محلة نجيب باشا

البارت11

محلة نجيب باشا

بقلمي عطر الياسمين🌸🖤

البارت 11

________________

وتشابَكَتْ عندَ اللقاءِ أصابِعي
لا الأرضُ تحمِلُني..ولا نبضي معي

لا شيءَ إلا الارتباكَ أُحِسُّهُ
وكأنني كلِّي أذوبُ بأجمعي

أسْلَمْتُ قلبي كُلَّهُ في لحظةٍ
ونسيتُ فيكَ تدلُّلِي وتَمَنُّعِي

مَرُّوا جميعاً مثلَ طَيْفٍ عَابرٍ
وبقيتَ وحدَكَ عَالِقاً فِي أضلُعِي⁦

________________

خلصت الكعده دنريد نترخص و نكوم و سبقنا حيدر و كال تعالو نصعد لغرفتي اشوفكم الصور مالتي

صعدنا آني و ثائر بعد ما ترخصنا من الحضور و هو صعد كدامنا فتح الباب و الضوا و حجى :

- اتفضلو

دخلت ورا اخويه غرفته جانت حلوه و مرتبه وحده ينام بيها لأن بيها سرير واحد و كنتور ابو ٣ ابواب و دولاب صغير يم السرير

فتح الباب الجانبيه من الكنتور و طلع علبه مليانه صور كعدنا نتفرج و هو يسولف و يشرح

هاي بسطح بيتنا اللي بنجيب باشا و هاي بشارع الرشيد و بعض الصور جانت ويا اخو الشهيد الله يرحمه

مبين علاقتهم جانت حيل قويه لأن هو اكثر واحد بين اخوانه متواجد ويا بالصور

اتفرج و مستمتعه و ثائر كل شويه يسأله على صوره عنده واهس قوي بالتصوير حتى بالشغل هم عنده صور و ويا الناس اللي يشتغل وياهم

بعدين تركنا نتفرج و هو انسحب على جهه رفعت راسي شفته واكف و بأيده قلم و يكتب بظهر صوره حطها على باب الكنتور

نزلت عيني و صرت الم الصور و ارجعهن بالعلبه اني و ثائر ؛ اخويه الحلو بيه انه ما يتدخل بشي و يدقق حس على حيدر يريد يحجي شي ويايه وكف و كال

- يلله يابه راح نتأخر

دار ظهره و مشى عنا خطوتين و حيدر حط صوره بأيدي باوعتله متفاجأه رفعت الصوره اللي نطانياها جانت صورته بشارع الرشيد واكف وحده

كلبتها اشوف شنو جان يكتب وراها لكيته كاتبلي :
" هديتي الى اعز ما املك "
سناء

من شفت اللي كاتبه مدري شصار بيه خجلت و فرحت لحكتهم دننزل و همه جانو واكفين يم صوره معلكه عالحايط و يسولفون عنها جانت صورة المرحوم انور بملابسه العسكريه و هو بالجبهه عالحدود بين الأردن و فلسطين

اثناء الحديث اجانه صوت عمتي من جوه و هي تصيح بنرفزه :
- حييييدررر هاي وينكم شعدكم فوك؟