Unicode
အခန်း ( ၇၀ )
ကျယ်ယန့်စကားများကြောင့် ဟန်ဆောင်မျက်နှာဖုံး ကွာကျသွားပြီဖြစ်၍ ဆက်ပြီး ရင်းနှီးသလို ဟန်ဆောင်ရန်မလိုအပ်တော့။ ဖန်းချောင်နန် သူ့လက်ထဲက ဇာတ်ညွှန်းကိုချကာ အသံတိုးတိုးဖြင့် ဆိုလာသည်။
"မင်း ဘာအကြောင်းပြောနေလဲဆိုတာ ငါမသိဘူး"
"အဲ့လိုလား" ကျယ်ယန် ရယ်လိုက်ပြီး ဇာတ်ညွှန်းစာရွက်အောက်က ဖန်းချောင်နန်ဖုန်းကို လှမ်းကြည့်လိုက်သည်။
"ခင်ဗျား လူမသိသူမသိ recording ခိုးဖမ်းနေတာကို ကျွန်တော် မသိချင်ယောင်ဆောင်ပေးဖို့ လိုသေးလား။"
ဖန်းချောင်နန် ဇာတ်ညွှန်းစာရွက်ကို တင်းတင်းဆုပ်ကာ ကျယ်ယန့်ကို မျက်မှောင်ကုတ်ကြည့်လိုက်၏။ "ကျယ်ယန် မင်းက တက်သစ်စလေးပါ။ မင်းရဲ့ အကြောက်တရားနဲ့ ထက်မြက်မှုကို ငါ နားလည်ပေးနိုင်ပေမဲ့ မင်း အတွေးမလွန်သင့်ဘူး။"
"မုကျိုးယိက ခင်ဗျားကို V ကလပ်ပါတီမှာ ကောလာဟလတွေ ပြောခဲ့ပြီး ခင်ဗျားကတော့ အဲ့ဒီကောလဟာလတွေကို လူတစ်ယောက်ရှာပြီး ဖြန့်ခိုင်းခဲ့တယ်ဟုတ်။ ဒီအတွက် မုကျိုးယိက ခင်ဗျားကို ဘာပြန်ပေးခဲ့လဲ။ Extreme Combat ရဲ့ အထူးဇာတ်လမ်းတွဲမှာ ဧည့်သည်နေရာပေးခဲ့တာလား။"
ဖန်းချောင်နန် မျက်နှာပျက်သွား၏။
"ဖန်းချောင်နန် ဘယ်သူမှ ငတုံးမဟုတ်ဘူး။ လူသုံးယောက် ဇာတ်ကောင်တစ်နေရာအတွက် တိုက်ခိုက်ကြတယ်။ ယန်ရှန်းက ဟွမ်ယွီကိုကိုယ်စားပြုလို့ ခင်ဗျား သူ့ကို မဆန့်ကျင်ရဲဘူး။ ဒါ့ကြောင့် ကျွန်တော့်ကိုလာဆွတာပေါ့။ ကျွန်တော့်ကို လွယ်လွယ်အနိုင်ပိုင်းလို့ရမယ်များ ထင်နေလား။ ကျယ်ယန်က ပလပ်စတစ်ဆာဂျရီလုပ်တယ်။ ကျယ်ယန်က ဘေထုပ်တွေဝတ်တယ်။ သိပ်ကိုကောင်းတယ် ခေါင်စဥ်လေးတွေပေါ့ဗျာ။ ကျွန်တော့်ကို နာမည်ကြီးအောင် ကူညီပေးတဲ့အတွက် ကျေးဇူးပါ။"
ဖန်းချောင်နန် ဟန်မပျက်အောင် ခက်ခက်ခဲခဲ ထိန်းနေရ၏။ "ကျယ်ယန် မဟုတ်ဘဲနဲ့ ငါ့ကို မစွပ်စွဲနဲ့။"
"ခင်ဗျားကြည့်ရတာ အခုထိမလျော့သေးဘဲ ကျွန်တော့်ကို နှောင့်ယှက်ချင်နေသေးပုံပဲ။ "
