محلة نجيب باشا
عطر الياسمين🌸🖤
البارت 14
______________
" إذا حاولوا كسرك .. خالف توقعاتهم واجعل كل جزءٍ منك شيئاً جميلاً .. فالهزيمة لا تلحق بالإنسان إلا إذا سمح لها هو بذلك "
_____________
ناصر قرر يخطب و عماتي رشحو اله انعام بنت عمتي صبريه ؛ عمه صبريه عدها ٣ اولاد و خمس بنات انعام تكون البنت الثالثه استغربت انه اختاروها من بين اخواتها ليش مو الأكبر يعني؟!
عمتي رمزيه ماقبلت ياخذ الكبار و كالت انه انعام هي انسب اختيار جان عمرها ١٥ سنه و هو ٢٩ يعني تقريباً بكد نص عمره
هو بالبدايه رفض الفكره بسبب فرق العمر بس بعدين عمتي بهيه قنعته انه هالشي طبيعي و هوايه ناس تزوجو بنات تصغرهم بكذا سنه رغم هالشي حياتهم حلوه و متفاهمين
بعدها تمت الخطبه و بيت عمتي وافقو مباشرةً بس من رحنا بالخطوبه حتى يلبسون الحلقات حسيت انعام مافرحانه و من سألنه اني و رجاء و امي بررو موقفها انه خجلانه
و تمت الخطوبه بين صفكه و هلاهل و هو وحبيبي طالع يجنن ناصر حلو اسمر بعيون عسليه و رشيق و مو بس شكل لا جان دارس و موظف بس جان فقير لأبعد حد ماعنده سوالف الشباب ابد جانت كلمته المعتاده دائماً يكول
" والله ماكو افقر مني اني حمامة جامع " يحجيها و هو يضحك بس هو فعلاً هيج انسان نقي بشكل محد يتصوره لهذا احنه فرحانين انه اخيراً ارتبط و يارب تكون انعام مثله نسمه هادئه و تكون حياتهم حلوه
هاي السنه اني حامل من جديد و رجاء هم حامل ويايه و مرت عمي طالب انضمت النه احنه الثلاثي ننتظر مواليدنا اللي راح ينورون هالسنه اللي مليانه فرح
الشي الوحيد الصعب اللي واجهنا هو قرار الدوله انه الموظفين لازم يأدون الخدمه العسكريه لمدة ست اشهر يسموها احتياط
حيدر و زياد و اخواني ناصر و ثائر و نهاد اللي تخرج و توظف هم جان اله نصيب من هالقرار
طلع حيدر و اني ادعيله يكون بمكان قريب و ما اتعذب بغيابه بس للأسف ما صار اللي تمنيته ؛ مكان الوحده اللي لازم يداوم بيها جان بالشمال
حضرت جنطته و غراضه و ودعته بالدموع حضني و باس راسي و راح على عبودي باسه و هو نايم و التفت الي يوصيني
- ديري بالج على نفسج و على عبد الرحمن اني ادري بيج سباعيه و كدها
- تروح و ترجع بالف سلامه حبيبي لا يظل بالك علينا
شال جنطته و نزل و نزلت ورا جانت عمتي طالعه من الحمام متوضايه دتتحضر للصلاة ذب الجنطه و راح باس راسها
- ها رايح؟
- اي يمه اليوم اني لازم اكون بالوحده مالتي
- توصل بالسلامه
- الله يسلمج ؛ يمه مرتي و ابني امانه يمج طول ما آني غايب
YOU ARE READING
محلة نجيب باشا
General Fictionسندخل الى قلب بغداد لأحد ازقتها التي خبأت بين جدرانها عبق الماضي و سنطرق باب احد بيوتها في محلة نجيب باشا و نعيش تفاصيل حياتهم من جيل الى جيل
