الحال وهي تعدل من وضع رأسها قائله لسمية التي نفضت عبائتها باصقه داخلها:
- جالها مرايدش عيال، معيزشي واصل وهي خايفه ومهمومة حالها لايصر ولا يضر كيف مانتي شايفه اكديه.
صاحت نيرة معتدلة من جلستها المسترخية:
- يالهوي انتِ مش كنتي في سابع نومة، وتقول مش بسمع.
جففت إيسال دموعها المنهمرة فوق خديها وهي لا تتوقف عن تناول شطائرها رغم حزنها ضاحكة.. بينما قالت سمية وهى تنفض قبة عبائتها:
- بورييه منك بوريه يا ولية يا خرفانة، يا مرضعة قلاوون راح توجعيني يوم في مكاني من الخضة، انتِ نعسانه ولا ودانك ويانا، يابوووي راح تشلني.
و أشارت لنيرة تسألها:
- عتهبب إيه اهنيه أم أربعة و أربعين ديه.
أمسكت نيرة برأسها الذي يترجرج ضاحكة:
- أااه يا راسي يا أمي، بتيجي تقعد معانا تتسلى لحد ما فاطيما ترجع هي و محمود.
لوحت الخالة غوايش ذراعها الممتلئ بالأساور الفضية ناهضة من مكانها ببطء:
- راح أهملهالكم مخضرة يكش ترعرع وأطلع أشرب سيجارة مع المدعوج حسنين.. جال ايه يا صبايا واد عفيفة و ميمون عيشرب سجاير أجنبي، على رأي المثل عريان الط... ويحب التجميز.
واستمرت الخالة غوايش في الحديث حتى خرجت في حين هتفت سمية من خلفها بصوت مرتفع:
- ولية جليلة الحيا ناجصة.
و إلتفتت إلى إيسال الشاردة تأكل:
- هو جالك اكديه ليه؟ جالك بالفم المليان ماريدش عيال.
هزت إيسال رأسها هامسة بحزن:
- أيوه في أول جوازنا قالي كده، وأنا من وقت ما عرفت إني حامل وأنا خايفة، خايفة أقوله مش عارفه ردة فعله هتبقى إيه لما يعرف.
تدخلت نيرة على سبيل الطرفة تهتف:
- هيطير طير من على الأرض وهيبقى عايز يشيلك من على الأرض شيل بس انتِ لازم تقولي له.. هتستني ايه أكتر من كده؟
هزت إيسال رأسها وهي تترك ما في يدها مخفية وجهها بين كفيها تبكي:
- أيوب كان رافض الموضوع ده لحد وقت قريب كان بيسألني باخد حبوب منع الحمل بانتظام ولا لأ خايفة لو عرف يقولي مش عايزه.
- يعني ايه مش عايزه ده انتِ قفلتي التالت.
صاحت نيرة غاضبة... بينما شهقت سمية هاتفة بفزع:
- يا مُري جفلت التالت و لساته مايعرفش، مستنيه إيه يا نايبة يا خايبة تجولي وانتِ عتحزجي العيل، لازمن و حكمن يعرف وغصبن عنه راح يرضى.. الولد في التالت وحتى لو بأول يوم روح و دبت جواتك أمر الله و نفذ...

يتبع في باقي أحداث الفصل الجمعة بإذن الله