Unicode
အခန်း ( ၉ )
ဝူရွှေ့က သူ့ပစ္စည်းများကို သယ်ပိုးပြီးသွားတော့ ကျယ်ယန်လည်း လိုအပ်သောအသုံးအဆောင်များ ဝယ်ခြမ်းဖို့ရာ အနားက လျှပ်စစ်ပစ္စည်းဆိုင်သို့ တက်စီတစ်စီးနှင့်ထွက်လာခဲ့၏။ သွားရင်းလာရင်း သူ့ဗိုက်ကိုလည်းဖြည့်ခဲ့သေးသည်။ ထို့နောက် အခုမှဝယ်လာသော အသစ်စက်စက်လက်ပ်တော့လေးကိုထုတ်ကာ အရင်ဘဝက ရေးခဲ့ပြီးသား သီချင်းများကို ပြန်ပြင်ဆင်ရန် အဆောင်သို့ ကရောသောပါးပြန်လာခဲ့တော့သည်။
ည ၁၁ နာရီ၌ သူ့ကွန်ပြူတာကို အချိန်ကိုက်ပိတ်လိုက်လေသည်။ ထို့နောက် မျက်နှာသစ် ခြေလက်သန့်စင်ကာ အိပ်ရာဝင်ခဲ့၏။ အနှီညက အိပ်မက်မမက်သော ညချမ်းတစ်ခုဖြစ်ခဲ့ကာ နောက်တစ်နေ့မှာလည်း ကျယ်ယန် သူ့သီချင်းများကို ဆက်လက်ပြင်ဆင်နေခဲ့သည်။
နေ့လည်ပိုင်း၌ ဟူပျောင်းက သူ့ကိုဖုန်းဆက်ကာ ဖော်ဖော်ရွေရွေစကားဆိုလာ၏။ ဟူပျောင်းက တောင်းပန်လာခဲ့ပြီး သူ့ကိုယုံကြည်စိတ်ချဖို့ရန် အားပေးလာသည်။ သီချင်းအသစ်ကိုလည်း လေ့ကျင့်ထားဖို့ပြောလာကာ သူ့ကိုအောင်မြင်အောင်လုပ်ပေးမည်ဟုပါ ကတိတွင်တွင်ပေးနေခဲ့သေးသည်။
ကျယ်ယန်ကတော့ ဖုန်းကို hands-free mode ဖြင့် စားပွဲပေါ်မှာတင်ကာ မကြာမကြာသာ ဝတ်ကျေတမ်းကျေပြန်အဖြေပေးနေ၏။ သို့သော် သူ့လက်ချောင်းများကမူ ကီးဘုတ်ပေါ်မှာသာ အလျှင်အမြန် ရွေ့လျားလို့နေသည်။ ၁၀ မိနစ်ကျော်တော့ ဟူပျောင်းက ဖုန်းချသွားခဲ့သည်။ ကျယ်ယန်လည်း ကီးဘုတ်နှိပ်နေသော လက်ချောင်းများကိုရပ်ကာ ဖုန်းယူလျှက် Weibo ဖွင့်ပြီး IUD အကြောင်းကို နှိပ်လိုက်လေသည်။
ဟူပျောင်းက ဘာအကြောင်းပြချက်မှမရှိဘဲ ဖုန်းခေါ်မည်မဟုတ်ပေ။ တစ်ခုခုတော့ဖြစ်နေလေပြီ။ အသေအချာအပင်။ မနေ့ညက ဟူပျောင်း၏ Weibo အောက်ကပွဲက ပေါက်ကွဲလို့နေလေပြီ။
ကလောင်တံနဲ့ ဓားရှည်သခင်က အားဝမ်နှင့်အတူ S မြို့တော်ရုပ်မြင်သံကြားဌာနမှထွက်လာသော ကျယ်ယန်၏ဓာတ်ပုံများကို IUD အကြောင်းတွင်တင်ကာ လှောင်ပြောင်ထား၏။ : သူ့ရဲ့တက်ကြွနေတဲ့ပုံကြီးကိုလည်း ကြည့်ကြဦး။ အရေးပေါ်အခြေအနေတဲ့လား။ ဟာသပဲ။ သူက လီဆယ်နေတာ ! ငါ့အစ်ကိုတွေကို နောက်ကွယ်ကနေဆွဲချနေတာ ! ငါ့သူငယ်ချင်းပြောတာတော့ Hello Holiday အဖွဲ့က IUD အပေါ်မှာ ထင်မြင်ချက်တွေအများကြီးရှိပြီး IUD ကလည်း ပရိုဂရမ်ပေါ်မှာ လုံးဝလေးစားမှုမရှိသလိုပဲတဲ့။ နောက်ဆို IUD ကို ဖိတ်မှာတောင်မဟုတ်တော့ဘူးဆိုပဲ !
