محلة نجيب باشا
بقلمي عطر الياسمين🌸🖤
البارت 42
____________
مِـن عدها وبعـد صارتلي عبـرة
و عرفت شلـون آخلي خطـوط حَمـرة
اڪو ابـنَآدم تحبَة و يمـه ترتَـاح
واڪو ترّتـاح ڪلِـش مِـن تخسـرة
مواقـف تافـه تبينـلك الناس
مو شرط الطويلة تڪون عشرة
وبديت من الرفوف البيها العزاز
أنزل ڪل شخص مآ وفه ڪدره
عرفتلها وبعد ما اڪبر الروس
ولاازعل علىٰ المآ چان ڪمرة
عرفتلهم واذا رادوا يزعلون؟
عذر آنطيله للمآ فاد عذره
____________
- نهاد !!! معقوله ؟!!
- اي والله اهو بلسانه حجالي نهاد جاي يمه و كايله من طلعت حجاها وراك كال شو شنو شاف وهيج ماخذ موقف الصراحه اني ما فاتت بعقلي اعرف ابو عبد الرحمن ماتطلع منه هيج حجايه بس هو ماخذ على خاطره
بقيت صافنه و حسام عصب و كام يحجي على نهاد كوه سكتته لا يسمع حيدر و تصير سالفه كام اخذ سويج السياره و جنان و جهالها و راح يوصلهم و يمشي و يسولف وياهم و يعلم و يوصي
شايل همهم اكثر من ابوهم اللي عايفهم و مايدري بيهم بالشمس لو بالفي كل اللي يسوي ينطيها مصرف و لو يكفيها لو مايكفيها
راحو و ايناس هم تحضرت و اخذها عمار و هم حسام وصلهم ما قبل يروحون بتكسي
مر اسبوع على زواجه وراها رجع لشغله و عبد الرحمن يفتح المحل و تكعدله ريم و البنات ورا الباب عينهم عليه اذا حيدر مو هنا روحي لايبه وراهم و اللي يطلع احس روحي تطلع ويا يلله يرجع
و بيوم الظهر الجو حار عبد الرحمن عزل و فات تغدينا و نريد ننام اشو على غفله دك تليفونه و طلع ركض يفتح الباب صحت ورا
- شكو يمه شبيك ؟!
- افتح الباب لحسام
فتح الباب فات حسام بالسياره شحطها و وكف نزل منها يركض و راح عالصندوك يكلب بي طلعنا نركض اني و حيدر صاح عليه
- شبيك يابه شصاير وياك ؟!
- ماسمعتو الطلقات هسه ؟!
- اي سمعنه لا تكلي وكعت بسيارتك وحده !!
جر نفس و كال .. بس دخلت المنطقه استهدفني قناص ابن الكلب منين ما افوت يرمي عليه هم زين الله ستر و ما اجتي بالتايرات جان رحت بيها يرمي رمي مال واحد يريد يكتل كله بمسوى الراس
فتحت عيوني مصدومه كتله .. عزااا و تالي !!
- والله يمه لو اسولفلج ماتصدكين مااعرف شلون الله نجاني ليهسه مامصدك اللي صار
YOU ARE READING
محلة نجيب باشا
General Fictionسندخل الى قلب بغداد لأحد ازقتها التي خبأت بين جدرانها عبق الماضي و سنطرق باب احد بيوتها في محلة نجيب باشا و نعيش تفاصيل حياتهم من جيل الى جيل
