Unicode
အခန်း ( ၃၈ )
အကယ်၍ ပုံမှန်အချိန်တွေမှာသာဆိုလျှင် ပြတ်ပြတ်သားသား ဝေဖန်ခံရပြီးပါက ကျီဇယ့်ဟွေ့သည် အစီစဥ်တင်ဆက်သူကို စကားလမ်းကြောင်းပြောင်းဖို့ မဆိုင်းမတွ နည်းလမ်းရှာစေကာ တခြားအကြောင်းဆွေးနွေးဖို့ရန် ဒိုင်တွေကို ဖိတ်ကြားခိုင်းလိုက်မှာပင်။ ဤလုပ်ရပ်က လတ်တလောဖြစ်ရပ်ကို ယာယီထိန်းချုပ်နိုင်လိမ့်မည်။ ပြီးမှ ပရိုဂရမ်အဖွဲ့ကို ဖိအားပေးဖို့ နည်းလမ်းရှာကာ မကောင်းသတင်းဝေဖန်ချက်များကို မထုတ်လွှင့်ပဲ မှတ်ချက်ကောင်းတွေကိုသာ ထုတ်လွှင့်အောင် ကြိုစားပေမည်။
သို့ရာတွင် ကျီဇယ့်ဟွေ့ စိတ်ကို ငြိမ်အောင်မထားနိုင်ချေ။ ဒေါသလှိုင်းများသီချင်းကို လိုက်လျောညီထွေ ပြန်လည်ပြင်ဆင်မှုအား ချီးကျူးသော ဝေဖန်ချက်များစွာကို ကြားပြီးရုံရှိသေးသော လောင်ရှို့ယူ၏ ဝေဖန်ချက်က သူ့ကို သည်းမခံနိုင်အောင် အလွန်အမင်း ပေါက်ကွဲထွက်သွားစေသည်။
လောင်ရှို့ယူကို ကျယ်ယန် ဖိတ်ခဲ့တာသာ အမှန်ဆိုလျှင် …
ကျီဇယ့်ဟွေ့ ပြန်ချေပလိုက်သည်။ “ ကျွန်တော့်ကိုယ်ကျွန်တော် အမြဲတမ်း ပြန်သုံးသပ်ပါတယ်။ ဒီတစ်ခေါက် သီချင်းကို သေချာမဆိုခဲ့မိတဲ့အတွက် စိတ်မကောင်းပါဘူး။ ကျွန်တော် ကျွန်တော့်ရဲ့ ဧည့်သည်အဆိုတော် ကျယ်ယန်ကို ကူညီပေးနေခဲ့လို့ပါ။ မနေ့နေ့လည်ခင်းကအထိ သူ့ခမျာ ဒေါသလှိုင်းများသီချင်းကို ပြန်ညှိနေရတာနဲ့ အလုပ်များနေရှာတာ။ နေ့လည်ကျတော့လည်း ကပျာကယာနဲ့ ညနေကျတော့လည်း ရီဟာဇယ်ရှိသေးတာကိုး။ ဒီလိုကြိုးစားလွန်သွားတဲ့ ကျေးဇူးကြောင့် သူနဲ့ ကျွန်တော် နည်းနည်းပင်ပန်းသွားကြတယ်ဗျ။ ”
လောင်ရှို့ယူ ပိုလို့တောင် စိတ်ပျက်သွား၏။ “ မဟုတ်ဘူးကွ သီချင်းဆိုရုံလောက်နဲ့ မင်းအသံပျက်မသွားဘူး။ တွဲဖက်သီဆိုမှုနဲ့ မင်းမှာ ပြဿနာရှိနေရုံပဲ။ ကျယ်ယန်ရဲ့ ဖျော်ဖြေမှုက မှတ်တမ်းတင်ရလောက်အောင်ပဲ။ သီချင်းရဲ့ခံစားချက်ကိုလည်း မင်းဝင်မဆိုခင်အထိ ပြည့်စုံအောင် သရုပ်ဖော်သွားနိုင်တယ်။ မင်းဝင်ဆိုလိုက်တာနဲ့ ခံစားချက်တွေအားလုံးက ချက်ချင်းကို ပြိုကွဲပျက်စီးသွားတော့တာပဲ။ အထူးသဖြင့် မင်းအရည်အချင်းတွေကို ထုတ်ပြတဲ့နောက်တစ်နေရာ၊ ငါ့မှာ တခြားသီချင်းတစ်ပုဒ်ကို နားထောင်နေရသလိုပဲ။ ပြီးတော့ နောက်ဆုံး သံပြိုင် chorus အပိုဒ်ရှိသေးတယ်။ ကျယ်ယန်က မင်းကို သီချင်းလမ်းကြောင်းပေါ် ပြန်ဆွဲခေါ်ဖို့ အထပ်ထပ်အခါခါ ကြိုစားခဲ့ပေမဲ့ မင်းကတော့ သူ့အသံကို ပြန်ပြန်ပြီး ဖိထားတာကြောင့် သီချင်းတစ်ပုဒ်လုံးရဲ့ စိတ်ခံစားချက်တွေ ပျက်သုဥ်းကုန်တာပေါ့။ ဒီနေရာမှာ ကျယ်ယန်လည်း တာဝန်မကျေမှန်း ငါ ခံစားရသားပဲ။ နောက်ဆုံး chorus ပိုဒ်က သီချင်းကို မင်း လွှမ်းမိုးချုပ်ကိုင်နိုင်စွမ်းရှိတာ အသိသာပဲလေ။ ဘာလို့ တာဝန်မယူခဲ့တာလဲ။ ”
