Bi De • Pan Yu Xin De Rui la ||Myanmar Translation||

23

[Unicode]

'ရထားတွဲလေး ဝူးဝူးဝူး'

နောက်တစ်နေ့ နေ့လည်ရောက်ချိန်မှာတောင် ဝမ်ချောင် အိပ်ကောင်းနေဆဲ။ ရှဲ့ကျူရှင်း သူ့ပစ္စည်းများ သိမ်းဆည်းလို့ အပြင်ထွက်သွားသံကြားတာနှင့် သူ တန်းမျက်လုံးဖွင့်ကြည့်လိုက်ပေမယ့် ရှဲ့ကျူရှင်းကတော့ ထွက်သွားခဲ့ပြီ။

သူ ထပ်မအိပ်နိုင်တော့ဘဲ စိတ်အခြေအနေပါ မကောင်းတော့။

နောက်ဆို သူ ထပ်ပြီးတစ်ယောက်တည်းဖြစ်ရတော့မည်။ ဘယ်သူကမှ သူ ဂိမ်းထဲ ၅ ယောက်လုံး သတ်လိုက်နိုင်တာကို ကြွားလျှင် နားထောင်မည့်သူ မရှိတော့။ ထို့အပြင် သူ့အတွင်းခံများကိုလည်း သူ့ဘာသာလျှော်ရတော့မည်။

ငယ်ငယ်လေးကတည်းက သူ့မှာ လူတွေအနား အရမ်းကပ်တတ်သည့်အကျင့်ရှိသည်။ သူ့မိဘနှင့် သူ့အစ်ကိုနှစ်ယောက်နားလည်း သူ အရမ်းကပ်လိမ့်ရှိပေမယ့် အခုနှစ်အတောအတွင်း သူ့မိဘများက အဝေးရောက်နေပြီး ဝမ်ချီနှင့် ဝမ်ကျင်းကလည်း အလုပ်ရှုပ်နေကာ သူ တစ်ခုခုဆိုးသွမ်းမိတာနှင့် တန်းရိုက်လာတာမို့ သူလည်း တဖြည်းဖြည်းနှင့် လူနား သိပ်မကပ်တတ်တော့။ သူ့နားရှိသမျှ လူတိုင်းကို လိုက်မကပ်တော့တာဖြစ်ပြီး သူ့အပေါ် ကောင်းပေးသူနားသာ သူ ကပ်တော့သည်။ သူအနားကပ်ခဲ့တဲ့နောက်ဆုံးတစ်ယောက်က သူ့ကို ATM လို သဘောထားခဲ့သည့်အတန်းဖော်ပင်။ ထိုသူကလည်း အစပိုင်းတုန်းကတော့ သူ့အပေါ် အရမ်းကောင်းပေးခဲ့သည်။

အခု သူ့အတွက် အကောင်းဆုံးလူက ရှောင်ရှဲ့ဖြစ်၏။

သူ ခေါင်းအနောက်ကို ပွတ်ထိလိုက်သည်။ တစ်ည အိပ်ပြီးနောက်မှာတော့ ကားခေါင်းဖြင့် ဝင်ဆောင့်ပြီးရလာတဲ့ ဘုက မရှိတော့လုနီးပါး။ တကယ်တော့ မနေ့ကတည်းက ထင်သလောက် နာလှတာ မဟုတ်။

ရှောင်ရှဲ့က သူ့အပေါ် အရမ်းကောင်းလွန်းသည်။ ကားက လှုပ်နေတာမို့ ပါပါရာဇီတွေ ဖမ်းမိသွားမှာ စိုးရိမ်ပြီးတောင် သူ့အပေါ် အရမ်းဒေါသထွက်သွားခဲ့သည်။ ဒါတောင်မှ သူ့ခေါင်းနောက်မှာ ဘုထနေတာကိုမြင်တာနှင့် စိတ်ပြန်ပျော့သွားလေသည်။ ဒါနဲ့တင် Prada အိတ် ပေးလိုက်ရတာ တန်သွားသလိုပင်။