Unicode
အခန်း ( ၂၄ )
ကျယ်ယန် ကားထဲဝင်လာပြီးနောက် စကားထက်မဆိုတော့။ သူ့အမူအရာက လေးလံနေကာ ရှားရှားပါးပါး ကြောက်စရာအမူအရာမျိုး ရှိနေသည်။
ဝူရွှေ့က ကားနောက်ကြည့်မှန်ကနေ သူ့ကိုလှမ်းကြည့်လျက် မေးလာသည်။ “ သူဌေး အဆင်ပြေရဲ့လား။ ”
“ အဆင်ပြေတယ် ” ကျယ်ယန်က သူ့အမူအရာကို ထိိန်းလိုက်၏။ ထို့နောက် သူတို့အားလုံး ပါပါရာဇီတွေဝိုင်းတာခံခဲ့ရကြောင်း ဖုန်းထုတ်ကာ ဟူပျောင်းဆီ ပြောလိုက်သည်။
ဟူပျောင်းက အလှဆင်ကုမ္ပဏီနှင့် ပြုပြင်ရေးအစီအစဥ်များကို ဆွေးနွေးနေသည်။ ကျယ်ယန့်ဖုန်းကောလ်ကို လက်ခံပြီးနောက် ပေါက်ကွဲသွားတော့သည်။ “ မော့ပင်းကတော့ ဟွမ်ထျန်းကနေ ပြဿနာရှာတဲ့ပုံစံကို အတည်ကြီးသင်နေတာပဲ။ လောင်ရှို့ယူကိုတောင် ဆွဲထည့်ဝံ့တယ်။ လောင်ရှို့ယူနဲ့ သူ့မိသားစုက လွယ်လွယ်သွားထိလို့မရမှန်း သူသိရဲ့သားနဲ့ကွာ။ ရန်သူတောင် သွားဖွဲ့နေသေးတယ် !”
“ သူက သူ့ဘာသာသူ ရန်သူဖွဲ့နေတာ။ VIP ထိုင်ခုံတန်း အလယ်နေရာက လက်မှတ်နှစ်စောင်ကို ကြိုမှာပြီး မော့ပင်းနဲ့ လောင်ရှို့ယူတို့စီ ပို့ပေးလိုက်ပါ။ လက်မှတ်တွေကလည်း တစ်ခုံနဲ့တစ်ခုံကပ်နေရမှာနော် ဒါကို သတိရ။ ”
ဟူပျောင်း အံ့အားသင့်သွား၏။ “ အမ် လောင်ရှို့ယူစီရော ပို့ရမှာလား။ ”
“ ပို့ရမှာပေါ့ မော့ပင်းကမှ လောင်ရှို့ယူရဲ့တည်ရှိမှုကို အသုံးချချင်နေတာ။ ဒီလိုဆိုမှတော့ ကျွန်တော်တို့ကလည်း လောင်ရှို့ယူကို ကိုယ်တိုင်ကိုယ်ကျဖိတ်ပြီး သူ့သီချင်းမဟုတ်မှန်း နားထောင်စေမယ်။ ကျွန်တော်တို့အသံသွင်းထားတဲ့ သီချင်းအသစ် ပထမဆုံးဗားရှင်းကိုပါ လောင်ရှို့ယူစီ လက်မှတ်နဲ့ တွဲပို့ပေးပါ။ သီချင်းကို နားထောင်ပြီးရင် လောင်ရှို့ယူက ပိုတောင်လာချင်သွားဦးမှာ။ လောင်ရှို့ယူနဲ့ပတ်သက်ပြီး ပါပါရာဇီတွေကို အသုံးချခဲ့တဲ့ မော့ပင်းတစ်ယောက် သူတို့အတူတူမျက်နှာချင်းဆိုင် ထိုင်မိတဲ့အခါ ဘယ်လိုများတုံ့ပြန်မလဲဆိုတာ ကျွန်တော် သိချင်မိပါရဲ့ !”
