قاب وطنين أو أدنى

ليس بعد ... فُرصة!

تلميح: انكشف.

/ لو سمحت...
أوقف أحد شباب النظام شاب وهو يسير بجوار فتاة، قبل ساعة من أذان المغرب، في ساحة المسجد
/ نعم تفضل؟
ابتسم له الشاب/ اهلا وسهلا فيك بس لو سمحت الأخت الي جنبك مين؟
رفع حاجبه بطريقة تعبّر عن غضبه، وكان سيردّ ردّاً غاضبا على سؤاله!
لولا قصي الذي تدخل في آخر لحظة/ عامر ورا بنادوك روح شوف الشباب...
حين ابتعد نظر قصي للشاب وقال/ اعذرنا يمكن ما فهمت قصدو وعصبت بسرعة... بس المسألة مش شخصية أبدا. نحنا هون لجنة نظام يعني لازم نسأل ازا شفنا بنت وشب لحالهم
الشاب زفر بقهر/ اختي هاااي! وقول لهداك يصير يسأل متل الخلق والعالم مش هيك الناس بترمي الحكي
قصي حافظ على ابتسامته/ ولا يهمك بعتذر ازا ازعجناك... تفضل خد راحتك وكمان مرة لا تاخد الموضوع شخصي احنا هون لنحافظ على النظام ونمنع اي فلتان بس. رمضان كريم
اومأ ثم ودعه وغادر مع أخته.
بينما استدار قصي وهو يضرب جبهته ويقول/ دمهم حامي! شايفينا لابسين جاكيت أصفر ومكتوب عليه لجنة نظااام بس عالفاضي الا يعصبو علينااا.. كإنه ما حدا صايم غيرهم

تابع مشيه نحو المسجد القبلي لكنه توقف حين سمع رنين هاتفه/ اه يما؟
أم يحيى/ يما قصي مطول اليوم؟
قصي/ رح افطر هون، الليلة مليان ناس... ليه فيه اشي بدك اشي؟
أم يحيى/ ناقصنا خبز... بس خلص ازا مشغول بخلي كرم يجيبلنا، بعدين سارة بتسأل عنك خوثتني
قصي ابتسم/ كنت رح اجيبها بس رح تتعب من الشوب والأزمة... خليها باجي باخدها بعد صلاة المغرب
أم يحيى/ تمام الله يرضى عنك.

نظر قصي لشاب ينظر حوله ويبدو تائها/ يما لازم اروح سلام

أغلق الخط ومشى باتجاهه/ مرحبا... حاسك تايه
اومأ الشاب وقال بتردد/ اه... لو سمحت وين الحمامات؟ بدي أتوضا
قصي/ باخدك بس ازا بدك تتوضا هون بالبركة أسهلك تعال
اومأ ومشى بجانبه/ الله ينصر ديييينك يا زلمي متت وانا أدوّر صرت راجع لنفس المكان مية مرة
ابتسم قصي/ معلش بتصير
/ انتو هون لجنة نظام؟ شو بتعملو بالزبط؟
قصي/ كتير أشياء، منها انو نبعد الرجال عن تجمعات النساء، نأكد بعد الإفطار على ضرورة تنظيف المطرح الي بياكلو فيه.. بنشوف شو فيه اشياء غلط بتصير وبنصلحها... مثلا ازا واحد بدخن جوا الحرم بنحكيلو ما بصير حرام ، بعد البوابات الخضرة دخن زي ما بدك اما جوا لأ.
اللبس احيانا ازا فيه لبس معين مش مناسب لحرمة المكان بنشدد عليهم، خاصة البنات.. طبعا هاي مش وظيفتنا لانو فيه كمان لجنة نظام من بنات بكونو عند تجمعات النساء عند قبة الصخرة غالبا.

ابتسم الشاب/ نيالكم... لو اني ساكن هون كل سنة رح اتطوع اكون بهاي اللجنة
قصي/ مبين انك مش من هون... من وين انت؟
نظر له بمرح/ قبل التهجير ولا بعد التهجير؟!

توقفوا عند بركة المياه وقال قصي/ يعني من الضفة؟!
اومأ/ انا من مخيم جِنين... بس اصلي من جبل الكرمل بحيفا
قصي بحماس/ مخييييم جنين؟! اهلا وسهلا.. والله انكم زلام بترفعو الرااس
الشاب/ الله يسعدك.. بالمناسبة اسمي ضياء
قصي سلّم عليه/ وانا قصي. يلا توضا وتعال أدلك على مكان تصلي فيه هادي نوعا ما وما في زحمة كثير
اومأ بحماس/ ماشي