Through Dangers Untold

Chapter Forty - Destiny Is At The Backstage

NAKA ISANG LINGGO NA SI STACEY SA PROBINSYA. Sa loob ng isang linggo, naipasyal na siya ng Tres Marias sa mga magagandang pasyalan at importanteng lugar na dapat niyang malaman. Nakakatulong na rin siya kina Ka Olga at Mang Lito pagdating sa pag-aalalaga ng mga pananim nilang gulay sa bakuran ng kanyang bahay. Medyo bumait na rin sa kanya ang dalawang askal na bantay doon.

Hindi niya masyadong pinapansin ang mga kapitbahay. Nakasanayan lang niya siguro noon sa Maynila na mula pagkabata, eh hindi masyado naglalalabas ng bahay. Hindi rin palalabas ang mga kapitbahay niya sa mga subdivision na natitirahan.

Paminsan-minsan, nakakabatian din niya si Kapitana Anore kapag nagkakataong nag-iikot-ikot ito kasama ang ilang tanod.

"Buti pa kayo," labi ni Mary Ann habang magkakasama sila ngayon sa salas ng kanyang bahay. It was a Saturday night. Walang pasok sa trabaho ang dalawang guro. Kakauwi lang naman ni Mary Ann kaya suot pa ito ang unipormeng blouse, pencil skirt at stockings. "Eh kami, may pagkalaki-laking sale pa sa mall, eh! Kaya may pasok ako sa Mahal na Araw."

"Asus, para saan pa ang leave?" pang-ookray ni Mary Grace sa kapatid, suot ang reading glasses at kunot pa ang noo. "Gamitin mo, aba!"

Nakaupo sa sahig sila Mary Grace at Mary Jane, gamit ang coffee table habang inaatupag ang mga record books nila. Naghahabol ang mga ito, hindi dapat umabot ng Mahal na Araw ang ginagawa nilang computation ng grades. May gaganapin din kasing Recognition Day sa high school na pinagtuturuan nila kaya kailangang matapos agad. Panay tuloy ang takatak ng mga calculator.

"Eh late na!" anito. "At para saan ang Vacation Leave kung wala namang mapagbabakasyunan, hane? Mapagalitan pa tayo nila Lola kapag gumala pa tayo ng Mahal na Araw."

"Why? What's wrong with that?" tanong ni Stacey sa tatlo. Nakataas ang mga paa habang nakaupo siya sa sofa katabi ni Mary Ann.

Mary Ann gasped. "Anong what's wrong?" panlalaki nito ng mga mata. "Ang sabi nila Lola eh, kapag Mahal na Araw eh, dapat nasa bahay lang daw. Parang nagluluksa kasi tayo sa Mahal na Araw, Stace."

Well... Hindi na lang niya sasabihin na tuwing Holy Week, nagre-retreat siya sa iba't ibang mga beach at resort...

"Bawal din daw ang maingay," baba ni Mary Ann sa lalagyan ng biscuit na hawak nito. "Bawal din masugatan, kasi hindi gagaling agad. Bawal ang tumawa. Bawal ang maligo."

Napalabi si Stacey. Ganun...

"Bawal din ang sex."

Nagbungisngisan na ang mga ito dahil sa sinabi ni Mary Ann. Namilog naman ang mga mata ni Stacey.

"Pati iyon, bawal?"

"Hindi daw mahuhugot palabas 'yung ano," tawa ni Mary Ann.

"Para namang may makaka-ano tayo, Mary Ann!" natatawang saway ni Mary Jane sa kapatid.

Natatawang napailing na lang si Stacey. These liberated young ladies. She's beginning to love their company.

.

.

MORE DAYS HAVE PASSED. Sunday morning. Nakaramdam si Stacey ng ginhawa nang makalabas ng simbahan. She tugged down her white button-down blouse with a hand to cover her hips exposed by the low-waist jeans. Inasahan na niyang siksikan ang mga tao kaya nag high ponytail siya ng buhok. Nagpaanod siya sa mga tao palabas ng simbahan ngayong tapos na ang misa. Nakakabanggan naman niya ang iba pang dumadagsa sa loob para lang mapabasbasan ang winawagayway nilang mga palaspas.