Red Moon (Complete)

Part 23 . . . Sagupaan ng mga Bampira at Taong Lobo

"Sagupaan ng mga Bampira at Taong Lobo"

-----------

Pusikit na ang kadiliman palibot sa malaking kampo. Malamig na banayad ang hangin. Tahimik ang kapaligiran. Nakahanda na ang mga mandirigma. Lahat ng may pana ay nasa itaas ng bakod na kahoy na may tuntungan na malapad. Naghihintay sila. Ang may mahahabang sundang ay nasa ibaba. Nakahilera sila. Ang makakapasok sa pinto at sa bakod ay kanilang haharangin. Lahat ay may suot ng damit na gawa sa manipis na bakal. Nakahanda na rin si Nick. Naisip niya ang kanyang ama at mga kapatid. Kung naririto lamang sila ay madali ng labanan ang mga taöng lobo. Naisip niya si Arianna. Nasa isang silid ng headquarter ang dalaga. Maya't maya ay nakaririnig na sila ng mga alulong.

" Awoooo! Awoooo! Awoooo!"

Daan-daang mga alulong.
Ang iba sa mga mandirigma ay nangingilabot sa kanilang naririnig na mga alulong. Alam nila kung ano ang kalaban pero ngayon palang nila mararanasan ang labanan ang mga taong lobo. Umakyat si Nick sa mataas na bakod. Sinabihan niya ang mga mamana na talian ng basahang may langis ang dulo ng kanilang pana. Hintayin ang signal ng taga senyas at sindihan ang basahan. Sabay-sabay ang pagpana. Sinunod ang sinabi niya ng mga mamamana. Tinignan ni Nick ang paligid ng kampo. Nakikita niya kahit pusikit ang kadiliman ng paligid. Nakita niya ang mga taong lobo. Dahan-dahang lumalabas sa gubat. Nasa kapatagan na sila. Hindi niya mabilang sa dami.

" Sabihan mo ang iba na maghanda na. Kapag malapit na sila ay magbibigay tayo ng senyas at sindihan na ang mga pana.

" Opo! Sagot ng taga senyas. Nagsindi ito ng sulo.

" Sige. Pasindihan mo na ang mga pana." atas ni Nick.

Winawaygay ng taga senyas ang sulo. Sindihan ng mga mamamana ang kanilang pana. Isa pang signal ng taga-senyas ay ini-umang na ang kanilang pana sa kadiliman sa ibaba. Nang makita ni Nick na malapit na ang mga taong lobo ay . . .

" Ngayon na!" atas niya.

Sumignal ang tagasenyas. Sabay-sabay na pinakawalan ang mga pana. Parang mga pulang apoy na lumipad sa ere ang mga pana. Pagbagsak sa lupa ay may tinatamaan sa mga taong lobo. Umulan ulit ng mga panang may apoy. Lumiwanag ang kapatagan. Nakita nila ang mga taong lobo na tumatakbo ng mabilis papalapit sa kampo. Umakyat sa bakod ang ibang mandirigmang may mahahabang sundang. Naghintay sa paglapit ng mga kalaban. Umulan ulit ng mga panang may apoy. Marami na ang natatamaan sa mga kalaban pero marami pa rin ang mga lumalabas sa gubat. Patuloy ang pag-ulan ng mga pana. Nakalapit na sa mataas na bakod ang mga taong lobo. Mabilis silang umakyat. Sinalubong sila ng matutulis na sundang. Ang iba ay nakapasok na sa kampo. Lumaban na ang may mga matatalas na mandirigma.

Nagbago na ang anyo ni Nick. Hawak ang kanyang matalas ay sinalubong na niya ang mga taong lobong nakapasok sa kampo. Sa bawat taga at wasiwas ng kanyang matalas ay may napuputol na katawan o ulo. Bumilis ang kanyang galaw. Halos hindi na siya makita ng ordinaryong tao. Para siyang ipo-ipo sa gitna ng maraming taong lobo. Nangangalahati na ang mga kalaban sa loob ng kampo. Marami na sa mga mandirigma ang namatay. Wakwak ang mga katawan. Ang iba ay putol-putol ang mga ulo, kamay at paa. Habang nakikipaglaban si Nick ay patingin-tingin siya sa kinatatayuan ng gusaling himpilan. Nakikita niyang nakikipaglaban din ang Duke at ang mga ayudante nito.

Napansin ni Nick ang tatlong taong lobo sa bubong ng gusaling himpilan. Gumagawa sila ng butas. Naisip niya si Arianna. Dagli siyang tumakbo. Nakapasok na ang tatlong taong lobo sa loob. Tumalon siya at lumapag sa bubong. Tumalon siya sa butas kung saan pumasok ang mga taong lobo. Bumagsak siya sa likuran ng dalawa.

Isang taga niya ay nasapol sa leeg ang isa. Tumilapon ang ulo. Humarap ang ikalawa. Binato niya ng punyal at bumaon sa kanang mata. Umatungal ang taong lobo. Nilapitan niya at tinaga sa ulo. Nahati ng ulo at nangingisay na bumagsak. Nakapasok ang ikatlo sa silid na pinagtataguan nina Arianna. Mabilis na kumilos si Nick papunta sa gibang pintuan. Pumasok siya.