Bi De • Pan Yu Xin De Rui la ||Myanmar Translation||

58

[Unicode]

'အိမ်စုတ်လေး'

စတိုင်သွင်းပြီးသွားချိန် တက်ကြွနေကြသေးတာကို အခွင့်ကောင်းယူ၍ သူတို့အကုန် Promotion ဓာတ်ပုံများကို နေ့လည်ကတည်းက ပြီးအောင်ရိုက်သွားလိုက်ကြသည်။

တစ်ကိုယ်တော်ဓာတ်ပုံရိုက်ကြချိန်တွင်တော့ အဆင်ပြေနေပေမယ့် group photo ရိုက်ရချိန်၌ ဓာတ်ပုံအတွင်း အရောင်ဖြန့်ကျက်မှု ညီမျှနေစေရန် ဓာတ်ပုံဆရာက ရှဲ့ဝမ်နှစ်ယောက်ကို ခွဲရပ်စေပြီး ချန်းယောင့်ကို သူတို့ကြား ဝင်ရပ်ခိုင်းလိုက်သည်။

ဝမ်ချောင်က သဘောတူလာခြင်းမရှိ၊ ရှဲ့ကျူရှင်းဘေးတွင် ရပ်ရဖို့ ငြင်းဆန်နေတော့သည်။

ချန်းယောင့်ကလည်း သူတို့ကြား ဝင်မရပ်ချင်တာမို့ ငိုမဲ့မဲ့မျက်နှာဖြင့်ရှိနေ၏။

ဘေးမှ ဖြစ်စဉ်တစ်ခုလုံးကိုမြင်နေရသည့်လျှို့ချုံးမင်မှ နောက်ဆုံး စကားဝင်ပြောလာခဲ့သည်။ "သူတို့ အတူတူရပ်ပါစေ။ Leo ကို အရောင်တောက်တောက်ဦးထုပ်တစ်လုံးလောက် စောင်းခိုင်းထားလိုက်။"

ဓာတ်ပုံဆရာလည်း သူ့လက်ထောက်ကိုခေါ်၍ အဝါရောင်တောက်တောက်ဦးထုပ်တစ်လုံး ရှာခိုင်းလိုက်တော့သည်။

ဝမ်ချောင့်အနေနှင့် ထိုဦးထုပ်ကို သိပ်မကြိုက်ပေမယ့် အင်တင်တင်ဖြင့် စောင်းပြီး ရှဲ့ကျူရှင်းရှိရာသို့ လှမ်းပြလိုက်သည်။

သူ့အသားအရေက ဖြူတဲ့ဘက်သွားတာမို့ ဒီလိုအရောင်မျိုးက သူနှင့်တွဲဖက်လိုက်ချိန်တွင် တကယ်ကြည့်လို့ကောင်းနေ၏။ ရှဲ့ကျူရှင်း ပြောလိုက်သည်။ "မဆိုးဘူး။"

ဝမ်ချောင်လည်း ထိုဦးထုပ်ကို စောင်းထားလိုက်တော့သည်။

သူတို့ Promotion ဓာတ်ပုံများ ရိုက်ကူးပြီးသွားချိန် ညနက်နေခဲ့ပြီဖြစ်သည်။အဖွဲ့လိုက်ရိုက်ကူးရေးသွားကြရတာမို့ ဝမ်ချောင်လည်း ဒီနေ့ သူ့ကားသူ မယူလာခဲ့။ သို့နှင့် သူရော ရှဲ့ကျူရှင်းပါ ကျန်အဖွဲ့သားများနှင့်အတူ ကုမ္ပဏီမှ လာကြိုသည့်ကားပေါ် လိုက်တက်ပြီး အိမ်ပြန်ဖို့လုပ်လိုက်ကြသည်။