غلطت في جزء وعاودت لحتو
حفصة(بتوتر رفعات نبرة صوتها مخرجة عينيها): وانا شنو قلت ليك انا شنوو
داغر(بصوت أجش نطق): واش مكلخة ، ولا كتكلخي عليا ،(مرر ظهر اصبعو على خذها)عصابة مكوناها في صغرك وبراهش سلخاهم جيتي كلمة كنبغيك وتقطع. ليك ريزو
حفصة(وسعات عينيها فيه ونطقات بدون تفكير): واش كدوي منيتك
داغر (هز حاجبو فيها): بنتليك كنضحك
حفصى: واش نسيتي انا شكون راني بنت عدوك ميمكنش نكون مرتك مدة طويلة واصلا باش منكذبش عليك(هربات عينيها من عليه ونطقات بنبرة منخفضة): نتا ماشي راجل لحلمت به حياتي كاملة
داغر(،تذكر كلام سمر المستفز وخا ملامحو كانت باردة ولكن عرق لفي جبينو كتن بارز كيضرب بعنف ،زير على خصرها حتى خرج أنين متألم من شفايفها وقرب وجهو نحو وجهها كينظر لعينيها بقوة): نتــي مــرتــي (ضغط على حروف جملة): وماحدي حي ولا ميت غتبقاي على ذمتي ولنسميه راجل يحط كنيتو حدا سميتك من هادي شهرين ونتي حفصة ال اوصمان ديرها في وذنك
حفصة(نظرات لعينيه وصرخات بانهيار صبر ): ايوااا اش كتسنننى منني ااش !!! علااش باغيني نجاووبك على هدرتك لمعندها معنننى انا وياااك ميمكننش نكونو ميمكنننش بجووج وخااا نبقى معاك مية عام ولا كثرر عمرك غتسمع مني هاد كلمة وعمرري نسمح لراسي كنبغيييك
داغر (صرخ عليهة بغضب وعينيه صبحو حمرين ): بزز منك بززززز
حفصة : كيفااش بزز شد قلبي خرجو وخليني نبغيييك راه ميمكننش كتعرررف شناهيااا ميمكننش نتاا مجرم قتال فلوسك حراام حيااتك ظلااام مستحيل نكمل معاك !! وحتى لكملت راه غير بزز مني نتااا عارف اول فرصة ليا لجاتني نهررب غنهررب مغنكذبش عليك ولا نرخخص راسسي قللت ليك الحقيقة
الفا(هز رأسو كينظر سقف سيارة كيحاول يهدأ نفسو وهي على حضنو كان وجهها حمر بالغضب،نطق بهدوء): كنتب قادرة تسخري منين اعتارفت ليك كيف مولفة ديري ولا تفرغي غضبك في ديك لحظة لكن نتي سكتي وخرجتي(هز رأسو فيها كينظر ليها): علاش
حفصة(بلعات ريقها وهربات عينيها من عليه كتنظر لنافذة):مبغيش نجرحك قدام صحابك
الفا(قرب ليها وجهو حتى صبح جبينو موضوع على جانب راسها وفمو على اذنها وهمس ليها بنبرة رجولية زعزعاتها): نتي ماشي من نوع لكيراعي مشاعر واحد خصوصا لكان قتال مجرم ومافيوزي
تلاثة كلمات أخيرة لوصف بهم حالو كان كتقفز في بلاصتها وكتزير على يديها المتعرقة،بلعات ريقعا بصعوبة وهي كتشعر بغصص ماشي غير غصة في حلقها
ألفا: عينــيـك عليا حفصصة
حفصة(عينيها مزالين على نافذة كتنظر لتمثال لفي الحديقة،ونطقات بتلعثم): مبقيتش بغيت نسافر غنبقى مع شيري
الفا: حفصصصة عينييك عليا دويييت
قلبها كان كيترعد وهي في مكنها شعرات بالدموع على اطراف عينيها ،غمضاتهم منين شعرات بنفسو الساخن كيصطادم من رقبتها لكانت مغطية بالزيف ولكن حرارة غضبو وصلاتها
الفا(عينيه على شفايفها): دوييت معاك متخلينيش نعاودها
من خلال نظراتو لثغرها كان قاصد من كلامو انه غيعاود قبلة،شعر بها بعدات رأسها على خاصتو ونظرات ليه بعينين مغمورين بالدموع
حفصة(استنشقات هواء مصفية تفكيرها): هاننني شفتتت فيييك شبااغي
الفا: كتبغيني حفصة
حفصة(بنبرة واثقة رامقة رماديتيه بثقة): مكنبغيكش
الفا(ضغط على حروف ومزال مع اتصال بعينيها): كتبــغيني متنكرييش
حفصة(فتحات فمها ونطقات بارتعاش حيث نظراتو الحادة كانو كيطحيو من اسوار لبناتها حول عينيها باش ميقراهاش):م..مكنبغيكش
الفا(زير على كتفيها بيديه وهمس هاد لمرة شفايفها وعينيه عليهم): متكذبيش على راسك عاف طبعك وشخصيتك وإلا مكنتيش غتهربي (هز عينيه نحوها ونطق بهدوء رامي قنبلتو عليها): كتبغيني لخوافة
حفصة(غمضات عينيها وعضات على شفايفها مسحات دموعها باش مينزلوش رافضة تكون ضعيفة امام اعترافو ولا كلامو): مكنبغيييكش غير بعد منني عفااك ياك عمري طلبتك ايوا بعد على طريقي عفااك قابلة نكون أسيرتك وفي هاد القصر نعيش غير متبغينيش متمسنيش متشوفنيش على شكل مراتك في فرااش منقدررش نحمل ذنب ثقييل على ظهري ميمكنش نكون أنانييية ونمشي تابعة حبك ولا اعتراافك
الفا(نظر ليها بهدوء لعينيها ): دايرك ملكة في قلللبي نتتتي بوحدك من دووون نساا اختاريييتك ، عارفة شحال من وحدة متمنية تكون في مكانك مراة كابو كازانوسترا وكنعاملك بحال شي اميرة مخليك ديري مابغيتي حاجة وحدة منك بغيت لا انتقاام لا والو ، كوني مرتي فعليا كوني عائلتي شنوو حاجة لمخليياك خايفة حتى بااك حفصة نقددر نبعد منو ونسا انتقاام وخا هذا أمر محرم عليا وحلفت أنني نقتل لقتل عائلتي ومعاك نتي طيحت من كلمتي لأول مرة غير على قبلك
حفصة(نزلات عينيها كتنظر لصدرو ونطقات بشرود): عارفة انك كتبغيني ولو كنت في آخر دنيا غنموت غتنقذني عارفة غتنقذني على حساب حياتك متأكدة غتكون اب مزيان في مستقبل لولادك وعارفة أنني غنتصرف كيف مابغيت وغنكون ملكة في عينيك وفي قصر وفي اي بلاصة ديالم ولا فيها نتا متصورة حياة لبغيتي توصل ليا من هدرتك ولكن(هزات عينيها فيه): منقدرش نغضب ربي يلا ربي بتلاني أنني مسجونة عندك فأنا راضية على قدر الله ولكن باش نجيب ولاد منك ولغيتبعو هاد ضومين مستحيل تقول ليا مغيخرجوش ليك وانا عارفة غتكون قدوة ليهم بشخصيتك ومعاملتك ولكن هادشي ماشي كلشي داغر عارفة غنعيش ملكة معاك ولكن غير في دنيا اما آخرتي غنضيعها ونغضب ربي ونصدق جايبة ولاد لغيزنيو، يفسدو يسرقو ويقتلو روح لحرم ربي ،انا بغيتهم يزكيو يعاونو ناس بغيتهم يحفظو قرآن(مسحات دموعها): ويحطو ليا تاج فوق راسي يوم قيامة فين نتباهى بهم قدام ناس، منقدرش داغر وحتى ولا نفسي انجاذبت ليك غنعفط على قلبي وندعي الله لهو مبدل قلوب أنني منوقعش في حبك كثر،انا أنانية فشي اوقات بصح ولكن منقدرش نغامر بولادي ونغضب ربي لرضاني وحقق ليا دعاوي ديالي هاد سنين كاملة ،ربي هو لحماني من بطشك اول يوم نتا وخوك كيفاش بغيتيني نسا ونكون معاك جاوبني واش باغيني نتعذب لكنتي كتبغيني نيت تفهمني وتفهم عذري
مسحات انفها ودموعها بكم فستانها وهزات عينيها كتنظر لسقف سيارة مبغاكش تبكي كثر من هكذا كانت صريحة معاه وخبراتو من مخاويفها متنكرش تمناه اي مراة بشخصيتو رجولية وكلمتو لكيوفي بها لكن هو في طريق كتأدي هلاك وهي كتبحث على استقامة في حياتها ميمكنش ترضي نفسها وعبد وتعفط على حدود الله لبناها ، داغر وخا مسلم بالفم ولكن افعالو ملطخة بدم ابرياء ميمكنش تقبل تعيش مع مجرم
داغر(زول يديه من على خصرها ونطق بهدوء مخيف): فهمت
حفصة(بغات تفتح سيارة): غنزل منتقلش عليك في سفرك
قاطعها كلامو البارد
ألفا: لابغيتي تسافري بقاي
هزات عينيها ولمحاتو كينظر أمامو ببرود وبملامح فارغة،قامت بتوتر من عليه وجلسات حداه ويديها كيترعدو ماشي من خوف ولكن باش تخرج مشاعر لفي قلبها وتخبرو بالحقيقة جاتها صعيبة وخصوصا شخص بحال ألفا صعيب يتقبل الرفض غير صمتها وعصبو بقا غير لقالت لا ورفضاتو وهو لكامل مكمول بالنسبة لإيطاليين
ركب سائق لقاد سيارة بهدوء وبحال شي روبو مالقى لا سلام او حتى كلمة وحتى واحد فيهم هما بجوج كانو باغين يسمعو صوت شخص تالث، ضغط ألفا على زر كان جانبو لحجب الرؤية وحتى سمع بينهم وبين السائق،مسحات على وجهها وهزات عينيها فيه بتوجس كتراقبو بنصف عين وعلى ملامحها الحزن بغات تقول ليه خرج من هاد عالم وتوب مغترفضوش وغتكون فرحانة تعيش معاه ،لكن هو الكابة ماشي شخص عادي كنتكلمو عليه واحد من منظمات السبع ،كانت طاحت عليها هاد فكرة سابقا ومنين درساتها عرفات انها فاشلة مليون بالمئة وقررات تحكم بقلبها وبنفسها ولو انها اضطرات مستقبلا تحبو بلاهواها فراه يمنع عليها تجاوز الحب
قاطعها من جديد صوتو لخرجها من دوامة افكارها
الفا: نساي لوقع بارح ويوم ، غلط منين وقعت في حب مؤمنة(نظر لعينيها): كيف بغيتك غنحيدك متلوميش راسك ونساي لوقع
ضراتها ديك كلمة غنحيدك ولكن هذا هو الصواب خاص ينساها ميعلقش أمالو عليها وشخص بحالو خاصو مرأة من عاامو ميلوثش مرأة من النور بظلامو
حفصة(بلعات غصة لفي حلقها ونطقات): حسن ليك
الفا(عينيه على طريق): قصتي من رعد الفارسي مكملاتش وغنتاقم منو
هاد الجملة اختارقت قلبها، تذكرات نظراتو وخا باردة كانت مثقلة بالمشاعر وكانت كتحمل رجاء خفي انها تقبل تكون مرتو على ورق وعلى واقع ، اكبر هدف في حياتو ولمخليه عايش هو انتقام كان مستعد يتخلى عليه على قبلها باش يكون عائلة معاها ،عائلة لدمرات من طرف باها كيف كيزعم،كانت عندها فرصة تحبس مسألة انتقام لكن ماشي حل هذا
حفصة: بين وبين بابا
سند مرفقو على حافة زجاج نافذة واضع كفو على ذقنو مركز انظارو في الطريق وبقربو حفصة لمحسات دموعها وكتهمس بأيات قرآنية لغتهدأ قلبها لممتن ليه انه ممبزش عليها تكون مرتو في فراض وخيرها ممتن ليه على هاد حركة وهو عدو قانون
ايمان: مريم مرييم نوووضي واش خطااب غيجيو يوم ونتتي مززال نااعسة
مريم(بصوت نعس): ماما فيا نعااس
ايمان: ايوا بننتي نتي جاية حتى وحدة ليل وكملتي سهرة حتى خمسة صبااح نووضي خلااااص راه جوج هادي امتاا غتوجدي
مريم(تكات على ضهرها كتمسح عينيها بنعاس،فتحات كترمش بانزعاج للشمس لوصلاتها بعد مافتحات ايمان ريدو): ماما هبطيه حتى نوض
ايمان: وراه خطااب قريب يجيو شوفي حالتط كيف دايرة
مريم(وسعات عينيها بصدمة منين استوعبات كلام ايمان): اويللي ياسين(ب جلسات بصدمة على سرير): شحاال ساعة اويلي على جوج
ايمان: من قبيلة وانا نفيقك دخلي دوشي يالاه داك شعرك يوجد زرربي خلاص
ارتان(متكي على الباب بشكل جانبي): انا مدخلاتش ليا هاد خطبة راسي بنتي مشفتها حتى نهار كامل جا واحد بغا يخطبها
ايمان(التافتت نحوه رامقاه بعدم تصديق): بحال نتا نعارفش علاش طلقوها تجي غير على قبل خطبة وراك سمعتي كلام نادر واقفو حيث رجل لغيخطبها منصب ديالو قوي
ارتان(بعدم رضا): مالو على زربة صبر يومين على اقل
ايمان (قربات نحوه واضعة يديها على خصرها كترمقو بعبوس): ارتان راه مجاياش عطلة نحمد الله ونشكروه شفناها عقلتي مكنا غنشوفوها حتى دوز عامين نسيتي ؟ بعدا خطبة نهار وغتقضي باقي ايام معانا
ارتان:ان شاء الله
قمر: با فين هي ماما
ارتان (التافتت للخلف لمحها محمولة من طرف اسراء): كتعوم عينين جدها اجي نهزك(هزها بين يدو وقبل خذها):شفتي ماماك جايينها خطاب
قمر(عينيها لمعو بفرحة منين نعسات ليلة أمس في حضن مريم خبراتها ان ياسين هو لغيخطبها): هه عرفت وانا فرحانة حيث غيولي عندي بابا
ارتان: شنو دابا نتي في صف جداتك ها بغيتي مريم تخوي عليا
قمر: ماما مغتخويش دار قالت ليا غترجع خدمتها
ايمان: يلاه براكة من هضرة سي ارتان شفتك باقي موجدتيش ونتي قمر اجي نلبسك لبيسة زوينة(رفعات صوتها): مريم متعطلييش بزااف باش تقادي راسك
مريم(من خلف باب حمام): وخا ماما سمعتتك
نازلة من دروج لابسة فستان اسود اللون مع سمطة من جنب كتحنل علامة LV باللون الابيض ةعليها حجيرات من الماس صغيرة مزيانة بها ،في رجليها كانت مرتادية صندالة بيضة مطابقة لمونطو لحاملاه في يدها ،شعرها كان مجموع للخلف على شكل كعكة منظمة وفي يد ثانية صاك صغير على شكل بسطام من نفس علامة الفستان باللون الأسود ، نقلات زرقوتيها نحو ياسر لواقف قدام توأمو كيقاد ليه ربطة عنقو وعلى فمو ابتسامة جد واسعة واصلة حتى لعينيه لغامراهم السعادة
ياسر (ضرب كتف ياسر بمزاح): هكذا غطيحها سااطا وطيح والديها غتبان ليهم معقووول ورمزن وعندك تخلي شعرك يهبط على جبهتك باش تبقى مهيب عشيري(عض على شفايفو وهو كيشعر بنبضات قلبو كضخ في عروقو بعنف): ناري سااط كنحس براسي انا لغنخطب عنداك تلف ولا تحير هانتا شم هوا مزياان ومتخافش راه عندي خبرة في هاد أمور حتى لخفتي راسك تزبلها خلي غير واليد يدووي ولا لواليدة وعندك تبقى تحنزز فيها قدام باها لا غيرفض شوف في لرض وربع يديك سمع هضرة
رياض: باش يبان نعجة ياسين وريهم انك قاصح ومكتحشمش باش باها ميقدرش يقول لا وحمرر فيه شوفة فهمتي
غيثة(ربعات يديها كتنقل انظارها بين ياسر ورياض لطانو جديين في كلامهم): وااش مرضتو ولا شنو باغين تخرجو على دري باقي مدار حتى بسم الله عنداك ولدي ياسين تعامل كيف نتا متبدلش من راسك واصلا مية وحدة تمناك يلا رفضوك هما لخسرو ماشي نتا
نور(بهدوء): ياسين (نقل ليها انظارو) لاكنتي كتبغيها وكتبغيك غيدوز كلشي بخير متوترش
ياسين(ابتاسم ليها بدفء وفتح ليه ذراعو باش تقدم نحوه): اجي عندي (عنقها بشكل جانبي وقبل جبينها): الله يرضي عليك
رياض(نظر ليها بفخر): شفتي بنتي كتعرف تنصح حسن منك الدحش(ضرب قرذافة ياسر): كبر منها بربع سنين وكتعرفوي حسن منك
ياسر:نسيتي راسك واليد كتعاونو يكون مسخوط ولا شي حد دار معاك هاد بلان منين يخطب نور تفع لمو لعين قول كذبت
رياض: وراه ولد ارذوجان
ياسر: امم لسمعاتك جدة تقول كنيتنا فيها ذهب
رياض: على كيجاتك
ياسر(نظر لنور لمعنقة ياسين مخشية في حضنو): ياك بنتك كتعرف دوي حسن مني نزوجوها ونفرجو بها ونشوفوها مع راجلها
رياض(خسر سيفتو): هداك سير بعد من طريقي حسن ليك شهاد تخسار الهضرة بنتي تزووج!! وانا معامن نبقى
ياسر(هز يديه لسما): ياربي وبدية هاد عام وكيف حققتي ليا امنيتي وحيدة جيب لغيتزوج بختي بزز من رأي واليد يارب
مجد: أمين
التافتت مريم ورياض نحو مصدر الصوت ولمحو مجد نازل مع حسنا لمرتادية ملابس سوبر أنيقة واضح من ملابس مجد الراقية ولكتصرخ بالثراء انه لابس على ذوقها
ياسر(ابتاسم لمجد وعنقو عناق رجولي حيث بارح مشافوش منين جا معطل بليل): فين عشيري توحشتك سااطا وتوحشت مصايبك
مجد (بادلو لعناق وربت على ظهرو مبادلو ابتسامة صادقة مرسومة عليه): حتى انا سمعت ليلة راس عام دازت مكتنساش في روسيا
ياسر(خرجات تنهيدة من شفايفو): في ليلة لقيت راسي اب
غيثة(قطبات حاجبيها والتافتت نحوه بسرعة): كيفاش اب
ياسر(رمش عينيه بسرعة): اب اب زعما لمشيشات ربيت مشيشات زونين تم صغيورين لقيتهم مليوحين
غيثة(ظهرات راحة على ملامحها): اه خلعتيني الزهواني وياك شي مرة يزغبك الله وتجيب ليا ولد حراام راه نقتتلك
ياسر(بلع ريقو وهو كيتذكر مصيبة دڤاسيلي لي لاصق فيه): الله اودي غيثة مااي مسخوط
حسنا: هداك زامل تلقايه والد ربعة في افغانستان وجوج تلقايهم ماتو بسباب ح*وي ح*وي
ياسر: جدة العمر ديالي توحشتك ضبرت ليك على جوج تيتياز صدق الله ماتو
حسنا: تافين عمر حمارة بوك جبتتي خباار مݣودة قود قود غنمشي مع ولدي ياسين نشوف لعروسة لعندها شي جد عازب ولا شي اخ بوݣوص مهم يكون داكشي يعمر لي العين
ياسين(قاطعهم بهدوء): حتى نرجعو وندويو يلاه نمشيو باش نوصلو في الوقت
حسنا: مزرووب على رزقك
ياسين: نعم جدة
حسنا(كتحشم تخسر هضرة معاه): والو ولدي يلاه نمشيو نشوفو هادي لطيحات لينا سبع ووقفاتو ليك
ياسين(جر معاه نور لتحركات معاه وبدا كيسألها على احوالها وهي كتجاوبو بكل حماس): توحشتك وبالي بقا مشوش معاك ليلة رأس عام ياك كلشي داز بخير
نور: بخير غير منين ضربتي بقينا مشوشين معاك
ياسين: انا مزيان متخافيش على خوك الكبير
نور: متبقاش تقول هاد جملة نتا بنادم ياسين(هزات عينيها فيه): هادي هي جملة لكنتي كتقولها في صغرنا ديما هاد نهار نسا انك خونا الكبير وعيش حياتك
ياسر(وضع يدو حول كتف ياسر ووسطهم كاينة نور): عندها الحق سااط فرحتنا منين تجاوزتي ماضيك العقبة لينا
ياسين(نظر ليهم بسكون): غتجاوزوه أنا متأكد وديك منظمة مغتستافد والو
نور: نسا علينا منظمات خلينا هاد نهار فرحانين معاك
ياسين ابتاسم ليهم وصعد لسيارتو بقربو ياسين وخلفو نور لطلقات اغنية treat you better
ومعادتها هب وياسر كانو كيغنيو بحماس وياسين كيسوق بهدوء مع ابتسامتو الهادئة، اما في سيارة رياض كان هو لجالس في مقعد السائق وبقربو غيثة لكدندن بسعادة وهي كتخيل خطبة كيف غدوز وفي المقعد الخلفي كاينة حسنا ومجد لكيقمرو في تليفوناتهم
حسنا:هداك طويل عجلات راه مرانهة ببزازلي زير الطرح وخلينا نربحو
مجد: لخسرنا اش غيوقع بحال هما عندك
حسنا: الله يقلل حياك *** اجي نوريهم ليك وقووول. واش عندي
مجد (ابتاسم ليهم بخمول وعينيه كيلمعو بسعادة شيطانية): راه باين حسنا من هنا وريهم منهم يشوفوهم رياض راه خبير في هادشي
حسنا: الله يقلل حياك الله يقلل حياك لكيدار وربح لمنراهن بتبك وشوف لمدرتهاش نخليك مريوة في اخر يامك وشوف شكون تقبل عليك ،
مجد: بنت ارذوجان هي لغتقبل عليا
حسنا: وخا تكون قحبة بتلات
هاد حوار كامل داز كتابي في موقع القمار لخاص بالاثرياء والعالم شهد على محادثتهم اما في سيارة كانو صامتين مركزين في هواتفهم
ايمان: اسراء فرشي هادو فوق طابلة يلاه بنتي فيسااع
اسراء: وخا ماما هاني غير بشوية مبتقايش خايفة
ايمان: قرب يوصلو وكنحس باقي بزااف حوايح ناقصين
نادر(كيعاونهم في توجاد): راه كلشي هو هداك لالة ايمان وزيدي عائلة لغتجي عندك مافيهمش حضية بزااف
ايمان(مسكات يدو وقرباتو نحوه هي وتالا ويونس لخاشين وجههم في اي تبرݣيݣة): ولدي نادر قول ليا واش هاد ناس مزيانين وهداك لبغا يخطب مريم واش ظريف مبغيتش بنتي تعذب مع شي واحد يكون قليل اصل؟
نادر(ابتاسم ليها بصدق): عمري حلفت ولكن غنقسم ليك داك السيد معقول ومقال انه بغا يتزوج ببنتكم حتى وهو واعي بمسؤولية وعائلتو الله يعمر ليها دار منين غيدخلو يدوي معاكم غتعرفوهم
ايمان(ابتاسمت براحة): ان شاء الله ان شاء الله قلبي غبسكت تفكرت خطبة رانيا الله برحم عدنان ياربي كان دري ظريف
تالا : امبن ولدي نادر قول ليا هاد ولد شنو سميتو وشكون عائلتو خايب ولا زوين عندو فلوس ولالا
نادر(نقل عينيه نحو باباه لكان كياكل زريعة وكينظر ليه بفضول): نتوما هاد جوج ربي جاب كل واحد فيكم من لخر دنيا فولة وتقسما على جوج
تالا(نظرات لإيمان): شوفي مسخووط شكيقول وعقل فيها ولدي نادر عقللل
ايمان(التافتت نحو رانيا لخرجات من كوزينة بعد ماوجدو ماكلة و المقبلات جابهم من باتيسري ): ىانيا سيري عاوني ختك غتلقايها دايخة
رانيا: وخا ماما ومنها نلبس حتى انا
صعدات للأعلى نحو غرفة ختها،فتحات الباب ولمحاتها لابسة بينوارها الوردي وكتنظر لفساتين لعلى سريرها بحيرة،التافتت بقلق نحو باب وزفرات هواء براحة منين لقاتها ختها الكبيرة
مريم: رانيا مزيان منين جيتي محتاجاك
رانيا(غلقات الباب وتقدمات نحو ختها): فاش نعاونك حبيبة ديالي
مريم: معرفتش شنو نلبس حايرة وتلفتت ومبقى والو يوصلو ومدرت والو
رانيا: بعدا ياك قاديتي وجهك
مريم: درت ماكياج غير خفيف
رانيا (ابتاسمت برضا لشكلها ): جيتي فنة طايح عليك السر في وجهك اجي نشوف هادشي (كان جوج كسوات وحدة زرقة واخرى بيضة): عرفتي شنو متلبسي حتى وحدة فيهم حيث غير غادي يهضرو وعائلات غيتعارفو لبسي غير فراشة تكون مجموعة من صدر والكرش(نظىات لقمر لجالسة فوق سرير): اه لبسي بحال ديال قمر لكنتي شريتي في العيد وملبستيهاش
مريم(رمقاتها بتوتر): زعما تجيني زوينة؟
رانيا (ابتاسمت ليها باطمئنان): غتجيك كتحمق
توجهات مريم لپلاكار جبدات فراشة مجموعة من جيهة الصدر والخصر ،التافتت لمحات رانيا كتلعب مع قمر عاطياها بالظهر،زولات بينوار بسرعة كانت ديجا لابسة ملابسها داخلية ولبسات فراشة لاختارت ليها رانيا وتوجهات ،واقفة قدام مراية مخرجة شعرها لصيباتو بوكلي برازيلي من الاسفل
مريم: رانيا اجي حزمي ليا هاد خيوط لور
رانيا(وقفات خلفها وعقدات ليها خيوط): لزيرت عليك بزاف قوليها نرخف
مريم: لالا صافي عقدة مزيانة
قمر(قامت بتعب كتمشى نحو مريم بخطوات بطيئة): هه ماما لبستي بحالي
مريم(رمقاتها بحب وهزاتها بين يديها كتنظر لانعكاسهم عبر المرآة):اء شفتك جيتي حسن من ماما كبيدة ديالي
قمر: هه حيث انا قمر
مريم(طبعاا قبلات متفرقة على خذها بقوة): يخليك ليا حبيبة ديالي والله يطول في عمرك
تفتح الباب بعنف وقبل ماتوبخ رانيا اسراء كانت سبابقاه وهي كتصرخ بحماس
اسراء: راهم وصلو طموبيلاتهم قدام باب وناري واعرين بزاف باينة لباس عليهم
توجهات رانيا وقمار بفضول نحو نافذة مريم وخلفهم مريم لوقفات فوق سريرها كطل هي وقمر لحاملاها كيبحثو بعينيهم على ياسين
مريم(كتشعر بالخلعة شاداها من صبعها الصغير): صافي غنموت مافيها شك قلبي غيحبس
رانيا(عقدتت حاجبيها بتشويش): بحالا فايتة شايفاهم لا
مريم(شعرات بحرارة في حلقها منين لمحاتو خارج من سيارتو ومد ليها واحد من بوديكار بوكي ديال ورض وصاشية متوسطة الحجم هازها في يدو وكل واحد من عائلة هاز معاها بعض من كادوات خلات رانيا تهز حاجبيها بإعجاب من سخائهم
اسراء(بصدمة):بلاتي ماشي هداك لكان بغايضربك من طموبيل
رانيا(شافت في اسراء بصدمة مبادلة): وكنقوول فين شايفاهم فكريني فشنو سميتو
قمر(نظرات لياسين بسعادة وصفقات بحماس): بابا ياسين جا
اسراء ورانيا(نطقو بتذكر في نفس الوقت): سميتو ياسين
اختافت الضحكة من على وجهم وهزو عينيهم في مريم كيرمقوها بجمود
رانيا: متقوليش هو لجاي يخطبك
مريم(دورات عينيها بخجل واحراج منهم كتنظر للحيط)
اسراء: اويلي ياك مكنتش كتحمليه وكتكرهيه وشحال دعيتي فيه شنو وقع
رانيا: انا بغيت نعرف غير بابا وماما لحلو عليهم باب كيفاش غيستقبلوهم