ရွှေအဆင့်နည်းပြ

Part 111

Chapter 111 : အကဲဖြတ်ခြင်း

လက်ရွေးစင်လေ့ကျင့်ရေး တတိယနေ့နေ့လယ်တွင် ကစားသမားများသည် စားသောက်ရန် စားသောက်ဆိုင်တွင် စုရုံးကြသည်။ ယယ်ကျင်းမင်၏ အံ့အားသင့်နေသော အမူအရာကို မြင်လိုက်ကြပြီး လောင်လင်းသည် ရယ်မိသွားသည်။ "ဘာဖြစ်တာလဲ။ အနက်ရောင်အခန်းလေးထဲက သစ်ရွက်သေအဖြစ် နှိပ်စက်ခံရတာလား"

ယယ်ကျင်းမင်သည် ရှုပ်ပွနေသော ဆံပင်များကိုကုတ်ခြစ်ကာ ခါးသီးသောအမူအရာဖြင့် ပြောလိုက်သည်။ "Old Changက အရမ်းပုန်းတတ်လွန်းတယ်။ တစ်ခါတစ်လေသူက ကြွက်လားလို့ တွေးမိတယ်။ သူကအပေါက်ထဲဝင်ပြီး ပုန်း‌နေနိုင်လို့ ဆယ်မိနစ်ကြာတာတောင် ရှာမတွေ့နိုင်ဘူး"

ကျိုးယီရန်သည် သူ့အားပြုံးပြသည်။ "ငါမင်းကိုတစ်စက္ကန့်ထက် ပိုမသနားဘူး"

ယယ်ကျင်းမင်: "......"

ပိုင်ဖန်းသည် ပန်းကန်ပြားတစ်ချပ်နှင့် ဝင်လာပြီး သူတို့စကားပြောသံကို ကြားလိုက်ရသည်။ ယယ်ကျင်းမင်၏မျက်လုံးများအောက်မှ မျက်ကွင်းညိုညိုများကို သူမြင်ပြီး သနားစိတ်နှင့်ပြောလိုက်သည်။ "အနက်ရောင်အခန်းငယ်လေးမှာ အစ်ကိုယယ်ရဲ့ အထူးလေ့ကျင့်ရေးက သိပ်ချောမွေ့ပုံမပေါ်ဘူးလား"

ယယ်ကျင်းမင်သည် သူ့နားထင်များကို ပွတ်သပ်လိုက်သည်။ "ငါအဆင်ပြေပါတယ်။ မြေပုံအမျိုးမျိုးကို လျှောက်သွားပြီး ခေါင်းမူးနေတာ။ ရွှယ်ယောင်ကပဲ သနားစရာကောင်းတာ။ Old Cuiကသူ့ကို ပစ်ဖို့သင်ပေးပြီး ရွေ့လျားနေတဲ့ပစ်မှတ်မှာ 7ကွင်းထက် ပိုမြင့်တဲ့ 10ကွင်းကို ပစ်ဖို့ပြောတယ်လေ။ သူက အဲ့ဒါ‌တွေအားလုံးကို လွဲ‌ချော်နေပြီး မနေ့ညက လေ့ကျင့်ရေးခန်းထဲထွက်လာချိန်မှာ သူငိုတော့မှာကို တွေ့လိုက်ရတယ်"

ပိုင်ဖန်းမှာ အလေးအနက်ပြောခဲ့သည်။ "ဆရာတင်းကြပ်တာ မှန်ပါတယ်။ ကျွန်တော်တို့က လက်ရွေးစင်ကစားသမားတွေပဲ။ ကျွန်တော်တို့က အားလုံးဆော့နိုင်တဲ့သူမဖြစ်နိုင်ပေမယ့် ထင်ရှားတဲ့ချို့ယွင်းချက်မရှိရဘူး။ အခု လေ့ကျင့်ဖို့ အချိန်ရှိပါသေးတယ်"

ယယ်ကျင်းမင်သည် ပိုင်ဖန်းကို မျက်စောင်းထိုးလိုက်သည်။ "မင်းရဲ့ဆရာကို ကာကွယ်ဖို့ စလုပ်နေတာလား။ ဘယ်လိုပဲဖြစ်ဖြစ် မင်းရဲ့အမြင်မှာ သူလုပ်သမျှဟာ မှန်တာ‌လေ"