محلة نجيب باشا

البارت 63

محلة نجيب باشا

بقلمي عطر الياسمين🌸🖤

البارت63

____________

كوه شايل روحي بأيدي
و أخاف من روحي اطيح

هنه كلهن يوجعني
منين ما تلزمني اصيح

و هذا مو كلبي اليدك بضلوعي
كلبي ميت و انتهى موضوعي

أنتَ و الدنيا عَليّ و همومها
انت شايف عين تبجي بنومها..؟!

_____________

عبدالرحمن ..

دخلت للغرفه طفيت الضوه و تمددت بفراشي غطيت حتى راسي احس نفسي مخنوك و ما اعرف شلون اتصرف الشي الوحيد اللي اعرفه آني و ريم بعد مستحيل يجمعنا بيت واحد

طلعني من افكاري صوت باب الغرفه و هو يندك نزلت البطانيه من وجهي و رديت .. منو

لكيت بنات ايناس واكفات بالباب كلتلهم .. ها خالو شتريدون
ردت مينا ام لسان .. هاي شنو راح تنام ؟!
- اي اذا ما عندج اعتراض
- احنه جايين نشوفك ترى
- هاج شوفيني لزمت عيونج آني
- اي غير نكعد سوه انت ما كعدت ويانه و هسه بعد وكت ساعه تسعه و انت تريد تنام و آني من عندي دوام الصبح انام بالعشره

حجت لينا .. خالو ليش ما جنا نشوفك من نجي لبيت بابا سألت ماما كالت خالكم جان مسافر انت وين جنت ؟
- اي خالو جنت عايش بدولة الصين الشعبيه
- صدك ؟!! شنو تسوي
- اصيد صراصر اطلعو بره

ساره صعدت يمي عالفراش و كعدت بحضني ميلت راسها و كالت .. انام يمك لعد
حركاتها اخذت كلبي حضنتها و كلت .. ولج شنو هالخدود مال عض

مينا كالت .. ترى نعرف انت ضايج سمعت يوم كالت
- و هسه انتي شتريدين يا ام لسان ؟!
ابتسمت و كالت .. نوخر الضوجه

دخلت ايناس كالت .. انتو شجابكم هنا و اني ادور عليكم اطلعو بره لا تضوجون خالكم

كمزن ثلاثتهن بحضني مهزومات من امهن يمكن اليوم اول مره اضحك من كلبي على حركاتهم و سوالفهم النوب جابو اخوهم مصطفى خلو بحضني و مينا كالت .. نريد ناخذ وياك صور حتى من نروح لبيتنا نتفرج بيهن

ما تركوني إلا نسوني الضوجه من صدك و اخذوني كدامهم طلعوني من الغرفه كعدت بالمطبخ البنات ديغسلون ماعين كالت امي .. احمي العشا مالتك ؟

- بكيفج يمه

ميسم ..

ايناس بقت هالمره خمس ايام من شفنا البنات كلش فرحنا بيهم مينا حبيبتي كبرانه و طولانه صايره بصف الخامس و سوالفها حلوه كلش تونسنا وياهم

و اليوم كعدت ايناس من الصبح تلم ملابس جهالهه حتى يرجعون لبيتهم دخلت ماما للغرفه شايله مصطفى ابن ايناس كالت .. بعد وكت شبيكم مستعجلين ما لحكنا نشبع منج و من البنات