محلة نجيب باشا

البارت 70

محلة نجيب باشا

بقلمي عطر الياسمين🌸🖤

البارت 70

______________

قلبي يُحَدّثني بأَنّكَ مُتْلِفِي
روحي فِداكَ عرَفْتَ أمَ لم تَعْرِفِ

ما لي سِوَى روحي وباذِلُ نفسِهِ
في حُبّ مَن يَهْواهُ ليسَ بِمُسرِف

فلَئِنْ رَضِيتَ بها فقد أسعَفْتَني
يا خَيبَة المَسْعَى إذا لم تُسْعِفِ

وحياتِكُمْ وحياتِكُمْ قَسَماً وفي
عُمري بغيرِ حياتِكُمْ لم أحْلِف

لو أَنّ رُوحي في يدي وَوَهَبْتُها
لمُبَشّري بِقُدُومكمْ لم أُنْصِف

_______________

ماسه ..

ـ جبتلچ شاحنه محموله حتى من نخابر ما يطفى تليفونچ
ـ عاشت ايدك يا روحي ، يلله اروح اغسل ايدي و اصب نتغده اني جعت
ـ و اني هم ما تغديت منتظرچ خاله رادت تصبلي و ما قبلت آكل بدونچ

تركته و رحت للمطبخ لگيت ماما صابه و محضره صينيتنه اني و خالد على جهه رحت غسلت ايدي و اجيت شوفتها شعري كلش عجبتها الگصه صار طوله لنص ظهري ، لبست الشال مره ثانيه لأن عمار موجود

اخذت الصينيه و رحت للأستقبال گعدنا نتغده سوه و هو ياكل و يوكلني خلصنا گتله .. اذا اعوفك و اصعد اتحضر و ابدل خوما تستحي

ـ ليش صغير ؟
ـ لا العفو مو قصدي
ضحك و گال .. روحي حبيبي كملي شغلچ لا تتقيدين بيه

اخذت الصينيه لميتها و لميت المطبخ هو سويتله طريق راح غسل ايده و رجع گعد بالصاله صعدت لغرفتي ابدل

قبل حنة ميسم بكم يوم حسام تمرض على غفله و مابي حيل يوگف صخونه قويه و يگح راح حلل طلع مصاب بالفايروس و انعزل وحده بغرفته

ميسم چانت محضره كل شي و امجد حاجز القاعه و العشا و دافع فلوس و ما ترهم يتأجل العرس عزل نفسه بغرفته و بس سبأ تدخل يمه و عبدالرحمن ياخذه للطبيب

و خايفين على بابا و ماما من العدوى لأن صدرهم ما يتحمل ماما كلش الربو مأذيها لأن چانت تهمل نفسها و ما تهتم لصحتها بالأضافه للجو المترب دائماً

دخلت لغرفتي طلعت فستاني اللي مجهزته للحنه لبسته و وگفت گدام المرايا چان لونه نيلي الصدر و الأكمام كيبور منثور عليه گلتر فضي

مدري ليش نص ملابسي نيلي و ماروني اعشق هاللونين ، لبست ويا حذاء فضي و حطيت مكياج خفيف و اخيراً لفيت الشال الرصاصي وگفت اتفرج على نفسي بأعجاب

ميسم خلصت لبس بمساعدة ايناس و طلعت تجنن تسريحة شعرها كلش لايگه ويا ملامحها الناعمه

گلتلها .. من يجي امجد يصعد هو ينزلچ حتى اصورلكم فديو ترى ما انطسر ظهري بتزيين الدرج بالورد الأبيض عالفارغ