Red Moon (Complete)

Part 27 . . . Vladivostok

  "Vladivostok"

------

Pumunta si Nick sa hotel.  Kinausap niya ang kanyang ama at mga kapatid. Sinabi niyang lahat ang mga narinig at ang natuklasan tungkol kay Jansen. Galit na galit si Yuri.

" Ang walanghiya. Uunahin muna natin si Gustav.  Ngayon din ay tutungo tayo sa mönasteryo. Makikipag-usap ako sa Duke. Kailangang kumilos na tayo bago pa man makapamuksa si Gustav. Tiyak akong siya ang dayuhang bisita sa kastilyo. Wala kayong babanggitin tungkol kay Jansen. Tayo mismo ang huhuli sa kanya. Kailangan ko siya ng buhay!" sabi ni Yuri.

Nag-impake na sila at sumakay sa karuwahe. Ilang oras pa ay nasa monasteryo na ang mga Ivanoff. Nagpatawag ng pulong ang Duke. Kasama ang obispo ay nag-usap-usap sila.

" Kung tama ang hinala ni Nick ay kailangan na nating kumilos mahal na Duke. " sabi ni Yuri.

" Kung ganoon ay  ihahanda ko na ang mga mandirigma at maglalakbay kami patungong Vladivostok."

" Kilala ko ang obispo ng Vladivostok. Magpapasugo ako para masalubong ang pagdating ninyo roon." sabi ng obispo.

" Hindi kaya magiging kapuna-puna ang biglang pagpunta ng maraming mandirigma sa Vladivostok? " tanong ni Ross.

" Magsusuot ng mga abito ang lahat. Itatago ang mga sandata sa mga karuwahe. Huwag kayong mag-alala. Taon-taon ay nagpupunta ang mga pari sa simbahan ng Vladivostok. " sabi ng obispo.

" Edward, ihanda ang lahat! Mamayang gabi ay aalis tayo! " atas ng Duke sa kanyang ayudante.

" Sofia, maiwan na kayo nina Michelle dito. Kami na lang ang magtutungo sa Vladivostok. " sabi ni Yuri.

" Oo mahal ko. Maghihintay kami rito. " yumakap siya sa asawa.

Lumabas si Nick at pinuntahan si Arianna. Nakita niya ang dalaga sa isang balkonahe. Nakatanaw sa malayo.

" Mahal kong Arianna, ano ang ginagawa mo rito?"

" Gusto kong makita ang kapaligiran. Ang liwanag ng araw. Nangangamba ako aking Nick na baka hindi ka na magbalik. Pinagmamasdan ko ang kalangitan. Ang kagandahan ng langit at ng lupa! Mahal na mahal kita. " lumuluha ang dalaga.

Humarap siya sa binata. Hinawakan ni Nick ang kanyang baba, iniangat at hinalikan ang mga labi. Yumakap si Arianna sa binata.

" Aking Arianna. Huwag kang mangamba. Babalik ako. Hintayin mo ako aking pinakamamahal." Idinikit ng dalaga ang pisngi niya sa dibdib ng binata. Lumuluha.

" Nais kong pakinggan ang tibok ng puso mo mahal ko. Na sana ay patuloy itong tumitibok!"

" Ang puso ko'y tanging sayo lamang! Walang makaka-angking iba kundi ikaw aking Arianna."

" At ang buhay ko'y sayo lamang aking Nick. Kapag nawala ka ay bababa ako sa lupa upang hanapin ka." muling hinalikan ni Nick ang dalaga.

Maramdamin at  puno ng pagmamahal ang halik. Nagsimulang pumatak ang banayad na ulan. Lumuluha ang langit at sinasalo ng lupa! Muling nagsanib ang langit at lupa!

***

Sumapit ang dilim. Lumikas na ang mga mandirigma. Lahat ay naka-abito na may talukbong sa ulo. Marahan ang takbo ng kanilang mga kabayo. Nakasakay ang mga Ivanoff sa kanilang mga karuwahe. Dalawang araw ang kanilang lalakbayin patungong Vladivostok.

***

Sa abandonadong hospital ay nakatayo na ang lahat ng bampira. Si Jansen na ang kinilala nilang pinuno. Nasa tabi niya si Nirvana na isa na ring bampira. Patay na si Amir at naging bampira na rin. Kinagat siya ni Nirvana.