محلة نجيب باشا
بقلمي عطر الياسمين🌸🖤
البارت 35
___________
في وطني يستشهدبائع الزهور
و يُعتَقلُ بائع الخُضار
و يُجرَحُ بائِعُ البقاله
كل الباعه في وطني مُستهدفون
إلا باعة الوطن فهم بالأمنِ و الترفِ ينعمون ..
___________
خابرتني غيداء اليوم و كالت .. سناوي عندي موضوع وياج
- اسمعج عيوني كولي
- اكو ولد يعرفه مهيمن خوش شاب مؤدب و حباب يريد يخطب و احنه كلنه نجيبه عليكم يشوف ايناس
التفتت على غرفة البنات شفت عبير كاعده تقرا و ايناس حاطه المكينه و كاعده تخيط نصيت صوتي حتى ما يسمعوني و سألتها .. و هذا الولد منين شنو تعرفون عنه
- كتلج هو مهيمن يعرفه الولد يشتغل بال***** عنده محل هناك و بيت عمته جيران عيالي بس هو ساكن عدهم مو ويا اهله لأن قريب على شغله و الولد صايم مصلي ماعنده سوالف مو حلوه و انتي تعرفين مهيمن شنو يعني لو نعرفه مو خوش ولد ما نجيبه عليكم هاا شكلتي ؟!
- يجي ابو عبد الرحمن و احجيله و نقرر اذا ماعنده مانع انطيج خبر يجي الولد و اهله نتعرف عليهم و اذا كال لا تنسد السالفه
- تمام براحتكم اسألي عمو و رجعيلي جواب
سلمت و سدته و اني صافنه و افكر بالموضوع اجه حيدر حجيتله بالبدايه كال .. سدي السالفه لا نعرفه ولا نستعرفه منين هذا
- اي ليش تسدها بسرعه انطي مجال
- لشنو انطي مجال سناء ؟!! اشيل بنتي و انطيها لواحد مدري منين جابه مهيمن !!
- آني ماكلت انطيها كلت خل ننطي فرصه نشوفه و اذا اقتنعنه بي و البنيه وافقت نسأل عليه و نشوف لعد العالم شلون تزوج بناتها ؟!
بنتك لاتطب ولا تطلع ولا اكو عدنا احد من الأقارب يناسبها قبل فتره خابرني فارس و كال اكو ولد يمه بفلندا يريد مره و سألني اذا نقبل ننطي ايناس سديتها من يمي و رفضت رفض قاطع لأن اعرف هيج قسمه ماتناسب بنتي
رجال غريب و بلد غريب و هي ما طالعه من الباب بدوني ؛ بس هذا مواصفاته بيها مجال ننطي فرصه و نعرفه و نسأل عنه
بعد طول كلام وافق حيدر مبدئياً و محد يعرف شي غيرنا آني ويا بالبيت لحد ما بيوم العصر حيدر نايم جوه السياره يصلحها و اني يمه اساعده و انطي اللي يحتاجه اجتني ماسه شايله الموبايل تركض
و كالت .. ماما خابرت غيداء و كالت تريدج
اخذته منهه و رديت .. الو هلا غيداء
- هلو سناوي شلونج انتو بالبيت ؟
- هلا بيج عيوني ؛ اي لعد وين نروح ؟
- اكلج مو اني جنت يم عيالي و الولد اجه و هاي حماتي هيرته امشي هسه نشوف البنيه تعذريني اجينا بدون موعد بس والله اني معليه
YOU ARE READING
محلة نجيب باشا
General Fictionسندخل الى قلب بغداد لأحد ازقتها التي خبأت بين جدرانها عبق الماضي و سنطرق باب احد بيوتها في محلة نجيب باشا و نعيش تفاصيل حياتهم من جيل الى جيل
