“ကောင်းကင်ဆုတ်ဖြဲခြင်းလက်...”
မုပါ့ထျန်သည် ချက်ချင်းပင် သူ၏ အပြင်းထန်ဆုံးသော တိုက်ခိုက်မှုကို အသုံးပြုခဲ့လိုက်သည်။
ထိုတိုက်ကွက်သည် ရှေးဟောင်းအပျက်အစီးနယ်မြေတစ်ခုအတွင်းမှ သူ မတော်တဆ ရရှိခဲ့သော ကျင့်စဥ်တစ်ခုဖြစ်သည်။ ယခု သူသည် ၎င်းကို နှောင်းပိုင်း အင်ပါယာနယ်ပယ်အဆင့်အထိ ကျင့်ကြံထားခဲ့ပြီးဖြစ်သဖြင့် အင်ပါယာအထွတ်အထိပ်အဆင့်မှ လူကိုပင် ယှဥ်ပြိုင်တိုက်ခိုက်နိုင်သည်ဟု သူ့ကိုယ်သူ ယုံကြည်မှု ရှိနေခဲ့သည်။
လီကျန်းထျန်သည် သူ့အား ယှဉ်နိုင်မည်မဟုတ်ဟု သူ ယုံကြည်နေခဲ့သည်။
မတိုက်ခိုက်ခင်ကပင် လီကျန်းထျန် လေထဲလွင့်ပျံနေသည်ကို သူ မြင်နေရပြီဖြစ်သည်။
ဒေါသတကြီး တစ်ချက်ဟိန်းဟောက်လိုက်ပြီးနောက် ကမ္ဘာပေါ်ရှိ ဝိညာဉ်ချီ စွမ်းအင်များသည် ချက်ချင်းပင် သိပ်သည်းလာပြီး လေထဲတွင် ကြီးမားသော လက်ဝါးကြီးတစ်ခု ဖြစ်ပေါ်လာပြီး ကောင်းကင်နှင့်မြေကြီးအား ပိတ်ဆို့သွားတော့သည်။
ဤဖြစ်စဉ် ပေါ်လာသည်နှင့် တပြိုင်နက် ဟင်းလင်းပြင်တုန်ခါသွားသည့် အသံတစ်ခု ထွက်ပေါ်လာပြီး ထိုလက်ဝါးကြီးအတွင်း၌ တာအိုသံစဥ်များပင် စီးဆင်းနေသည်ကို မြင်ရနိုင်သည်။
ထိုပြင်းထန်သော အရှိန်အဝါကို ခံစားလိုက်ရသောအခါ အနီးရှိ ပရိတ်သတ်များအားလုံး တုန်လှုပ်သွားကြသည်။
ထိုတိုက်ခိုက်မှုမှာ ကြောက်စရာကောင်းလွန်းလှသည်။ အကယ်၍ ၎င်းတို့သာ စင်ပေါ်တွင် ရောက်နေခဲ့လျှင် ထိုတိုက်ခိုက်မှုအားထား၍ ထိုတိုက်ခိုက်မှု ထွက်ပေါ်လာသည့် တုန်ခါလှိုင်းများနှင့်ပင် ၎င်းတို့ကို သတ်ပစ်ရန် လုံလောက်ပေမည်။
လီကျန်းထျန်မှာ ထိုတိုက်ခိုက်မှုကို ခုခံနိုင်မလားဆိုသည်ကို သူတို့ မသိခဲ့ကြပေ။
ထိုအချိန် လီကျန်းထျန်၏ မျက်နှာပေါ်တွင်လည်း လေးနက်သော အမူအရာများ ထွက်ပေါ်လာသည်။ မုပါ့ထျန် တိုက်ခိုက်လာသည်ကိုမြင်သည်နှင့် သူသည်လည်း လျှပ်စီးဆွဲဆောင်ခြင်းနည်းစနစ်ကို ချက်ချင်းအသုံးပြုခဲ့လိုက်သည်။
