Bi De • Pan Yu Xin De Rui la ||Myanmar Translation||

17

[Unicode]

'ဒီလူကတော့လေ .. အင်းး'

ရှဲ့ကျူရှင်းတွင် သူနေထိုင်ရမည့်နေရာတစ်ခုအတွက် လိုအပ်တောင်းဆိုချက်များ သိပ်မရှိလှသူဖြစ်သည်။ သန့်ရှင်း၍ ပတ်ဝန်းကျင်ကလည်း တိတ်ဆိတ်ပါက ပရိဘောဂများ သစ်လွင်သလား၊ အိုဟောင်းသလားလဲ ဂရုမစိုက်သလို အပြင်အဆင်များ အဆင့်အတန်းမြင့်ခြင်း၊ မမြင့်ခြင်းအတွက်လည်း အရေးမစိုက်လှ။ ထို့ကြောင့် သူ အိမ်ပွဲစားနှင့်အတူ အခန်းလိုက်ကြည့်ရာတွင် တစ်ခုကိုသာ အလျင်အမြန်ရွေးလိုက်ပြီး စျေးနှုန်းလည်း သင့်တာနှင့် စရန်ကြိုပေးထားခဲ့တော့သည်။

အိမ်ပွဲစားဖြစ်သူနှင့် လမ်းခွဲနှုတ်ဆက်ပြီးချိန် သူက စျေးဝယ်စင်တာကြီးတစ်ခု အနီးအနားရောက်နေမှန်း တွေ့လိုက်ရသည်။ ထို့ကြောင့် သူ ထိုအထဲကို ဝင်သွားပြီး နေ့လည်စာ စားဖို့ဆုံးဖြတ်လိုက်သည်။

သို့ပေမယ့် ဒီနေ့က ပိတ်ရက်ဖြစ်တာမို့ တော်တော်များများက စျေးဝယ်ထွက်နေကြပြီး အပေါ်ထပ်ရှိ စားသောက်ဆိုင်များတွင် စားပွဲနေရာလွတ်ရဖို့ စောင့်ဆိုင်းရမှာဖြစ်သည်။ သို့နှင့် သူ အကြာကြီး တန်းစီစောင့်စရာမလိုသည့် အမြန်စားဆိုင်ကိုသာ ရွေးချယ်လိုက်တော့သည်။ သူ့အရှေ့၌ ကောင်မလေး သုံးယောက်သာရှိပြီး သူတို့မှာပြီးတာနှင့် သူ့အလှည့်ရောက်လာမှာဖြစ်၏။

ထိုကောင်မလေးများက စကားတပြောပြောလုပ်ရင်း စောင့်ဆိုင်းနေကြသည်။ သူတို့က 'ဘယ်အိုင်ဒေါကောင်လေးကတော့ ချောပါရဲ့၊ နင် သူ့ရဲ့နောက်ဆုံးဇာတ်လမ်းတွဲကို ကြည့်ပြီးပြီလား။' စသည့်ဖြင့် ပြောနေသည်။

ရှဲ့ကျူရှင်းကတော့ ထိုင်စောင့်မနေ။ သူ့အလှည့်ကျနံပါတ်ကို ယူပြီးတာနှင့် ဘေးတွင်သာ မတ်တပ်ရပ်နေလိုက်သည်။ ထို့နောက် သူ့ဖုန်းက ဖုန်းအားကုန်တော့မှာကို မြင်လိုက်ရတာမို့ သူ အိတ်ထဲရှိ powerbank ကို မွှေနှောက်ရှာတော့သည်။

ကောင်မလေးသုံးယောက်ထဲမှတစ်ယောက်က သူ့ကို မြင်သွားပြီး သူမအဖော်ကို တံတောင်နှင့်တို့ကာ လှမ်းကြည့်ဖို့အချက်ပြလိုက်သည်။ ထို့နောက်မှာတော့ သူတို့ ခေါင်းချင်းပူးကပ်လျက် စိတ်လှုပ်ရှားတကြီး ခပ်တိုးတိုးအော်ဟစ်လေသည်။ "အရမ်းချောတာပဲ!"