قاب وطنين أو أدنى

فضولُها

تلميح: غير قابل للسيطرة.

فراس/
يقف مع أحد الممرضات مقابل غرفة مريضه، كان يمسك بملف ويناقشها به/ قيسي ضغطو كل ساعة، ما تنسي تسجليه متل اخر مرة تمام؟
الممرضة/ حاضر دكتور، بدك شي تاني؟
فراس/ لا
اومأت وأخذت الملف من يده وغادرت، نظر للطريق المقابل له ليرى صديقه ثامر يتقدم باتجاهه/ شو لسه ما خلصت دوامك؟

فرك فراس عينيه بتعب/ خلصتو من ساعتين.
هزّ ثامر رأسه بجنون/ عادتك مستحيل تغيرها! احنا بنشحد اجازات وهو بيلغي فيهن لا وبداوم اضافي كمان!
فراس/ ما رح تخلص اسطوانتك هاي؟ كل ما بتشوفني لازم تغرّدها؟
ثامر ضحك/ من قهري والله، المهم شو في عندك اليوم؟
رفع فراس ساعته وقال/ بعد اشي ساعتين عنا مجلس، ابن عمي رجع من السفر وعملنالو عزومة، تفضل
ثامر/ لاا ما اظن، لسه هلا بلش دوامي.
فراس/ يلا طيب انا رايح على البيت أبدل وأروح
ثامر/ ماشي، راجع اليوم؟
فراس/ ما أظن، يلا سلام
ثامر/ الله معك

مشى الى مكتبه وفتحه، خلع معطفه الابيض وارتدى جاكيته الجلد، تناول هاتفه عن الطاولة و وجد مكالمات فائتة من والده ووالدته، وأخرى من حور.
اتصل على أبيه وهو في طريقه للخارج/ اه ابو فراس
قال والده/ انت شو رأيك تفرش وتنام بالمستشفى؟!
فراس/ روق أبو فراس، شغلي كمان!
ابو فراس/ نصّاب! مفكرني مش عارف انك بتداوم زيادة؟
فراس/ طيب شو اعمل يعني؟ بحب شغلي.
ابو فراس/ الله يخليلك ياه! بقول بس تعال محتاجينك في كم شغلة ناقصة
فراس تنهد/ ارسلي ياهم برسالة بجيبهم معي.
ابو فراس/ ماشي، جيب اختك وامك معك انا ما اظن افضى اجيبهم.
فراس / تمام، غيرو؟
ابو فراس/ غيرلي ياه هالطبع، برن عليك مليون مرة ما بترد الا بعد ساعتين ثلاث!

فراس ابتسم على عصبيته/ كان التلفون بالمكتب، حقك علي بس شيل هالكشرة الي عندكم وراثة بهالعيلة!
ابو فراس/ بلا حكي زايد، بستناك يلا تعال.

أغلق في وجهه فضحك فراس بخفة وهو يشغل سيارته، اتصل على أمه وحرّك السيارة/ اه يا عمري كيفك؟

قالت أمه بضيق/ هاد وانا عمرك بتخلي قلبي يغلا عليك، وينك انت؟ على اساس بخلص دوامك قبل ساعتين.
فراس/ مالكم انتو اليوم علي؟ شكلك متفقة مع جوزك تقلبوها نكد؟
ما حدا اغتالني هيني الحمدلله عايش بتنفس، بلاه القلق الزايد الله يرضالي عليكي ام فراس.
أجابته بعتب/ ما علينا، متى جاي؟
فراس ابتسم/ نص ساعة وبتلاقيني عندك يلا اجهزو بدي اخدكم معي على بيت عمي.
ام فراس/ انا جاهزة من زمان، بس اختك مش قبلانة وبدها تضل بالبيت وانا بصراحة خلص مش قادر اناقشها، تعال واحكي معها.
فراس تنهد/ يعني لازم قبل كل طلعة من البيت تنكد هالبنت؟!
ام فراس/ هالمرة ما بدها تطلع قال شو عشان عزومة للأجنبي