Bi De • Pan Yu Xin De Rui la ||Myanmar Translation||

58

ရှဲ့ကျူရှင်းမှာ သတိမမူမိဟန်ဖြင့် ပြန်ဖြေရတော့သည်။ "ရှောင်ကျောက်နဲ့ ကျွန်တော်က အခန်းဖော်တွေ။"

လျှို့ချုံးမင်က ထိုအခြေအနေကို အခွင့်ကောင်းယူ၍ ဆက်ပြောလေသည်။ "ဒါဆို အတော်ပဲ။ ခဏနေ မင်း ကားပေါ်က ဆင်းရင် ငါလည်း မင်းနဲ့အတူလိုက်ဆင်းမယ်လေ။ ငါ ငါ့တူနဲ့ မတွေ့ဖြစ်တာ တော်တော်ကြာနေပြီ။"

သူ့အနေနှင့် အဖွဲ့၏အဓိကဇာတ်ကောင်က ရှဲ့ကျူရှင်းမှန်း သိထားပြီးဖြစ်တာမို့ ရှဲ့ကျူရှင်းနှင့် တတ်နိုင်သမျှ အမြန်ဆုံး သိကျွမ်းထားဖို့ကို အလိုရှိနေလှသည်။

သို့သော် ရှဲ့ကျူရှင်းအနေနှင့် ကန်းလန်ဘက်ကို သွားဖို့အစီအစဉ်မရှိထား။ ပြောရလျှင် သူ သူ့အိမ်မပြန်ဖြစ်တာတောင် အတော်ကြာနေပြီမို့ သွယ်ဝိုက်၍ ပြန်ဖြေလိုက်သည်။ "ကျွန်တော် အခုတလော ကန်းလန်ချန်ဘက်မှာ သိပ်မနေဖြစ်ဘူး။"

လျှို့ချုံးမင်မှာ ဒီအကြောင်းကို ကျောက်ကျန့်ယိထံမှ ကြားထားပြီးဖြစ်သည်။ နောက်ဆုံးသတင်းဆိုလျှင် 'ရှောင်ရှဲ့က ကောင်မလေးရနေတာဖြစ်လောက်တယ်' ဆိုတာမျိုးဖြစ်တာမို့ သူလည်း ပြန်ပြောလိုက်သည်။ "ရည်းစားထားနေတာလား? စိတ်မပူပါနဲ့၊ ငါတို့ကုမ္ပဏီမှာ ရည်းစားမထားရဘူးဆိုတဲ့စည်းမျဉ်းမျိုးမှ မရှိတာ။ ငါလည်း ရှေးရိုးစွဲတတ်တဲ့လူမဟုတ်ဘူး။"

ကားအတွင်း ငြိမ်သက်မှုတစ်ခု ကြီးစိုးသွားတော့သည်။

အဖွဲ့သားတိုင်း တစ်ယောက်မျက်နှာတစ်ယောက် ကြည့်မိသွားကြသည်။

လျှို့ချုံးမင် သူတို့မန်နေဂျာဖြစ်လာကတည်းက သူတို့ခေါင်းဆောင်နှင့် ရှဲ့ကျူရှင်းတို့၏ဆက်ဆံရေးက ဖုံးကွယ်ထားလို့ရတော့မှာ မဟုတ်။ ထို့ကြောင့် တစ်ဖက်သူ ဖမ်းမိသွားမယ့်အချိန်ကို စောင့်နေမည့်အစား အခုကတည်းက လက်ဦးမှုယူပြီး သူတို့ရဲ့ကလေးမျက်နှာနှင့် မန်နေဂျာကို ပြောပြထားလိုက်တာ ပိုကောင်းလိမ့်မည်ပင်။

လျှို့ချုံးမင်လည်း တစ်ခုခုမူမမှန်မှန်း သတိထားမိတာမို့ သံသယဖြစ်သွားပြီး မေးလိုက်သည်။ "ခွန်းကော မထွက်သွားခင်ကရော ဒီအကြောင်းသိသွားလား။"