محلة نجيب باشا

البارت 60

محلة نجيب باشا

بقلمي عطر الياسمين🌸🖤

البارت 60

_____________

تعبت اظهر ودادي لناس تعبانه
و تعبت ازرع صديق و اسكي اغصانه

اشو من نبت عوده و كبر بيه الحال
عَلَيّ بالفاس هدت تالي ذرعانه

لكيته طير ملتَفّه الحيايه عليه
و فزعت بحيلي اله و فرصخت جنحانه

و لمن فرد جنحه و عَلّه فوك الغيم
حط للي فزعله الحيه بأحضانه

شرب لما ارتوى و ذب الحجر بالبير
و حط دم على زيجه و شكلي قمصانه

نخر كاع السفينه و غرك الركاب
و كطع حبل الشراع و غدر رُبانه

كسر دلة المضيف و طفى نار البيت
نكر زاد الجبيله و خان فنجانه

_____________

حسام ..

من يوم ما عدنان ابن خالتي دك على صدره و كال لا توكلون محامي يدور على عبد الرحمن و اتركو الموضوع عليه كلبي كرصني منه حسيته حقير و جنت متأكد حتى لو يعرف مكانه و يكدر يطلعه ما راح يسويها

كلبي نغزني منه و جان عندي احساس انه هو اللي مبلغ على عبد الرحمن بعدها طلعت سالفة المخبر السري و هو بقى ينطينا امل لحد ما عبد الرحمن وكع و بعد ما كدرنا نتلاحك عليه

كلت اكيد جان يعرفه وين هو و اتصل بينا بعد ما تأكد انه وقع على اعترافات و راح بيها طلعته صارت حلم بكل الأحوال اله يد باللي صار

و خسارتنا كلها هو واحد من الأسباب بيها اعرفه واحد حقود و نكس و كل شي يطلع منه ؛ من جنت احجي امي ما تصدك تكلي لا مستحيل ما توصل لهالدرجه

و ابويه يكلي .. إن بعض الظن اثم ابني اذا ما شايف بعينك و سامع بأذنك لا تتهم احد بعدين شنو راح يستفادون ولد خالتك اذا انتو انحبستو ؟!

- حقد عليكم انت و امي و ابصملك بالعشره فرحانين و متشفين باللي صار بينا
- همه و ربهم اذا صدك اذا ما عدنا دليل عليهم ما نكدر نتهمهم

بقت هالسالفه ببالي و كلام ابويه يرن بأذاني ما عدنا دليل ؛ زين شلون اجيب الدليل و منين و شلون اتأكد من شكوكي و اطفي نار كلبي !!

ما لكيت حل غير انه ادخل بينهم بالفيس بحساب وهمي و اطلب صداقاتهم و حتى يثقون بيه اكثر استخدمت اسم عشيرتهم على اساس آني و همه من نفس العشيره بس الفخذ مالتنه بغير محافظه حتى اضيع نفسي

اللي خدمني بهذا الموضوع انه آني اعرف بالعشاير شويه مثلاً العشيره الفلانيه بيها كذا فخذ متوزعين على فلان محافظه و فلان محافظه