محلة نجيب باشا
بقلمي عطر الياسمين🌸🖤
البارت 6
______________
شَنفِضهن نَفض شَو كلهِن التَمن
لا عَطوة النَطني ولا رَضن يَهدن
شگثر أسَهام كلهن فد وكت هَدن
سَهم وداع ، سَهم أوجاع
وسَهم ذاك العَزيز الصَار جوة الگاع
وسَهم عَمري وشبابي الضَاع
شَنفَضهِن بَعد ونَيابهِن حَدن
شاة وبَين سَبع ذَياب شَيخلن ؟!
انة بَطرك العَظم والدود بية اكلن .
_______________
حيدر ...
كاعد و ايدي على راسي حاير بالمصيبه الجديده اللي مدري منين طلعتلنه و مااعرف شنو راح اتصرف بيهه
فجأه صرت مسؤل عن عائله و بعد ما جنت الولد الوسطاني لكيت نفسي اني الأبن الأكبر و اني قائد هاي السفينه و لازم اخوض هالمعركه وحدي و اوصل اهلي لبر الأمان
خسرنه اخونا و من بعده ابونا و هسه اجه دور البيت نخسره !
ابويه ليش رهن البيت؟!
و شلون اني ماادري؟!
و اني اللي جنت احسب نفسي ذراعه اليمين و بير اسراره طلع ضام عليه هيج شي جبير شلون؟!!
والله راح اتخبل و عقل ما ضل براسي
زين لييش ليش هو عنده خير من الله من شوكت يتداين و يحتاج السوك كله يجي يتداين منه و بعمره ما طلب درهم من بشر شنو اللي صار؟!
هاي الثروه كلها وين راحت؟!!
معقوله افلس؟!
لا ... لا لا شلون افلس مو اني الحسابات مال شغله كلها بأيدي
افكر و حاير اريد اوصل لسبب ما كدرت الحجي راح و راح سره ويا
و هسه الأهم من سبب رهن البيت هو شلون افك هذا الرهن و ما نخسر بيتنا ... المبلغ جبير و جبير حيل لأن البيت بيت وزير بوقته
من مساحه من بناء من موقع والله من كبر الصاله و الأستقبال سوالهن ابويه زوالي و تخم قنفات تفصال لأن ماكو على كدهن و ماقبل تنفرش اكثر من زوليه بيهه حتى لا يخرب شكلها
بيت بهيج مساحه راهنه بآلاف الدنانير منين راح اجيب و افك الرهن؟!
اجتي على بالي امي .. جانت تسحب من ابويه فلوس هوايه كلش هوايه و تشتري بيهن ذهب ادري بيهه بس بعمرنا ما شفنا الذهب اللي تشتري
ولا ادري حتى وين تضمه ؛ حتى بآخر فتره قبل استشهاد انور اذكر مره دنطلع للشغل و شفته طلعلهه صفطه الف دينار لوحلها بيها باوعت ما عاجبها كالتله :
- شكد هاي؟!
- الف دينار
عبست وجهها و دارته و ردت :
- الف؟! منطيني الف؟! زوجت بنات اثنين اني و ليهسه تنطيني الف؟
YOU ARE READING
محلة نجيب باشا
General Fictionسندخل الى قلب بغداد لأحد ازقتها التي خبأت بين جدرانها عبق الماضي و سنطرق باب احد بيوتها في محلة نجيب باشا و نعيش تفاصيل حياتهم من جيل الى جيل
