Bi De • Pan Yu Xin De Rui la ||Myanmar Translation||

58

နောက်ဆုံးမှ ကားပေါ်တက်လာသည့် ရှဲ့ကျူရှင်း ကားတံခါးပိတ်ရန်လုပ်ချိန်မှာပဲ လျှို့ချုံးမင်က ကားပေါ် အပြေးတက်လာပြီး သူ့ကား ပြင်ဖို့လိုအပ်နေတာမို့ ကုမ္ပဏီကားနှင့်လိုက်မည်ဆိုသည့်အကြောင်း ပြောလာ၏။

ကားထွက်ခွါသွားသည်နှင့် တစ်ကားလုံးငြိမ်သက်နေသည်မှာ ဘယ်သူကမှ သူတို့မန်နေဂျာအသစ်ဖြစ်သူနှင့် စကားမပြောချင်ပုံပေါ်နေတော့သည်။

လျှို့ချုံးမင်မှ စတင်၍ စကားလမ်းကြောင်း အစပြုလာခဲ့သည်။ "မင်းတို့အကုန် ဘယ်မှာနေကြတာလဲ။"

ဖုန်းဂိမ်းဆော့နေသည့်ခေါင်းဆောင်မှလွဲ၍ အဖွဲ့သားတိုင်း ပြန်ဖြေလာကြသည်။

ရှဲ့ကျူရှင်း ပြောလိုက်သည်။ "ကျွန်တော်က ကန်းလန်ချန်၊ ခေါင်းဆောင်ကတော့ ဝမ့်ကျီရှီ့ယွမ်မှာ နေတယ်။"

သူနှင့် ဝမ်ချောင်က လျှို့ချုံးမင်အနောက်တွင် ထိုင်နေကြတာဖြစ်သည်။

လျှို့ချုံးမင်က အနောက်လှည့်လာပြီး ပြုံးလျက်ပြောလာသည်။ "မင်းလည်း ကန်းလန်ချန်မှာ နေတာလား။ တိုက်ဆိုင်လိုက်တာ၊ ငါ့တူတစ်ယောက်လည်း အဲ့ဘက်မှာနေတယ်။"

ရှဲ့ကျူရှင်းလည်း ယဉ်ကျေးသမှုဖြင့်ပြန်ဖြေလိုက်သည်။ "တော်တော်လေးတိုက်ဆိုင်တာပဲ။"

လျှို့ချုံးမင်မှ ဆက်ပြောလာသည်။ "ငါ့တူကလည်း ဒီအသိုင်းအဝိုင်းထဲကပဲ။ သူက အနုပညာရှင်တစ်ယောက်ရဲ့လက်ထောက်အနေနဲ့ အလုပ်လုပ်နေတာလေ။ မင်းတို့တွေ့ဖူးလောက်မယ်ထင်တယ်။"

ရှဲ့ကျူရှင်း ခဏမျှတွေးကြည့်လိုက်သည်။ "ကျောက်ကျန့်ယိလား။" သူတို့နှစ်ယောက်ရဲ့နာမည်တွေက အမျိုးဖြစ်နိုင်ချေများလောက်အောင် ဆင်တူလွန်းနေသည်။

[T/N : လျှို့ချုံးမင်ဆိုတဲ့နာမည်ထဲက ချုံးမင်က ဉာဏ်ကောင်းခြင်းဆိုတဲ့အဓိပ္ပါယ်ရပြီး ကျောက်ကျန့်ယိရဲ့ ကျန့်ယိက တရားမျှတမှုဆိုတဲ့အဓိပ္ပါယ်မို့လို့ပါ။]

လျှို့ချုံးမင်က အလွန်အမင်းအံ့ဩသွားဟန်ဖြင့် ပြန်ပြောလာသည်။ "အိုက်ယား?? မင်းတို့အချင်းချင်းသိကြတာလား။"