محلة نجيب باشا

البارت 50

محلة نجيب باشا

بقلمي عطر الياسمين🌸🖤

البارت 50

_____________

لك الفـؤاد الـذي أصبـحـت تـملكه
وإن أردت فخذ إن شئت أحداقي

فأنت فيـها كـرمش بات يحـرسها
وإن شكى القلب هماً أنت ترياقـي

فكيف بالله لا أصغـي لمـن ملـكـوا
فكري وحرفي وأقلامي وأشواقي

وإن أردت جـوابـي دون فلسفـةٍ
يكفيك أول بيتٍ،، واتـرك الباقـي

_______________

واكفه كدام الشباك و افرك ايدي بتوتر و ارتباك اندك الجرس و دك ويا قلبي ؛ مشاعر مختلطه خجلانه و متوتره و قلقه الجو حار بس بردانه و ايدي تعرك و كل شويه امسحها

طلع حسام فتح الباب ركضت ماسه طفت الضوا و ميسم كالت .. هاي فرصتج الذهبيه مادام راح يفوت من كدام شباكنا تعالي شوفي هسه اخاف من تدخلين جوه تخجلين و ما تشوفي

- دروحي والله بطرانه
سبأ كالت .. لج اي هذا حقج مابيها شي آني هم هيج شفت اخوج شكو بيها
ماسه كالت .. ابقو احجو راح يخلصون سلام و يفوتون فتحنا البرده و بقينا نباوع من ورا التول

فاتو بالبدايه النسوان استقبلتهم ماما خاله جنان و اختها مها و فاتت ام الولد عرفتها لأن شفتها هذيج المره من زارتنا ؛ وياهم مره جبيره وجهها نوراني و ابتسامتها مريحه للنفس

بعدين فات رجال يمشي بخطوات واثقه شعره ابيض خفيف و شواربه كثيفه عرفته ابو العريس

وراهم فات شاب طويل اسمراني كاشخ و مرتب حيل مبين عليه هو العريس لابس بنطرون نيلي و قميص سمائي مد ايده صافح حسام و فاتو من كدام شباكنا للأستقبال

بابا جان واكف يم باب الأستقبال رحب بيهم و دخلو جوه ثواني و اجتي خاله جنان كالت .. يلله امشي ويايه

- ما اريد استحي خلص شفته
- لا بربج !! و هو شلون يشوفج لج امشي ما راح ياكلج

طلعت وياهه شلت صينية الضيافه بس همه ما شاءالله هوايه لازم احد يساعدني بصينيه ثانيه توسلنا بأيناس ما قبلت تطلع تستحي و تكول عمار ما يقبل

و كالب وجها عليها هالأيام يكول بشنو احسن من اخويه هذا الولد لو لأن موظف و ايناس متعاركه ويا ما ساكته

سبأ كذلك ما قبلت تطلع ما نقذني غير حسام من كال .. اني اقدم وياها
- اخاف عيب
- ليش عيب مابيها شي

شلت صينيه و هو شال الثانيه و طلع كدامي و خاله جنان تمشي و توصي بيه هيج سلمي هنا اكعدي قدمت للكاعدين وصلت اله جان منصي عينه و اخذ الببسي من الصينيه بدون ما يرفع عينه