Bi De • Pan Yu Xin De Rui la ||Myanmar Translation||

25

[Unicode]

'ယွမ်လေးရာ'

အဖွဲ့သားများက နောက်ကျတဲ့အထိ မနေခဲ့ကြ။ ဟော့ပေါ့စားလို့ သိမ်းဆည်းပေးပြီးတာနှင့် လျန်ရှီကို နှုတ်ဆက်စကားပြော၍ ပြန်ဖို့လုပ်ကြတော့သည်။

လျန်ရှီက ခွေးဝယ်ဖို့အကြောင်း ဖုန်းခေါ်ခြင်းနှင့်သာ အလုပ်ရှုပ်နေတာမို့ သူတို့လှုပ်ရှားမှုများကို သတိ မထားမိ။ သူ့စိတ်ထဲ သူတို့အကုန် စကားသိပ်မပြောကြသလိုသာ ခံစားမိနေပြီး သက်တောင့်သက်သာ မရှိတာမို့ ထိန်းထိန်းသိမ်းသိမ်းနေ နေကြတယ်ဟု တွေးမိသွားကာ ပြောလိုက်လေသည်။ "ဒီနေ့ ငါ့မှာ ကိစ္စလေးတစ်ခုရှိနေလို့။ ငါ မင်းတို့ကို စိတ်ရှုပ်ဖို့ကောင်းတယ်လို့ မတွေးဘူး။ ပုံမှန်ဆို ငါလည်း စည်စည်ကားကားနေရတာကို သဘောကျတယ်။ နောက်တစ်ခေါက်ကျမှ မင်းတို့ကို ဒီထပ်လာဖို့ ငါ ဝမ်ချောင်ကနေတစ်ဆင့် ပြောလိုက်မယ်။"

သူတို့ လျန်ရှီအိမ်ထဲမှ ထွက်လာတာနှင့် ယန်ကျားကျားက တက္ကစီ လှမ်းငှါးပြီး စကားတစ်ခွန်းတောင် မဆိုဘဲ ထွက်သွားတော့သည်။

ကျန်ရစ်နေခဲ့သည့်ကောင်လေးများမှာ သူတို့အချင်းချင်း ထိတ်လန့်ရှက်ရွံ့စွာကြည့်လိုက်မိကြသည်။ ဝမ်ချောင်မှ သူတို့နှစ်ယောက် လမ်းခွဲပြီးကြောင်း ကြေညာပြောလာကတည်းက သူတို့မှာ အခုထိ နေရခက်နေဆဲ။ လျန်ရှီအိမ်မှာ သူတို့အကုန် စကားသိပ်မပြောကြတာကလည်း ဘာပြောရမလဲ မသိတော့တာမို့ပင်။

ရှဲ့ကျူရှင်းကလည်း ဒီကြားထဲ တစ်ချိန်လုံး မျက်နှာထားတည်နေပြီး ဘယ်သူမဆို သူ စိတ်မပျော်မှန်း သိနိုင်နေသည်။

ဝမ်ချောင် သူတစ်ခုခု အမှားလုပ်မိသွားတယ်ဟု ရေးရေးမျှခံစားမိနေပေမယ့် သူ ပြန်တွေးကြည့်ရင်းနှင့် ရှောင်ရှဲ့က ထိုမျှအထိ ကပ်တွက်လေ့မည် မဟုတ်ဟုတွေးထားလိုက်တော့သည်။ ဤသို့တွေးနေရင်းနှင့် လူတိုင်း ပျော်ပါးလို့ရအောင် တစ်နေရာရာ ခေါ်သွားမည်ဟု သူ တွေးလိုက်မိသည်။ သူတို့အကြားလေထု ပေါ့ပေါ့ပါးပါးဖြစ်သွားမှ ထိုအချိန်ကို အခွင့်ကောင်းယူ၍ ရှောင်ရှဲ့ကို ဟာသများ ပြောဆိုလိုက်မည်။ ရှောင်ရှဲ့က သဘောကောင်းလှတာမို့ သေချာပေါက် စိတ်ထဲထားမှာ မဟုတ်။