محلة نجيب باشا

البارت 34

محلة نجيب باشا

بقلمي عطر الياسمين🌸🖤

البارت34

___________

يجتمعون على خراب وطنك
لكنك لن تجدهم عندما تصبح مشردا
أولئك هم الخراصون
الذين هم في أوطاننا يعبثون

____________

انعام .. كل عقلج ماخذه الرجال و راجعه لبغداد بهالوضع ؟!
- اي لعد شنو نبقى هنا
- و ليش ماتبقين حالج حال البقو ترى الدنيا مو امان و هو وحده راح ياخذكم هالطريق بس انتي و الجهال ويا

حجت بقهر .. لج عيني ماشفتي ميسم شلون شاده ويا الجهال سوده عليه اجاني مفرفح  شلون شاغت روحه من ضربتها

حجت ماما .. جهال و صارت مشكله بيناتهم بعدين ترى جهالج همه اللي بدو اني قبل الهوسه بشويه اجيت شفتهن نايمات ثلاثتهن

ردت بعصبيه و صوت خافت .. هسه هاي علا شكو حاشريها بيناتنا بس اريد افتهم شنو نومتها بغرفتنا هاا ؟! مو امها و خواتها نايمات بهذيج الغرفه ليش ماتروح يمهن بناتج مجلبات بيها حتى وكت النوم

ردت ماما .. و هي بشنو اثرت البنيه شنو دخلها
- ماادري مامرتاحتلها اني شنو مطببيها بنصنا و جنطنا كلها هنا تروح تشيل شي من غراضنا

بقن ماما و عمه انعام صافنات عليها بعدين ردتها امي .. عيب هالحجي جنان شنو تشيل شي من غراضنا ليش هي شنو بيها غراضنا غير الهدوم ؟!

بعدين ترى البنيه كرايبنا مو غريبه و متربايه و اهلها ناس محترمين ابوها مدرس بأعدايه مال ولد و امها استاذه بمعهد اعداد المعلمين و خواتها كلهن مؤدبات و اني لوما متأكده منها و من اخلاقها مستحيل اخلي بناتي هيج يندمجون وياها

عكنشت ملامحها و ردت .. اي يمعوده اعرفهن خواتها هاي مرت رائد السمينه الملكلكه ام لغود و هذيج اللخ اللي كاعده تحجيلي قصة حب امها و ابوها

تأشر بأيدها و تحجي بتنعوص .. هلكد رسائل حب دزلها و يوميه يروح و يجي من بابهم لأن جدي طرده و ماقبل ينطيها اله

حجت عمه انعام .. عوفيها سناء هي علتها مو مشاكل الجهال اني اعرف ليش تريد ترجع
- ماافتهمت !!
- ليش تدوسين ببطني و تحجيني كوه و اني لساني فالت و هاي عبير بنتج تفتر ورانه جنها شرطي استلمي ولا تخليني افوت بالغميج

التفتت ماما شافتنا اني و ايناس كاعدات يمهم و خاله جنان نصت راسها مبتسمه و تلم بغراضهم و تدردم .. انعل ابليسج انعام

ردت انعام مبتسمه .. كولي هيج من البدايه عليمن ذابتها بركبة الجهال

امي سكتت و اني و ايناس وحده صافنه عاللخ نريد نفتهم بس مفهمنا ولا كلمه يحجون بالألغاز و يتغامزون و امي ساكته ؛ للظهر اخذو جهالهم و طلعو و شكد حاولو ويا و جلبو بيهم عمو عدنان ماقبل يبقى