Bi De • Pan Yu Xin De Rui la ||Myanmar Translation||

30

[Unicode]

'ချုပ်တည်းထားခြင်း'

ရှောင်ရှဲ့ သူ့ကို ဒေါသထွက်သွားမှာလည်း ကြောက်မိတာမို့ ထိုအတွေးများကို အလျင်စလိုမေ့ဖျောက်ထားလိုက်တော့သည်။

သို့ပေမယ့် ထိုအတွေးမျိုးက စိတ်ထဲရောက်လာပြီးတာနှင့် လျစ်လျူရှုပစ်ဖို့ခက်ခဲလွန်းလှသည်။

စင်ပေါ်ဖျော်ဖြေရာတွင် ဝမ်ချောင့်နေရာက ရှောင်ရှဲ့အနောက်တွင် ရပ်နေရတာမျိုးဖြစ်သည်။ ရှဲ့ကျူရှင်းဝတ်စုံက တိုလှတာမို့ သူလက်မြှောက်လိုက်တာနှင့် ခါးလေးကပါ ပေါ်လာ၏။ အားထုတ်မှုသိပ်မရှိဘဲ သူ့လက်နှင့်ခြေထောက်များကို လှုပ်နေရင်း ဝမ်ချောင့်မျက်လုံးများက ရှဲ့ကျူရှင်းရဲ့လှစ်ပေါ်နေသည့်ခါးအထက်သာ ရောက်သွားတတ်သည်။ ရှောင်ရှဲ့ solo ကပြရချိန်တွင်လည်း အရင်က ချောမောပြီးကြည့်ကောင်းတယ်ဟုသာ တွေးခဲ့ဖူးသလောက် အခုကျ သူ့စိတ်ထဲ ထူးထူးဆန်းဆန်းပုံရိပ်များ ဝင်ရောက်လာလေသည်။

ဖျော်ဖြေပြီးချိန်မှာတော့ ရှောင်ရှဲ့ အနားလျှောက်လာတာကိုမြင်မှ ဝမ်ချောင် အသိကပ်သွားတော့သည်။ ရှောင်ရှဲ့က ဖြောင့်မတ်ပြီးမင်းသားတစ်ပါးနှင့်တူလှသည့် ရုပ်ချောမှုမျိုးရှိတာဖြစ်သည်။ ကပြဖျော်ဖြေဖို့ မိတ်ကပ်လိမ်းထားရပေမယ့် လုံးဝ မိန်းမဆန်နေခြင်း မရှိ။ ဝတ္ထုများထဲက ဓားကိုင်ဆွဲတဲ့သူရဲကောင်းများသည်လည်း ရှောင်ရှဲ့လိုချောမောမှုမျိုးရှိနေလောက်သည်။ သူ့စိတ်ထဲရှိနေတဲ့ညစ်ညစ်ညမ်းညမ်းပုံရိပ်များမှာ ရှောင်ရှဲ့ရဲ့မင်းသားလေးလိုမျက်နှာနှင့် မအပ်စပ်လှ။

သို့ပေမယ့် သူ မကြည့်ဘဲမနေနိုင်လှသလို မတွေးဘဲလည်း မနေနိုင်။

ထို့အပြင် သူလည်း လူမသိသူမသိတွေးနေတာမို့ ဘယ်သူမှ သတိမထားမိလောက်ဟု ခံစားမိနေ၏။

သို့သော် ပြဿနာက သူ ဘယ်လိုများဖုံးကွယ်ထားတတ်မှာလဲ။ ဝမ်ချောင်ဆိုသည်မှာ သူ့ခံစားချက်အကုန် မျက်နှာမှာ ဖော်ပြထားတတ်သည့်လူမျိုးသာ။

ဝမ်ချောင် အဖျားပျောက်သွားတဲ့နေ့က ရှဲ့ကျူရှင်း မနက်ထပြေး၍ မနက်စာဝယ်ပြီးပြန်လာကတည်းက ဆံပင်စုတ်ဖွားနှင့်မျက်ချေးကပ်နေသေးသည့် ဝမ်ချောင်တစ်ယောက် နွားနို့သောက်ရင်း သူ့ညှပ်ရိုးကို လှမ်းလှမ်းကြည့်နေချိန် တစ်ခုခုမှားနေပြီမှန်း ရှဲ့ကျူရှင်း သတိထားမိခဲ့သည်။