محلة نجيب باشا

البارت 28

محلة نجيب باشا

بقلمي عطر الياسمين🌸🖤

البارت28

____________

سأعتني بِكَ رُغمَ البُعدِ بيننا
في دُعائي و صلاتي و بينَ احرُفي و ثنايا ذاكرتي

____________

فارس .. اني اخذت قرار و كلت مادام مجموعين جمعة خير ان شاءالله ابلغكم بي

ناصر جان يباوع بتركيز عاكد حواجبه و مترقب و كأنه قلبه يحس شنو يدور بفكر فارس حجه عمو طالب موجه كلامه لفارس

- شنو قررت بخصوص شنو؟!
- بخصوصي اني و زوجتي و اطفالي ، قررت اهاجر اطلع من العراق

امي صاحت .. شنووو؟!! ما كافي هذاك راح و عافني تريد انت هم تعوفني؟!!

- وين تروح يابه و شلون تهاجر ليش هي سهله
- سهله عمي صح شويه بيهه عراقيل و طريق طويل بس بسيطه و التجربه تسوى المجازفه
- و شلون طلعت ببالك هالفكره؟!

قبل ما يرد حجى ناصر .. انتصار
- شنو انتصار شعليها؟!
- انتصار هي اللي حطتها بباله اجتي فتحت الموضوع ويايه و من ايست مني التافت على فارس

رد فارس .. صح هي اللي خلت الفكره براسي بس خوما جبرتني !! اني كلبتها بعقلي و عجبتني السالفه حسيتها تجربه حلوه اذا حبيت العيشه بره ابقى و اذا ما اتحملت و شفتها مو مثل ما جان ببالي ارجع بلدي موجود و شغلي موجود و اهلي موجودين

حجه عمي .. فارس خليها ببالك ترى اللي يطلع بكيفه مايرجع بكيفه خليها ترجيه بأذانك هاي لا عبالك مثل ماتروح ترجع و مثل لمة اهلك ماتلكى بكل الدنيا اسألني آني شكد افتريت و سافرت و تونست اكثر من شهر ما راح تصبر صدكني

- عمي مرت اخويه و اولاده امانه برقبتي مااكدر اعوفهم
- مرت اخوك منين جابت هالسالفه و وين تريد تولي ؟!

- رحتلهم اشوف الجهال و انطيهم مصرف مثل كل مره صاحت عليه هي و اختها بشرى و كالت

.. فارس عندي موضوع اريد احجي بي وياك
- اي كولي ام مهند عيوني الج
- اريد اسافر
- شنو ؟!! وين تسافرين
- لفلندا

- و هاي شيوصلنا الها يمعوده صدك تحجين انتي ماتشوفين الوضع و الدنيا شصاير بيها ؟!

- و هذا اللي مخليني افكر اطلع الوضع و اللي ديصير بالدنيا ، فارس اني خسرت زوجي و حب عمري ما بقى عندي غير اولادي و بنتي و لازم احافظ عليهم اريد اطلعهم من العراق اريدهم يعيشون عيشه ثانيه غير عيشتنا لا حصار ولا حرب ولا صوت الغارات و القصف

- و ليش فلندا ؟!
- عندي وحده من اقارب ابويه من بعيد شويه عايشه هناك صار فتره اكتبلها رسائل و خابرتني اكثر من مره و حجينا تكول الحياة هناك مريحه و حلوه