محلة نجيب باشا

البارت 19

محلة نجيب باشا

بقلمي عطر الياسمين🌸🖤

البارت 19

_______________

ماذا لو عاد الزمانُ الى الزمانِ ثانيةً!!
لأُرمم ذلك التصدع
و أجبُر هذه النُدب
و امضي سليماً معافى من كل هذه الجراح
ماذا لو اهدتنا القبور بضع لحظاتٍ نعانق فيها فقيد
لنروي عطش شوقنا و اضمهُ الى قلبي ثم يعود لسباتَ قبرهِ من جديد
ماذا لو ....
كلمةٌ تضم بين ثناياها امنيات و احلام قيد الأنتظار ربما لن تتحق و لن ترى نور الحياة يوماً

____________

يوم شتوي و الجو بارد و ممطر و اني دا امشي بطريق مااعرفه وين و وين موديني فجأه بنهاية الطريق شفت بئر و على حافة البئر طفل رضيع ملفوف ركضت عليه ملهوفه وصلت و شفت وجهه

هذا ثائر وجهه بجسم طفل رضيع فتحت عيوني متفاجأه ؛ بجيت و ركضت عليه و اني اصيح .. حبيبي هاي انت؟! انت زين مابيك شي؟!!

فزيت من النوم و احس الدموع مغركه وجهي كعدت على حيلي امسح وجهي و استغفر و اترحمله و مستغربه شنو معنى هذا المنام

باوعت الساعه راح تصير بثمانيه باوعت فراش امي فارغ غطيت جهالي زين و طلعت ليبره لكيتها كاعده هي و عمتي و حاطات الجوله يمهن و عليها قوري الشاي

سلمت عليهم .. صباح الخير
رفعو راسهم الي بعدهم ديردون و ما نحس الا صوت صراخ قوي جاي من الشارع و اندفرت الباب

___________

ناصر ...

بعد معارك قويه خضتها عالحدود و الوضع الصعب اللي مرينا بي بهالفتره جانت الأجازه صعبه و محد ينطي اجازه لأن الوحده العسكريه بحاجتنه

بقيت اكثر من شهرين و نص تقريباً ما نازل بعدها الحمدلله تمت السيطره على الوضع و اجتي اوامر بالنزول

جنت حيل مشتاق لبغداد و لمنطقتنا و لأهلي رجعت متلهف مثل الصايم عن المي و حان وقت افطاره

بعد طريق طويل اخيراً وصلت قريب من بيتنا نزلت من الفورت براس الشارع اتمشى بهدوء جنت تعبان من الطريق

توجهت على شارعنه و قبل ما افوت استوقفني مشهد احس قلبي طلع من بين ضلوعي

لافته سودا جبيره معلكه عالحايط مكتوب عليها تنعى عائلة المرحوم ابراهيم ال _______ و اهالي منطقة ال______ الشهيد البطل ثائر ابراهيم الشيخ
بتاريخ 11 \1 \1984

قريت الأسم اكثر من مره اريد اتأكد اخاف اني غلطان لا مو اخويه رجعت قريت التاريخ مره و مرتين يعني شكد صارله ميت و اني ماادري ؟!!

راح يصير شهر !! يعني راح و ماشفته ولا ودعته !! احس فقدت عقلي بهذيج اللحظه مو بس صدمة وفاته كسرت ظهري النوب مرت كل هالمده و اني ماعندي خبر ولا احد كتبلي رساله و بلغني باللي صار !!!