قاب وطنين أو أدنى

التقدّم خطوة

تلميح:يوسف

فتحت عينيها على صوت ضحك وصراخ من الأسفل، تنهدت بكره وهي تصرخ/ جوووود والله لا أذبحك اصبر علي! يا ربي الساعة ستة هالبني آدم ما عندو دم بصحا من الصبح يصيح؟

قفزت من السرير وأمسكت بحذائها ونزلت السلّم بسرعة وحين رأته يقف أمام التلفاز ويصرخ بعبارات لم تفهمها، ضربته بالحذاء ليصطدم بظهره، وصرخ هذه المرة بألم.
نظر لحور ليقول/ كسسسر
حور/ يكسرك!! شو بتعمل من الصبح صاحي مثل العُمّال؟ ترا انت مش عااايش لحاالك بالبيت! اخرس بدي انام!

جود عبس/ والله بكرهك بس شو أعمل... لو تعرفي ع ايش بصيح بتعذريني وبتيجي تصيحي معي
حور وضعت يدها على خصرها/ على شووو يعني؟
جود أشّر على التلفاز/ مستوطنين وجنود حالاتهم حرجة ومنهم انقتلو مبارح بهجوم ع مستوطنة بالقدس!

وقفت مشدوهة، برد غزا عظامها وهي تنطق ببرود/ شو يعني؟ ما يموتو احنا شو خصنا؟
جود بقهر/ ولك عرس للفلسطينية انو في شباب لسا بيقاومو الاحتلال!!
كل فلسطيني لازم يفرح لهالشغلة.

تغيّرت ملامح وجهها، وتركت جود يقف ليشرح لنفسه وهي تجرّ نفسها للحمام، غسلت وجهها جيداً كي تفيق ونظرت في عينيها بالمرآة/ لازم يفرح؟ وليه أنا مش فرحانة؟ يعني انا مش فلسطينية؟؟!

تنهدت بألم وهي تخرج من الحمام، الانتقال إلى هنا، والعيش وسط الحرب كان جديداً عليها، ولكن جود بنفس عمرها ولكنه "يفرح" حين يرى هذه الأخبار!
أما هي؟ كيف تفسّر برودها تجاه هذه القضية والأرض والقدس والبحر والاحتلال؟
ليس كُرهاً، وليس حُباً، شيء بالمتتصف!

جلست على درجات السُلّم بضجر وهي تفكر في كلامه، ثم سألته
/ طيب مين الي قتلهم؟

جود بابتسامة/ كم شب، ما حدا بعرفهم لإنو نجحو بالهرب، الله يحميهم وين ما كانو!

اومأت بضيق وسألت/ طيب... وين إمي وبابا؟
قال باندماج مع الأخبار/ أكيد برا، وفراس بمناوبتو قبل ما تسألي!

وقفت وسحبت شالاً من جانب الباب وضعته على شعرها ونظرت لأبيها وأمها الذين يجلسون في الحاكورة/ صباحو يا عصافير الحب!
أم فراس نظرت لها وشهقت/ بسم الله انتي شو صحاكي؟
حور ضحكت/ منظركم صحاني! والله بدكم صورة!
أم فراس ضيّقت عينيها/ يااا قليلة الأدب! ع مين طالعة مش عااارفة
حور غمزتها/ حركاااات يا سوسو بتخجلي من ورانا
أم فراس(سوزان) أمسكت بحذائها وضربته عليها، فاختبأت وراء باب المطبخ بسرعة وهي تضحك/ ههههههههههههه خجلتي يا عمري والله معك حق!
قال سالم بصوت مرتفع/ حور شكلك نعستي روحي كملي نومك.
حور أمالت برأسها/ لييه بتحكو اشي سرّي؟ شو هو؟
أم فراس/ والله بيوم رح يصير معي الضغط والسكري وكل أمراض العالم من وراكي! واقفة واقفة روحي اجلي هالجليات
حور/ ااه؟؟؟ لا نعسانة شوي... بعد ما اصحا ان شا الله سلااام