Loving My Brother #2: Who's Thrizel?

Chapter 101:

Thrizel’s POV

Matapos kong batuhin si Thrale ng unan sa mukha ay niyaya ako ni Brooks bumaba. Ngayon ay nandirito kami sa buhangin, nakaupo. Pinapanood ang mga taong naliligo na nagbabakasyon din ngayon dito. Sa aming gilid ay sila Arella na naglalaro. Hinihintay ko lang umimik ang aking katabi dahil kanina pa kami nandirito.

“Sa tingin mo nagkaayos na kaya ‘yong dalawa?” Panimula niyang tanong habang nasa malayo ang tingin. Seryoso ang kaniyang mukha.

“Sila Ryke at Blue ba?”

Dahan-dahan siyang tumango.

“Nasaan ba silang dalawa ngayon? Kanina ko pa hindi nakikita si Blue.” Naglagay ako ng buhangin sa aking tuhod. Pinaglalaruan ito.

“Masarap maging kapatid si Blue, sobrang galang.” Parang may naisip siya kaya ito napangiti. “Minsan kasi may pagkakamali rin tayo, hindi maiiwasan ‘yon. Gusto kong magkaayos ‘yong magkapatid na ‘yon. Pasimpleng nagagalit si Blue sa kaniyang kuya. Kapag magkasama kami nagkukwento tungkol sa kanilang dalawa. Naalala nga raw niya noong bata pa sila, naihi siya sa higaan. Si Ryke ang sumalo n’on, edi si Ryke ang napagalitan.”

Nagsalita rin ako. “Halata naman kay Ryke na napakastrikto, protektadong-protektado ka. Naramdam ko ‘yon sa kaniya noong nililigawan niya ako.” Sa aking sinabi, bigla akong nilingon ni Brooks ngunit nilihis naman agad.

“I know Ryke, para siyang si Link kung umasta. Nang gustong kausapin ni Ryke ang kaniyang kapatid, pagkatapos n’on ay hindi ko na sila nakita. Mukhang hindi yata sila nag-usap dito. Nilabas pa yata ni Ryke si Blue sa resort.” Napabuntong hininga siya. “Kapag may ginawang kalokohan si Ryke sa alagad ko, hindi ako magdadalawang isip na sapakin ‘yon. Ayokong umiiyak ang lalaking ‘yon. Gano’n kasi siya dati, problemadong tao kaya umaasa akong magkakaayos sila.” Napatingin siya sa buhangin sabay baling sa akin. “Ikaw, Thrizel. Kailan kayo mag-aayos ni Thrale?”

Natigilan ako sa kaniyang tinanong. Hindi agad ako nakasagot. Paano ba makipag-ayos? Wala akong ibang nararamdaman kun’di galit kay Thrale. Wala akong ibang nais kun’di ang gantihan si Arella. Mapapanatag lang siguro ako kung nakuha ko na ang aking gusto. Gustong-gusto kong maramdaman din ni Thrale ang naramdaman ko n’on. Sa totoo lang, nag-uumpisa palang ako.

“Wala akong balak makipag-ayos. Malaki na kami, normal lang ang ganito. May mga gusto na kaming gawin sa buhay. Magkapatid pa rin naman kami, minsan nga lang magpansinan. Mayroon namang gano’n. Kung ano ‘yong dati, malabo nang maibalik ‘yon. I’m okay with that. Hindi na kailangan umasa.”

Napatango-tango siya. “Alam ko namang magkakaayos din kayo, hindi nga lang ngayon. Mamaya ay tatanongin ko si Ryke, alam niya kasi kung anong mangyayari. Si Mr. Predictable iyon e.” Natawa kaming dalawa sa kaniyang sinabi.

“‘Gaya noong nasa cafeteria kami. Alam mo ba kung anong sinabi niya kay Thrale? ‘Balang araw ikaw din ang mananakit sa kapatid mo, Thrale.’ And now, he’s right. Haha.”

“May sinabi rin siya sa amin.” Nangunot ang noo ko dahil parang nawala siya sa magandang kalagayan. Lumalim ang kaniyang pag-iisip.

“Ano?”

“Mangyayari daw muli ‘yong nangyari pagkatapos ng dalawang taon.” Ramdam ko ang pangamba sa kaniya. “Hinihiling kong magkamali siya ng isang beses.”

“Ano ba nangyari n’on?”

“Kaming limang magkakaibigan, iisang babae lang ang gusto namin which is Anissa. He won.”

“Bakit si Thrale ang nanalo? Mas better pa kayong apat sa manhid na ‘yon.”

Natawa siya. “Ibang-iba si Thrale dati. Alam mo namang pinagtitilian siya ng mga babae sa school, hindi ba? Ideal boyfriend, sabi ng lahat. Well, tama naman sila. Hindi ko lang alam ngayon.”