Unicode
အခန်း ( ၃ )
ချိုးရှင်းသည် ဒီအချိန်မှာဖြစ်သွားသော ကျယ်ယန်၏မျက်နှာအမူအရာကို သဘောကျသွားကာ စိတ်အေးလက်အေးဖြင့် အသာအယာ စကားပြောင်းလိုက်၏။
" နောက်တာပါ။ သူက ကျယ်မိသားစုက ကစားစရာလေး။ ငါနဲ့ နောက်နှစ်နည်းနည်းလောက်တော့ အတူရှိနေရလိမ့်မယ်။ "
ကျယ်ယန်: "......"
ဖုန်ချင်းလင်ကတော့ ကြောင်အသွားပုံပင်။ အခုအဖြေက ' အစောပိုင်းက နောက်တယ်ဆိုသောဟာသ ' ထက် ပိုကောင်းလာပုံမပေါ်။ သူတို့ ဘာမှမတုံ့ပြန်လာတာကိုမြင်တော့ ချိုးရှင်းမျက်နှာထားက နောက်တစ်ဖန်ခက်ထန်လာပြန်သည်။ " ဒီဟာသက မရယ်ရဘူးလား။ "
ဖုန်ချင်းလင်မှာ အသည်းအသန် ပြုံးပြလိုက်ရတော့၏။ " ဦးလေး ခင်ဗျားက တကယ့်ကို ဟာသဉာဏ်ရွှင်တာပဲ။ ဦးလေးက အတည်ပေါက်ကြီးနဲ့ပြောလိုက်တော့ ကျွန်တော့်မှာလေ
ယောကျာ်းတစ်ယောက်က ကျွန်တော်ဒေါ်လေးဖြစ်လာတယ်လို့ တကယ်ကြီးထင်ပြီး လန့်ဖျန့်သွားတာပဲ။ ဒါပေမယ့် ကျယ်မိသားစုက ယောကျာ်းလေးတစ်ယောက်ကို ဘာလို့လွှတ်လိုက်တာလဲ။ ဦးလေးက ..."
" တူလေး မင်း အမေးအမြန်းထူလွန်းနေပြီ။ " ချိုးရှင်း၏မျက်နှာက ထူးထူးခြားခြား ပြောင်းလဲသွားကာ မတ်တပ်ရပ်လျှက် အေးတိအေးစက်ဖြင့် ပြောလာသည်။ " ကောင်းကောင်းအနားယူ " ထို့နောက် ချက်ချင်းပဲ လှည့်ထွက်လာခဲ့၏။
ကျယ်ယန်ကတော့ ဖုန်ချင်းလင်ကို အကဲခတ်နေမိ၏။ ဖုန်ချင်းလင်က သူ့အကြည့်ကိုသတိထားမိသွားကာ ကူကယ်ရာမဲ့စွာဖြင့် ပြုံးပြလာသည်။ " ငါ့ဦးလေးက ဒီလိုပဲ။ မင်း ... ဒီမှာရှိနေသမျှကာလပတ်လုံး ဦးလေးကို ဂရုစိုက်ပေးပါဦး။ ကျေးဇူးတင်ပါတယ်။ "
ရုပ်ရှင်လောကရဲ့ အနာဂတ်ဧဏရာဇ်ကြီး ဖြစ်ဖို့ ထိုက်တန်ပါတယ်။ သရုပ်ဆောင်ကတော့ သိပ်ကောင်း။
ကျယ်ယန်ကတော့ ပြန်တောင်မဖြေတော့ဘဲ ချိုးရှင်းအနောက်သာ လိုက်သွားတော့၏။ ဇာတ်လိုက်မ၏ နောက်ဆက်တွဲသရုပ်ဆောင်မှုကို မြင်ချင်သည်လေ။
' ဝတ္ထုရဲ့ မူရင်းဇာတ်ကြောင်းမှာဆိုရင် နာမကျန်းဖြစ်နေတဲ့လူနာဆီ သွားလည်တဲ့အပိုင်းအား ဇာတ်လိုက်မင်းသမီးရဲ့ ရှုထောင့်ကနေ ရေးသားထားတယ်။ ဒီနေ့ညနေပိုင်းမှာ သူမရဲ့အေးဂျင့်နဲ့ ဆက်သွယ်ပြီးနောက် ဇာတ်လိုက်မင်းသားရဲ့အကြောင်းကို သေချာမသိတဲ့ ဇာတ်လိုက်မင်းသမီးက ဆေးရုံသို့ ကပျာကယာ လာကြည့်ခဲ့တယ်။ ဇာတ်လိုက်မင်းသမီးက ဇာတ်လိုက်မင်းသားနဲ့ ချိုးရှင်းရဲ့စကားဝိုင်းကို မတော်တဆကြားသွားခဲ့ပြီး ဖုန်ချင်းလင်ရဲ့ ဘဝတစ်စေ့တစ်စောင်းကိုသိသွားကာ သနားကရုဏာသက်သွားခဲ့တယ်။ ဇာတ်လိုက်မင်းသားကို ဂရုမစိုက်ဘဲ မနေနိုင်ခဲ့ဘူး။ ဒီနေရာမှာ နောက်ထပ်ဇာတ်ကွက်သေးသေးလေးလည်း ရှိသေးတယ်။ ဇာတ်လိုက်မင်းသမီးက ခိုးကြောင်ခိုးဝှက်နားထောင်တဲ့အပေါ် အလွန်အမင်း အာရုံစိုက်နေခဲ့လို့ ချိုးရှင်းရုတ်တရက်ပြန်ထွက်လာတာကို သတိမထားလိုက်မိဘူးလေ။ ဇာတ်လိုက်မင်းသမီးက အလောတကြီး ထွက်ပြေးပြီး ဗီလိန်ရဲ့အာရုံကို အောင်အောင်မြင်မြင် ဆွဲဆောင်နိုင်သွားပါရော။ '
အရင်ကဆိုလျှင်တော့ ကျယ်ယန်က ရိုမန့်တစ်ဆန်သော ဝတ္ထုများထဲမှ ယခုလိုဇာတ်ကွက်တွေကို မုန်းသည်။ သို့ပေမယ့် ယခုတစ်ခါတော့ သူတကယ့်ကို ကြည့်ချင်နေပြီ။
