قاب وطنين أو أدنى

تحتَ ضلعٍ أعوج

تلميح: "الرصاصة أخبرتني ..
قبل أن تشتق صدري
حذّرتني
أنت تدري؟!
قلت أدري .. لا تؤلمني الجروح"

.
.

دخل فراس المنزل بعد أن خلع حذاءه ونادى/ يما...

توقف عند الصالة ورأى أمه تجلس على الأريكة وكما توقع كانت تبكي.

وضع الأغراض من يده على الأرض وأسرع نحوها/ يما ماالك؟
مسحت دموعها/ ولاشي
فراس جلس على الأرض أمامها/ كييف ولاشي ! لسا زعلانة عشان حور؟
/ لا مش بس عشانها، هيك صحيت لقيت البيت فاضي من غير شر
انت وحور تزوجتو كل واحد ببيتو، وكمان جود رح يروح على جامعتو بنابلس... لإنو متعودة عليكم وفجأة غبتو قلبي انقبض
فراس/ يا روحي.. اجيلك اعيش هون؟ انتي بس احكي والله باجي!
/ لا وين تيجي، وشغلك وبيتك هناك... معلش يما زياراتكم عندي بتكفي
قبّل يديها بقوة/ صدقيني اني كل ما أطلع من المشفى بميل عندك، ما بتركك مجنون انا؟
وحور كمان اصبري بس هادا الاسبوع لتلاقيها كل يوم والثاني بتنط عندك
وجود اخر الأسبوع بصير يروح من نابلس ويقعد خميس و جمعة وسبت
هي بس هاي الفترة صعبة بس بتمرّ
ابتسمت/ الله يرضى عليك وأشوف ولادك يارب
فراس/ ايوة هيك أم فراس! بدنا نقضيها بكي ع أهون سبب عمرنا ما بنفرح! بعدين صحتك بالدنيا بلاش يصيرلك اشي من الزعل
/ مش زعلانة كل همي اشوفكم مبسوطين
فراس وقف وجلس جانبها ليحتضنها/ مبسووووطين مبسوطين بس اضحكي دخيلك ، مش متعود اشوفك زعلانة

/ شو فاتحينها حصة أحضان شايف!

فراس همس لها/ ها أجا الحج! بالله الي عندها واحد متل هاد مين بدها كمان؟!
سالم وضع مفاتيحه على الطاولة/ قوم من جنبها انت شو جايبك عنا اليوم؟
فراس رفع حاجبيه/ جيت اشوف سوسو حبيبتي اشتقتلها
/ انا قلت بجوزك بخلص منك ومن قعداتك هاي! قوم انقلع روح عند مرتك واترك مرتي بحالها
فراس/ ههههه وكمان بتحكيلي البيت فاضي! شوفي هاد جوزك بعبي أبووه

أم فراس هزّت رأسها / جوعان؟
أبو فراس/ ااه حطيلنا اكل انا وفراس
فراس/ ياريت والله

عندما خرجت نظر أبو فراس لفراس/ شو الأخبار؟
فراس/ ولاشي
أبو فراس/ جرحك لسا بوجع؟
فراس/ لا الحمدلله ضايل شوي وبلئم
/ اتصلت امك بحور؟
/ ما اتوقع، جيت لقيتها بتعيط
/ ليه وين جود؟ مش هون؟
/ لا اتصل علي طالع يجيب اغراض للجامعة.
اومأ أبو فراس/ بيني وبينك قلبي مقبوض من روحتو على جامعة النجاح، حاس انو اول مرة رح يبعد عن عيوني وخايف عليه
بس ما رضيت أبينلو لا يزعل أو يفكر اني بمنعو من الي بدو ياه

فراس/ صح هو قرارو كان فجأة بس خليه، بلكي قويت شخصيتو أكتر ولما يختلط بالناس بتزيد خبرتو، بلا ما يضل منطوي
/ ان شاء الله، حكالك اشي عن التخصص؟
فراس/ لأ... فاجأني، لانو كان يحكي ما بدو طب وفجأة غيّر رأيو.. يمكن مشان الي صار معي؟
/ الله أعلم ممكن... عموما أي جامعة كانت رح تقتل حالها يدخل فيها لانو الأول ما شاء الله .
فراس ابتسم/ الله يوفقو ويفتحها عليه، هو قدها ما تخاف، أي تخصص بدخلو ببدع فيه صلاة النبي
أبو فراس/ امين